1 Timothy 3 - Lakota Portions

Owaċekiya Tipi Oiṫaċaƞpi

¹ Tuwa owaċekiye tipi ok̇olakiċiye el oiṫaċaƞ ċiƞ haƞtaƞṡ taku waṡte ki hena el woilagicʹiyiƞ kte.

² Heuƞ oiṫaċaƞpi hena taƞyaƞ awaƞiglakapi na wokiċiyuze ki he ahokiṗa uƞpi kte. Waċiƞṫaƞkapi na waċiƞksapapi kte, tuwe ki iyuha ċaƞtewaṡteya ob uƞpi kte, nahaƞ taƞyaƞ wauƞspekiya okihi kte.

³ Mniṡa yatkaƞpi isamicʹiyapi kte ṡni naiƞṡ woiṡilkaġapi kte ṡni. Tuk̇a wowauƞṡilapi na waṡteċakapi, na mazaska ki he eċelayapi kte ṡni.

⁴ Owaċekiye tipi oiṫaċaƞpi ki hena tiwahe ṫawapi ki hena taƞyaƞ awaƞwiċaglakapi kte, wak̇aƞyeja wiċayuhapi ki hena waoholapi na ataƞsʹela uƞpi kte.

⁵ Tiwahe ṫawapi ki hena taƞyaƞ awaƞwiċaglakapi okihipi ṡni haƞtaƞṡ, tokeṡke Wak̇aƞṫaƞka ṫaoyate ki hena wauƞspewiċakiyapi kta hwo?

⁶ Tuwa Iṫaċaƞ eċiyataƞhaƞ wauƞspewiċakiye ki he wiċaṡa ṫaƞka iyeċel wiyukc̄aƞ na katʹiƞsya wauƞspewiċakiyiƞ kte. Nahaƞḣc̄i etaƞ ṫawaċiƞ nuṡnujelapi iyeċel wiyukc̄aƞpi, hena wak̇aƞ-ṡiċa waƞ waḣʹaƞicʹila na ouƞṡiċa waƞ ekta iyayeyapi heċiya iƞṡ-eya yapi kte.

⁷ Taku ehakela kʹuƞ le e, wauƞspewiċakiyapi ki hena oyate wiċiṫokabya taƞyaƞ igluhapi kte, heċel iƞṡʹeya ohowiċalapi kte. Na wak̇aƞ-ṡiċa ki wiċayahomni okihi kte ṡni na iṡtelwiċaya okihi kte ṡni yelo.

Church Officers - Owaċekiye Tipi Oiṫaċaƞpi

⁸ Owaċekiye tipi waokiyapi ki hena yutaƞyaƞkel opiicʹiya uƞpi kte. Owak̇aƞk̇aƞpi kte ṡni, mniṡa yatkaƞ isamicʹiyapi kte ṡni, nakuƞ mazaska iṡic̄awaċiƞpi kte ṡni.

⁹ Wak̇aƞṫaƞka ṫawowic̄ala ki waƞyaƞguƞkiyapi ki he waċiƞkiksuya sutaya glus uƞpi kte.

¹⁰ Hena iye ṫokaheya igluwiċak̇api kte. Hehaƞl tuweni takuni ṡiċa wiċakipajiƞpi ṡni haƞtaƞṡ, hehaƞl oiṫaċaƞ wiċakaġapi kte.

¹¹ Wiƞyaƞ ki iƞṡʹeya yutaƞyaƞkel opiicʹiyapi kte. Waaiyapi kte ṡni naiƞṡ mniṡa yatkaƞ isamicʹiyapi kte ṡni, taku eċuƞpi ki hena iyuha waċiƞyekiya eċuƞpi kte.

¹² Owaċekiye tipi waokiyapi ki hena ṫawiċu waƞjilapi kte, na wak̇aƞyeja ṫawapi nahaƞ ti el tuwe uƞpi hena k̇o taƞyaƞ waokuwa kte.

¹³ Tuwe heċel icʹiċuƞzapi na taƞyaƞ wowaṡi eċuƞpi ki hena, Jesus Christ ṫawowiċala yuhapi ki heuƞ taƞyela wiċayuonihaƞpi kte.

Wowiċala Uƞkiṫawapi Wak̇aƞ

¹⁴ Eċaƞni waƞyaƞg ċiupi waċiƞ. Eyaṡ ṫokaheya lena woiyaksape ki oċiċiwapi,

¹⁵ Heċel ogna takuƞl hektakiya omayuspe eyaṡ, Wak̇aƞṫaƞka ṫatioṡpaye ki hena tokel igluhapi kte ki hena slolyayapi kte. Waƞ eya, Wak̇aƞṫaƞka eċiyataƞhaƞ wowiċala ki he yujuju piċaṡniya he yelo.

¹⁶ Wowiċala wak̇aƞ ki le e: Christ wiċaṡa heċel mak̇a akaƞl hi. Woniya Wak̇aƞ ki yaaṫaƞiƞ, ogligle ki waƞyaƞkapi. Mak̇a owaƞċaya Christ yaoṫaƞiƞpi. Mak̇a owaƞċaya oyate ki wiċalapi, na maḣpiya wokiċuƞze etkiya akiyaglapi.