Luke 19 - Lakota Portions

Jesus E Na Zacchaeus

¹ Jesus oṫuƞwahe waƞ Jericho eyapi ċa ohaƞ iyaye,

² hetu ċa wiċaṡa waƞ Zacchaeus ec̄iyapi ċa ti. Woyuha wokaiju pahi uƞ igluwijic̄a.

^3-4 Zacchaeus wiċaṡa ptec̄ela ċa wiċaṡa uƞma ki iwiċiwaƞkab waƞyaƞka okihi ṡni, Jesus yaƞke etkiya hiyaye ċa waƞyaƞka ċiƞ na wiċiṫokabya iƞyaƞg iyayiƞ na ċaƞ ṫaƞka waƞ oskab iyotake.

⁵ Jesus el ihuƞni na waƞkal etuƞwe na hekiye, “Zacchaeus, inaḣni na hukuta glic̄u wo! Aƞpetu ki le yati el wauƞ ktelo,” eye.

⁶ Zacchaeus inaḣniya hukul glic̄u na Jesus yuonihaƞ.

⁷ Tuwe ki iyuha le waeċuƞ ki waƞyaƞkapi na iyokipipi ṡni, “Wiċaṡa waƞ Jesus kiċi wotiƞ kte ki le waḣtani sʹa heċa yelo,” eyapi.

⁸ Iyohakab Zacchaeus inajiƞ na heye, “Iṫaċaƞ, taku bluha ki okise uƞṡike ki wiċawakʹu kte na taku ḣmiya oyate ki wiċawaki hena topakigleya hektakiya wiċaweċu ktelo,” eye.

⁹ Jesus Zacchaeus hekiye, “Aƞpetu ki le tiwahe niṫawa ob wanikiya iyac̄upelo, eċiƞ Abraham wiċoiċaġe ki he niwaƞji.

¹⁰ Wiċaṡa-Ċiƞkṡitku ki tuwe onuniyata uƞpi kʹuƞ hena niwiċakiyiƞ kta uƞ hi yelo,” eye.

Wowaṡi Wikc̄emnapi

¹¹ Yuƞk̇aƞ etaƞ Jesus waeye ki he naḣʹuƞpi hena wana Jerusalem ikiyela yapi na ota Wak̇aƞṫaƞka ṫawokiċuƞze ki he wana kiyela ihe keċiƞpi.

¹² Ċa Jesus wiyaċiƞpi ki le owiċakiyake, “Iṫaċaƞ waƞ mak̇a ṫehaƞtu ċa ekta iyaye, heċiya wiċaṡa-yataƞpi kaġapi kte na ake ku ktelo.

¹³ Iyaye ṡnihaƞni, wowaṡi wikc̄emna wiċakiċo na iyohila mazaska eya wiċakʹu. Na leċel owiċakiyake, ‘Mazaska ki le ilagyapo. Heċetu kihaƞ tohaƞl wagli kihaƞ luotapi ktelo,’ eye.

¹⁴ Eyaṡ ṫaoyate ki waḣtelapiṡni na wahoṡiya eya mak̇a ṫehaƞl heċiya iyayewiċayapi na wooyake ki le oyag wiċaṡi, ‘Wiċaṡa ki le wiċaṡa-yataƞpi uƞċiƞpi ṡni yelo.’

¹⁵ “Iṫaċaƞ ki wiċaṡa-yataƞpi kaġapi ohakabya gli na wowaṡi waƞ hena wiċakiċo. Mazaska eya wiċakʹu waƞ hena tona akaġapi ki he iwiċayuƞġe.

¹⁶ Wowaṡi ṫokahe ki he hi na yuonihaƞ hekiye, ‘Mazaska eya mayakʹu waƞ he wikc̄emnakigle bluota yelo,’ eye.

¹⁷ Wiċaṡa-yataƞpi ki iyokipi na ṫawowaṡi ki hekiye, ‘Lila taƞyaƞ waeċanu welo,’ eye. ‘Woyuha awaƞyaƞgniċiyapi ki he c̄ikʹala eyaṡ taƞyaƞ awaƞyaƞlaka ċa oṫuƞwahe wikc̄emna oiniṫaċaƞ ktelo.’

¹⁸ Wowaṡi ic̄inupa he iƞṡ-eya hi na yuonihaƞya hekiye, ‘Mazaska eya mayakʹu waƞ hena zaptaƞkigle bluota yelo,’ eye.

¹⁹ Wiċaṡa-yataƞpi ki hekiye, ‘Oṫuƞwahe zaptaƞ oiniṫaċaƞ ktelo,’ eye.

²⁰ Ake wowaṡi eċuƞ he waƞji hi na yuonihaƞ hekiye, ‘Mazaska eya mayakʹu waƞ hena wauƞbla waċiƞ ṡni na mazaska ki oṗaweḣtiƞ na naweḣme.

²¹ Eċiƞ wiċaṡa ki sutaya owiċayakuwa ki he slolwaye. Taku oyaju ṡni na taku niṫawa ṡni hena iyac̄u na luha oyakihi ki he slolwayiƞ na k̇oċikiṗelo,’ eye.

²² Wiċaṡa-yataƞpi ki wowaṡi ki hekiye, ‘Takuni iniwaṡte ṡni yelo!’ hekiye. ‘Taku ehe ki le uƞ wanigluṡic̄e yelo. Wiċaṡa tomaketu ki slolyaye, taku miṫawa ṡni na owaju ṡni kʹeyaṡ iwac̄u na ṫawamicʹiye.

²³ Lena iyuha slolyaye eyaṡ eċel eċanu ṡni, ec̄oḣc̄i mazaska ognake tipi el eyagnake ki igluota okihi tk̇a yelo,’ eye.

²⁴ Hehaƞl wowaṡi eya hel najiƞpi hena hewiċakiye, ‘Mazaska ki hena kipi na waƞji mazaska wikc̄emnakigle akaġa waƞ he kʹupo,’ eye.

²⁵ Eyaṡ yuonihaƞya leyapi, ‘Waƞ le wiċaṡa ki iyeṡ ehaƞtaƞ wikc̄emna yuha yelo!’ eyapi.

²⁶ Yuƞk̇aƞ wiċaṡa Iṫaċaƞ ki leċel awiċayupte, ‘Tuwe wowaṡi ṫawa ki he taƞyaƞ eċuƞ haƞtaƞṡ yuonihaƞpi kte na taku ota isamya waṡte ċa awaƞyaƞgkiyapi kte. Eyaṡ etaƞ wowaṡi taƞyaƞ eċuƞpi ṡni waƞ hena iƞṡ takuni yuhapi kte ṡni.

²⁷ Tuk̇a etaƞ ṫokamayapi na Iṫaċaƞ maċiƞpi ṡni waƞ hena miṫokabya wiċaktepi ktelo,’ eye.”

Jesus Jerusalem Timahel Hiyu

²⁸ Jesus leċel eyiƞ na wiċiṫokabya Jerusalem etkiya iyaye.

²⁹ Bethphage oṫuƞwahe na Bethany oṫuƞwahe ikiyela ihuƞnipi. Paha waƞ Wigli K̇aƞta eya iċajeyatapi el ihuƞni hehaƞ ihakab-uƞpi ki etaƞhaƞ num kaiṫokab iyayewiċaye.

³⁰ Jesus leye, “Wiċoti el iyahuƞnipi ki hel ṡuƞṡuƞla makic̄ima waƞ kaṡka najiƞ kte. Tuweni nahaƞḣc̄i akaƞyaƞke ṡni ċa, ho, he kiyuṡkapi na leċi aupo.

³¹ Ho na tuwa winiyuƞġapi haƞtaƞṡ leċel aluptapi kte, ‘Iṫaċaƞ ki ilagyiƞ ktelo,’ eyapo.”

³² Ċa ṡuƞṡuƞla ki iyeyapi, Jesus eye ki aiyeċel.

³³ Ho ċa ṡuƞṡuƞla ki wana kiyuṡkapi hehaƞ ṫawa ki heye, “He! Takuwe he yakiyuṡkab hwo?”

³⁴ Ċa leċel ayuptapi, “Iṫaċaƞ ki ilagyiƞ ktelo,” eyapi.

³⁵ Ho ċa ṡuƞṡuƞla ki Jesus kahipi. Ho na ṡina uƞ ṡuƞṡuƞla ki akaḣpapi nahaƞ akaƞ Jesus iyotagkiyapi.

³⁶ Ye ki kaiṫokabya ogle eya makikc̄eya iḣpekiyapelo.

³⁷ Wigli K̇aƞta Paha eyapi ċa kaiyoḣpeya iyaye hehaƞ wana Jerusalem oṫuƞwahe hel kiyela ihuƞni, yuƞk̇aƞ oyate eya ihakab-uƞpi ki Wak̇aƞṫaƞka yaonihaƞpi, takuku waṡte waeċuƞ ki hena waƞyaƞkapi heuƞ.

³⁸ Wiċaṡa-yataƞpi waƞ u ki le Wak̇aƞṫaƞka ṫawokiċuƞze akic̄iu ċa gluonihaƞ kte. Heuƞ ċa oyate ki Wak̇aƞṫaƞka ogna taƞyaƞ waḣwayela uƞpi kte. Wak̇aƞṫaƞka ihaƞkeya yuonihaƞpi.

³⁹ Eyaṡ owiċota etaƞhaƞ Pharisees eya Jesus hekiyapi, “Wauƞspekiya, nihakab-uƞpi ki waeyapi ki iyowiƞwiċakiye ṡni yo!” eyapi.

⁴⁰ Eyaṡ Jesus leċel awiċayupte, “Le oċic̄iyakapi kte, lena inila uƞpi haƞtaƞṡ iƞyaƞ ki e kʹeyaṡ ṡʹayahaƞpi ktelo.”

Jesus Jerusalem oṫuƞwahe Ṫaƞtaƞhaƞ Iṡtamniyaƞpi Kpapsuƞ

⁴¹ Jesus Jerusalem Oṫuƞwahe ikiyela ihuƞni na waƞyaƞka hehaƞ iṡtamniyaƞpi kpapsuƞ

⁴² na heye, “Le aƞpetu ki tokeṡke taƞyaƞ yauƞpi kte ki ayakiblezapi ṡni na wic̄amayalapi ṡni ċa onuniyata yauƞpelo.

⁴³ Ṫokata ṫoka waḣtenilapiṡni waƞ hena niohomni mak̇a na iƞyaƞ uƞ aċuƞkaṡkaniyuzapi ktelo.

⁴⁴ Oṫuƞwahe ki taƞyela nic̄ajujupi kte na niṫaoyate ki niċiƞc̄api ki oġeya nic̄asotapi ktelo. Wak̇aƞṫaƞka taƞyaƞ uƞniċiyapi ċiƞ eyaṡ Wanikiye ki wic̄ayalapi ṡni heuƞ oteḣike ki lena waƞlakapi ktelo.”

Jesus Tipi-Wak̇aƞ Ekta I

⁴⁵ Yuƞk̇aƞ, Jerusalem lel Jesus hi na Tipi-Wak̇aƞ ki timahel i. Hel huƞḣ wawiyoṗekiyapi waƞ hena kaṫaƞkal iyewiċaye

⁴⁶ na hewiċakiye, “Wak̇aƞṫaƞka ṫaoiye ki Wowapi-Wak̇aƞ el leċel owa yaƞke: Tipi-Wak̇aƞ ki lel waċeyakiyapi kta ṡk̇a wamanu-wiċaṡa oti yakaġapelo,” eye.

⁴⁷ Aƞpetu iyohila Jesus Tipi-Wak̇aƞ lel wauƞspewiċakiye. Yuƞk̇aƞ, waċekiye-wiċaṡa-oiṫaċaƞpi ki na Moses-ṫawooṗe-awaƞyaƞkapi ki hena Jesus ktepi kte ċiƞpi.

⁴⁸ Ho eyaṡ tuktognani okihipi ṡni, oyate ki lila Jesus oiye naḣʹuƞpi ċa.