2 Peter 2 - Lakota Portions

Wahoṡiyakuƞzapi na Wauƞspekiyakuƞzapi

¹ Ehaƞni watohaƞlya Wahoṡiyakuƞzapi eya Israel oyate ki wowiċakiyapi. Wauƞspekiyakuƞzapi ki hena nakuƞ naḣma ahi na uƞṫuƞniyaƞpi kta uƞ owak̇aƞk̇aƞ woglakapi kte. Eyaṡ wauƞspewiċakiyapi ki lena Iṫaƞċaƞ ihaƞkiya uƞṡiwiċala kʹuƞ he ektuƞjapi, na he kiċiċapi ṡni, na hena yulena sʹe ihaƞgiċ'iyapi kte.

² Oyate ota oye waṡte ki hetaƞ wiċayahomnipi kte na iye ṫaoye ṡiċe ki ogna iyayewiċayapi kte, na oye waṡte ki he aowiċawak̇aƞk̇aƞpi na iwiċaglepi kte.

³ Iṡiwaċiƞpi na ċoyaiya wayupikapi ki uƞ oyate ki wiċagnayaƞpi kte. Eyaṡ Wak̇aƞṫaƞka ehaƞni hena tokel wiċakaṡtakiƞ kte ki he ogna egle, na Wak̇aƞṫaƞka igluwinyeyauƞ.

⁴ Wak̇aƞṫaƞka ogligle wak̇aƞ kʹeya waḣtanipi kʹuƞ hena uƞṡiwiċala ṡni. Hena wiċapaḣtiƞ na wotakuƞni ṡni waƞ oiyokpasya he ki heċiya oiḣpewiċaye, heċiya wiċayasupi ṡni hehaƞyaƞ uƞpi kte

⁵ *Na Noah wiċoiċaġe waƞ hehaƞ, Wak̇aƞṫaƞka wiċaṡa waḣtanipisʹa mak̇a sitomniya uƞpi waƞ hena uƞṡiwiċala ṡni. Hena mnitaƞ ṫaƞka waƞ uƞ ihuƞgwiċaye, eyaṡ hetaƞ oyate ṡagloġaƞ niwiċaye, Noah k̇o, he wowiċake ki uƞ wahokuƞwiċakiye.

⁶ *Wak̇aƞṫaƞka Oṫuƞwahe eya Sodom eyapi na Gomorrah eyapi ċa ḣugnaḣwiċaye, etaƞ wowaḣtani waṡtelakapi ki hena leċel iwahowiċaye.

^7-8 *Lot wiċaṡa ki he owoṫaƞla uƞ na oyate ki awaiċ'iḣtanipi ki he inaġiyeya uƞ. Wiċaṡa ki he waṡte, na anpetu iyohila taku ṡiċe ki hena waƞyaƞkiƞ na naḣ'uƞ kʹun uƞ yuċaƞteṡiċe. Ca heuƞ Wak̇aƞṫaƞka nikiye.

⁹ Wak̇aƞṫaƞka ṫaoyate ki woteḣi ohaƞ uƞpi hetaƞhaƞ leċel niwiċakiye ki he wiċakipazo, na oyate eya wowaḣtani waṡtelakapi ki hena tokel wiċakaṡtake ki he nakuƞ waƞyaƞkapi, na wiċayasupi ṡni hehaƞyaƞ leċel akiṗe uƞpi kte.

¹⁰ Wak̇aƞṫaƞka oyate eya wanḣ'uƞpi ṡni na takuƞni waṡte awaċiƞpi ṡni e taku ṡiċe ecela awaċiƞ uƞpi hena wiċakipajiƞ. Lena tokel ċiƞpi ognaya igluhapi, na tuweiċ'ilapi, na takuƞni k̇okipa ṡni keyapi na oglgle wak̇aƞ ki hena wiċakuƞzapi.

¹¹ Ogligle wak̇aƞ ki iyeṡ wakan siċapi ki hena isaƞm waṡʹakapi kʹeyaṡ, Wak̇aƞṫaƞka ċekiyapi ċaƞna woiye heċetu ṡni uƞ lena iwowiċaglakapi ċiƞpi ṡni.

¹² Oyate ki lena wamak̇aṡkaƞ kʹeya iyeċiƞkawaawaċiƞpi kʹuƞ heċel unpi, na oyate ki niwiċayapi kta uƞ nipi. Taku slolyapi ṡni kʹeyaṡ yaṡiċapi. Eyaṡ taku ṡiċa eċuƞpi ki hena un ihaƞgiċ'iyapi kte.

¹³ Taku ṡiċa eċuƞpi ki hena uƞ wiċakiċiċajujupi kte. Aƞpa eċuƞhaƞ gnaṡkiƞyaƞ sʹe kiċiċopi na iċiḣmaya waeċuƞpi ki he oiyokipi keċiƞpi. Wiċowiċaṡaṡniya opiiċ'iyapi, waiḣpeyapi woeċuƞ ki he el niohaƞ uƞpi, woiṡteċe ṡniya uƞpi ki hena woyuonihaƞ uƞ wiċawote ki he yaṡiċapi.

¹⁴ Wiċaṡa ṫawapi ṡni na wiƞyaƞ ṫawapi ṡni eya ob waiċiḣaḣa eċuƞpi kta eċela awaċiƞ uƞpi. Wiċaṡaṡniya unpi ki he ṫaoye ki oihaƞke waniċe. Oyate eya [wiċagnayaƞpiwak̇aƞlapi] ki hena wiċagnayapi, na wiṡiċawaċiƞ uƞ ṫawaċiƞpi ki ojula. Eyaṡ woteḣika waƞ el yapi!

¹⁵ * Ċaƞku waƞ owoṫaƞla ki hetaƞ iḣayab iyayapi na oye waƞ waṡte ṡni ċa ogna iyayapi, wahoṡiye waƞ Balaam eċiyapi ċa he iyaċiƞya k̇api. He Beor ċiƞċa na taku iċiḣmiya iċu ki hena iyokipi.

¹⁶ Eyaṡ taku waƞ ṡiċa ċa eċuƞ ki he ṡuƞṡuƞla waƞ iyoṗeye. Wiċaho waƞ uƞ wokiyakiƞ na witkotkoya waeċuƞ ki he inajiƞ kiye.

¹⁷ Oyate ki lena mniyuṡpala puze ki he iyeċel uƞpi, na wakiƞyaƞ aku ki he iyeċeċapi. Wiċotakuniṡni waƞ ihaƞkeya oiyokpasya he ki he aṗe kiċiyaƞhe.

¹⁸ Waƞkʹeya waeċuƞpi ki he hoṫaƞgya oglakapi. Na ṡikṡil waeċuƞpi na wauƞṡilapi ṡni, na oyate eya iċiḣmeya uƞpi waƞ hetaƞ naiċ'iṡpapi waƞhena wiċagnayapi.

¹⁹ Okablaya uƞpi kta iwahowiċayapi. Eyaṡ taku ṡiċe aeċala yuha nipi, iċiƞ oyate ki taku ṡiċe ki hena napiwiċayuzapi ki heuƞ.

²⁰ Iṫaƞċaƞ na wanikiya Jesus Christ onaḣ'uƞpi waƞ hehaƞ, mak̇a wotakuniṡni waƞ hetaƞ naiċ'iṡpapi. Eyaṡ taku waƞ etaƞ igluḣlayapi waƞ hetaƞ ake el kiglapi, na he tokel uƞpi tk̇a waƞ he isaƞmya ṡilya uƞpi.

²¹ Eyeṡ taku heċetu kʹuƞ he naḣ'uƞpi ṡni ki taƞyaƞ uƞpi tk̇a. Taku heċetu ki he slolyapi eyaṡ woahoṗe wak̇aƞ eya wiċakʹupi waƞ hetaƞ iḣayab iyayapi.

²² * Taku heċetu ki he tokel waeyapi waƞ yaƞke kʹuƞ he heċetu, " Ṡuƞka waƞ taku iglepe ki he el gli na glute na kukuṡe waƞ yujajapi kʹeyaṡ ake ḣliḣlila el iċaptaƞptaƞ kiċuƞ kte."