1 Peter 2 - Lakota Portions

Oyate Igluonihaƞ Uƞpi

¹ Wawoyusiƞkapi etaƞhaƞ igluḣlayapo! Oyate ki wiċagnaya iyuṫapi ṡni yo, nahaƞ e e ċaƞtekiċ'uƞyaƞ uƞpo. Oyate anawiċawizipi ṡni na ṫawaċiƞ hiƞyaƞzaƞya owiċakuwapi ṡni yo.

² Hokṡiċala waƞ nakeṡ yuhapi na loċiƞya ipuze, he huƞku etaƞhaƞ asaƞpi ċiƞ ki he iyeċel niṡʹeya taku eya wak̇aƞlapi ki hena uƞ waniṡʹakiƞ kte, na uƞ yani kte.

³ TohaƞyaƞWak̇aƞṫaƞka wauƞṡila ki he ehaƞni slolyayapi.

⁴ Jesus Christ el upo. He inyaƞ waƞ oyate ki ċiƞpi ṡni na paḣeyab yuzapi kʹuƞ he eċa Wak̇aƞṫaƞka eḣc̄a kiye na taƞyela yuonihaƞ.

⁵ Heuƞ inyaƞ iyeċel niyuwak̇aƞpi, na niyepi uƞ Ok̇olakiċiye-wak̇aƞ ki he yuosloliyeyapi. Iyuha wiċaṡa wak̇aƞ heniċapi, nahaƞ Jeṡus Christ wookiye niċ'upi kte heċel Wak̇aƞṫaƞka etkiya taku wayeċ'uƞpi kʹuƞ hena iyokipi kte.

⁶ Wak̇aƞṫaƞka waeye ki Wowapi Wak̇aƞ el leċel owapi,

⁷ Iṫaƞċaƞ ihakab yauƞpi ki, inyaƞ ki le teḣiyakilapi. Eyaṡ etaƞ ihakab uƞ ċiƞpi ṡni kʹuƞ hena e heċetulapi ṡni. Hena tikaġapi wowaṡi eya iƞyaƞ waƞ ihaƞkeya waṡte ċa ḣayeb iḣpeyapi yuƞk̇aƞ iƞyaƞ ki he ihaƞkeya waƞkatuya yawapi kʹuƞ he e.

⁸ Woṫaƞiƞ Waste ki anaġoptaƞpi ṡni ki uƞ iƞyaƞ ki le ikaṡepi na hiƞḣpayapi, Wak̇aƞṫaƞka heċetu kta ċa eċel wiċakiċiyuṡtan.

⁹ Ok̇olakiċiye Wak̇aƞ ki he niyepi, Wak̇aƞṫaƞka niċaḣniġapi na ṫaoyate nikaġapi heċel ṫawowaṡte ki hena olakapi kta uƞ, niṫawaċiƞpi ki oiyokpaze iyeċel el yauƞpi waƞ hehaƞ waayablezapi ṡni, eyaṡ waƞna hena ayablezapi na lena laoṫaƞiƞpi kte. Wowapi Wak̇aƞ el leċel owapi,

¹⁰ "Ehaƞni Wak̇aƞṫaƞka slolyayapi ṡni waƞ hehaƞ nitakunipi ṡni. Waƞna Wak̇aƞṫaƞka ṫaoyate ki niyepi. Ehaƞni tuweni uƞṡinila ṡni. Eyaṡ waƞna Wak̇aƞṫaƞka ṫawowauƞṡila ki uƞ uƞṡinila."

Slaves of God-Wak̇aƞṫaƞka Ṫawowilake

¹¹ Mitakuyepi, ċaƞte etaƞhaƞ woċiċiyakapi kta ċa taƞyaƞ anamaġoptaƞpo. Lel oyate ṫokc̄a heniċapi. Ċa taku waṡte ṡni eya niyuhuƞkapi ṡni ki hena etaƞ iḣeyab eċuƞpo.

¹² Wowicala yuhapi ṡni eya ohaƞ yauƞpi ċa waktaya uƞpo. Takuƞl ṡic̄a iyaniuƞpapi eyaṡ igluonihaƞ yauƞ ki waƞniyaƞkapi na tohaƞl Wak̇aƞṫaƞka oyate ki wiċayasu kta u ki, taku waṡte eċanuƞ ki hena wanyaƞkapi na Wak̇aƞṫaƞka yuonihaƞpi ktelo.

¹³ Wak̇aƞṫaƞka tuwa iṫaƞċaƞwiċayapi ki hena oiye iwiċayac̄upi ċiƞ, eḣc̄a mak̇asitomniyaƞ yataƞpi ki he, iċiƞ he tuwepi ki iyuha el oiṫaċaƞ yaƞke.

¹⁴ Woiṫaƞċaƞ yaƞkapi ki hena nakuƞ oiye iwiċayacupi kte, iċiƞ hena mak̇asitomniyaƞ yataƞpi ki hiyuwiċaye, heun tuwa ṡilḣaƞpi ki hena woiyoṗeye wiċakʹupi kte, na etaƞ taƞyaƞ uƞpi ki hena wiċayuonihaƞpi kte lo.

¹⁵ Taƞyaƞ waeċanupi ki ognayaƞ oyate eya wiyukc̄aƞpi ṡniyaƞ iniglepi hena aicʹiblezapi kte. Leċel Wak̇aƞṫaƞka ṫawaċiƞ.

¹⁶ Okablaya yauƞpi eyaṡ heċena Wak̇aƞṫaƞka ṫawowaṡi heniċapelo. Na okablaya yauƞpi ki heuƞ tokel yaċiƞki he ognaya yauƞ oyakihipi keċiƞpi ṡni yo.

¹⁷ Tuwe ki iyuha wiċayuonihaƞpo na Wak̇aƞṫaƞka ṫaoyate ki eḣc̄a uƞṡiwic̄alapo. Wak̇aƞṫaƞka yuonihaƞpo na Wiċaṡa Yataƞpi ki yuoholapo.

The Example of Christ's Suffering-Christ Woteḣi Ṫawa Ki

¹⁸ Wowilake niyuhapi ki hena ahowiċakiṗapo na ohiƞniyaƞ ohowiċalapo. Nakuƞ etaƞ taƞyaƞ niċuwapi ṡni hena k̇o leċel eċuƞpo.

¹⁹ Wak̇aƞṫaƞka niyawaṡte kte, iċiƞ etaƞ aiyeċelya niċuwapi ṡni eyaṡ wowaṡi niyuha ki he nayeċijiƞ ki uƞ.

²⁰ Taku waƞ waṡte ṡni ċa eċanu ki uƞ kakiṡniyapi ki he heċetu. Eyaṡ taku waƞ waṡte ċa eċanu ki he uƞ kakiṡniyapi haƞtaƞnaṡ Wak̇aƞṫaƞka niyawaṡte kte.

²¹ Iṡnikal eṡ, Niyepi uƞ Christ wokakije ki he woiwaƞyaƞke heċa, ṫaoye ki he ahoyaṗe ki haƞ wokakije waƞ wanlakiƞ kte, heuƞ Wak̇aƞṫaƞka nic̄aḣniġe,

²² Christ tohaƞniya waḣtani ṡni naiƞṡ aokaḣya woglake ṡni.

²³ Na tuwe ki iyuha akiyehaƞlya ċaƞtewiċakiyuze heuƞ teḣiya kuwapi kʹeyaṡ ṫokiċ'uƞ ṡni. Na woteḣi waƞyaƞkiyapi k'eyaṡ ṡilwaċiƞ ṡni.

²⁴ Christ wauƞḣtanipi ki yuptaya iċu na hena yuha ċaƞiċipaweġa waƞ akaƞl aokataƞpi na tʹe, heċel hehaƞyaƞ wauƞḣtanipi kte ṡni na e e owoṫaƞlaya uƞkʹuƞpi kte. Ṫaċaƞ oċaṗe ki hena na uƞṫuƞyaƞpi ki heuƞ asniniyaƞpi.

²⁵ Taḣc̄a ṡuƞkala eya okablelya iyayapi heniċec̄api eyaṡ, waƞji awaƞniyaƞkapi ki he el hektakiya yaglipi.