सपन्याह 3 - लिम्बुयरुसले़म 1 पिफ्युङ् के़जोःक्पा, आसुत्थोबा नु मे़न्वाॽमना के़जोःक्पा ये़क्यक्किन् चिःत्ते़स्ये़रो! 2 खे़ल्ले़ आत्तिन् इङ्जाङ्ङिन्नाङ् मे़इःत्तुन् मे़नाःत्तुन्लो, खे़ल्ले़ आत्तिन् हे़न्थिम्मिन्नाङ् मे़दाःक्तुन्लो॥ खे़ल्ले़ यहवे दाङ्बे़न् कुनामे़साॽरुन्लो, कुनिङ्वाॽफुमाङ्ङिल्ले़ कुबेसाङ् खे़न् मे़दाने़न्लो॥ 3 खे़ल्ले़ कुसुहाङ्युक्पाहाॽ के़हुःक्पा खिरिङ्बा हे़क्के मे़लॽरो, हे़क्क्याङ् खे़ल्ले़ कुयुक्साबाहाॽग तानाम् थारिक् खुन्छिॽ सानाःत्तिन् थेआङ् मे़न्नम्मनाबा युःन्छिक्पा पराबा हे़क्तङ्बा मे़जोक्लो॥ 4 खे़ल्ले़ कुमाङ्निङ्वाॽपान् के़बाःप्पाहाॽ निङ्वाॽ तादा पान् के़ले़ङ्बा मे़जोक्लो, खे़ङ्हाॽ इङ्ले़क् के़जोःक्पा मनासिरो॥ खे़ल्ले़ कुनिङ्वाॽफुसाम्बाहाॽरे़ सेसेदे़न्निन् मे़जिःन्दुरो, हे़क्क्याङ् खे़ङ्हाॽरे़ साम्योथिम् इङ्जाङ्ङिन् फे़त्मे़लाःन्दुरो॥ 5 खे़ल्ले़ कुलुम्मो के़युङ्बा यहवे दाङ्बे़न् साम्योबा चोक्लो, खुने़ॽ थे़माआङ् मे़न्वाॽमनाबा मे़जोगुन्लो॥ खुने़ॽ थिक्याःन्धक्मा खुने़ॽ तानाम् थक्मा मे़म्भेःन्ने कुदोःप्मा खासे़न् ओसेःन्धाङ् चोगुरो, हे़क्केसाङ् लायोबा मनान् सिरिङ् मे़मने़न्लो॥ 6 “आङ्गाॽ मे़न्छाम् सुवाङ्हाॽ मे़क्खुङ्सिङ्ङाङ् वाॽआरो, खे़ङ्हाॽरे़ खुन्छिॽ माराम्हाॽ मना मेःन्नेबा चोगुङ्ङाङ् ने़रो, खे़प्मो आत्तिन्हाॽआङ् लाङ्मे़ङ्घेःक्ने़न्लो॥ खे़ङ्हाॽरे़ खुन्छिॽ ये़क्यक्हाॽ खाप्पुथ्यःङ् पोःक्खे़आङ् ने़रो, खे़प्मो हाःत्ताङ् मे़न्युङ्ने़न्लो॥ 7 आङ्गाॽ ये़क्यक्किन् अक्खे मे़त्तुङ्लो, ‘से़क्खासाङ् खे़ने़ॽ आङ्गाॽ के़गित्तार पोङ्लो, आङ्गाॽ आहे़न्थिम्मिन् के़दाःक्तुर पोङ्लो॥ खे़ब्याङ् खे़ने़ॽ कुयुक्नान् मे़मे़क्ने़न्लो, हे़क्क्याङ् आङ्गाॽ के़रे़क् आघुम्दिङ्हाॽ खे़ने़ॽ के़सम्धाङ् मे़जुक्ने़न्लो॥’ कर के़रे़क् फे़त्लाॽमा इसेःङ्बा याःम्बक्हाॽ चोःक्मारे़ लागि खे़ङ्हाॽ आल्लसाङ् यरिक् खुन्छिॽ सिक्समे़रो॥” 8 यहवे दाङ्बे़ल्ले़ अक्खेलॽरिक् उवा चोगुरो, “खे़ल्ले़चोगुल्ले़ खिनिॽ आहाङ्घे़म्मे़ॽओ थिक्यान् आङ्गाॽ पोःक्कारो॥ मे़न्छाम् सुवाङ्हाॽ फुङ्मासि नु हाङ्जुम्हाॽ सुम्मासिरे़ लागि हे़क्क्याङ् खे़ङ्हाॽ सम्धाङ् मि हे़क्तङ्बा आसाक्के़न्निन् थामारे़ लागि आङ्गाॽ निङ्वाॽ निःन्धो चोगुङ्ङाङ् वाॽरो, के़रे़क् इक्सादिङ् खाम्बेःक्मान् आङ्गाॽ आनागे़हे़म्बा मिःल्ले़ खाप्पुथ्यःङ् पोङ्लो॥ 9 “खे़न् ये़म्मो आङ्गाॽ लाजेॽ लाजेॽओबा मनाहाॽरे़ खुन्छिॽ मुरान् सुत्थो चोगुङ्लो, खे़ब्याङ् खे़ङ्हाॽ के़रे़क्ले़ यहवे दाङ्बे़ल्ले़ कुमिङ्ङो पेलिगे़न् तुवा मे़जोगुररो हे़क्क्याङ् फक्ताङ् नु फक्ताङ् मे़दङ्घुआङ् खुने़ॽ कुसे़वा याःम्बक् मे़जोगुररो॥ 10 कुसबा वहःङ्हाॽ नाहाङ्दाङ्लाम् आङ्गाॽ माङ्से़वा के़मे़प्पा, फुत्छिङ्ज्याङ् के़बोङ्बा आमनाहाॽरे़ हुक्वा याङ्हाॽ आङ्गाॽओ मे़दारुरो॥ 11 खे़ल्ले़ याःन्दिक् आङ्गाॽ ले़प्माङ् के़जोगुम्बा खिनिॽ के़रे़क् फे़न्याःम्बक्किल्ले़ चोगुल्ले़ खिनिॽ नारा सिरेःप् लॽमा मे़बोङ्ने़न्लो॥ थेआङ्भे़ल्ले़ खे़न् ये़म्मो खुन्छिॽ आङ्दिङ् लॽमाओ के़सःप्पाहाॽ आङ्गाॽ कन् ये़क्यक् लुम्मोलाम् लःत्तुङ्देसुङ्सिङ्लो॥ आङ्गाॽ आसेसे कोःक्माओ याम्मो आभे़ल्ले़आङ् खिनिॽ याम्मो यम्बा के़हे़न्छिङ्बा के़म्बोःक्खिन्लो॥ 12 कर खिनिॽ लुम्मो चुङ्जिगे़न् नःम्नःम्बा नु याङ्गे़साॽबा मनाहाॽ आङ्गाॽ ले़रुङ् थाङ्सिङ्लो खे़ङ्हाॽरे़ यहवे दाङ्बे़ल्ले़ कुमिङ्ङो निङ्वाॽ मे़युक्खुरो॥ 13 इस्राइलबा के़दाङ्बा के़याःक्पा मनाहाॽरे़ थे़माआङ् याःम्बक् मे़म्भेःन्दुन्लो॥ खे़ङ्हाॽरे़ मे़न्वाॽमना पान् मे़म्बाःत्तुन्लो, खुन्छिॽ मुराओ इङ्ले़क् पाःन्नाङ् खोमे़दे़त्ने़न्लो, खे़ङ्हाॽरे़ मे़ज मे़धुआङ् मे़ले़ङ्ङाङ् मे़ने़रो, हे़क्क्याङ् खे़ङ्हाॽ हाःत्ले़आङ् यङ्मा मे़से़रुसिन्लो॥” निङ्वाॽ तामा साम्लो 14 सियोनरे़ कुस्सा मे़न्छुमाए, साम्लोरे़ॽओ! इस्राइलए, यम्बा इक्लाओ अःक्ते़ॽओ! यरुसले़ःम्मिल्ले़ कुस्सा मे़न्छुमाए, सःत्ते़ॽओ हे़क्क्याङ् के़रे़क् के़सिक्लुङ्मे़ल्ले़ ये़ये़ लॽरे़ॽओ! 15 खिनिॽ खुम्दिङ्ङिन् यहवे दाङ्बे़ल्ले़ खे़त्तुआङ् वाॽरो, खिनिॽ निङ्मिहाॽ पाङ्घुदेसुसिआङ् वाॽरो॥ यहवे दाङ्बा, इस्राइलबा हाङ्ङिन्, खिनिॽनु वाॽरो, आल्लआङ्धो याम्मो आभे़ल्ले़आङ् आत्तिन् ताप्फे़ःम्बा पाःन्नोआङ् किमा मे़बोङ्ने़न्लो॥ 16 खे़न् ये़न्नो खे़ङ्हाॽरे़ यरुसले़ःम्मिन् अक्खे मे़मे़त्तुरो, “सियोनए, खे़ने़ॽ मे़गिसे़न्ने़ॽओ, खे़ने़ॽ के़हुक्हाॽ ले़म्जुजुबा मे़बोङ्ने़न्लरो॥ 17 यहवे दाङ्बा के़निङ्वाॽफुमाङ्ङिन् खे़ने़ॽनु वाॽरो, खुने़ॽ खे़ने़ॽ से़ःप्मारे़ लागि मुक्साम् कत्तुरो॥ खुने़ॽ खे़ने़ॽनु साॽरिक् कुनिङ्वाॽ तारो, खुने़ॽ लुङ्माॽ के़दुक्काङ् चिजि ये़म्ये़म् के़जोःक्लो, खे़ने़ॽ के़याःम्बेओ सःत्ताङ् खे़ने़ॽ साम्गे़मे़त्लो॥ 18 “युक्तिङ् के़बोङ्बा तङ्नाम्हाॽओ पेःक्मा मे़न्छुक्मनाबाआङ् मे़रिङ् के़धक्पाहाॽ आङ्गाॽ फुक्खुङ्सिङ्लो, आल्लआङ्धो खिनिॽ सिरिङ्ममा मे़बोङ्ने़न्लो॥ 19 ओमे़त्ते़म्मे़ॽ, खे़न् ये़म्मो खे़ने़ॽ तुक्खे के़जाःप्पाहाॽ के़रे़क् खुम्दिङ् पिरुङ्सिङ्लो, आङ्गाॽ कुलाङ् के़सक्पाहाॽ नाङुङ्सिङ्लो, हे़क्क्याङ् फुत्छिङ्ज्याङ् के़बोङ्बाहाॽ फुक्खुङ्सिङ्लो॥ सिरिङ्मसे़ मे़देॽरुसिबा के़रे़क् लाजेॽहाॽओ आङ्गाॽ खे़ङ्हाॽ खुन्छिॽ नाराफोमा नु मिङ्सो थाङ्सो पिरुङ्सिङ्लो॥ 20 खे़न् ये़म्मो आङ्गाॽ खिनिॽ फुङ्निङ्लो, खम्भ्याङ् खे़न् ये़म्मो आङ्गाॽ हिम्मो ताःत्निङ्लो॥ आल्ल आङ्गाॽ खिनिॽ नुॽमादामाहाॽ खिनिॽ मिक् तगिए नुःक्तुङ् तारुङ्लो, खे़ब्याङ् इक्सादिङ् खाम्बेःक्मोबा मनाहाॽरे़ खुन्छिॽ लुम्मो खिनिॽ मिङ्सो थाङ्सो नु नारा फोसुङ् पिनिङ्लो,” यहवे दाङ्बे़ल्ले़ पाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.