सपन्याह 2 - लिम्बुलायोलाम् हिम्मा पेलि 1 कुसिरिङ्ममा के़होप्पा मे़न्छाम् सुवाङ्से, खिनिॽ सोरिक् चुप्से़म्मे़ॽओ, खिनिॽ सोरिक् चुप्से़म्मे़ॽओ, 2 लायोलाम् हिम्मा ये़न्निन् चासिप् हे़क्के फे़मा तेॽमानुःल्ले़ तगि खासे़न् पोङ्मा हेःक्मानुःल्ले़ तगि, यहवे दाङ्बे़ल्ले़ के़दिःप्पा कुसाक्के़न्निन् खिनिॽ सम्धाङ् चुक्मानुःल्ले़ तगि, हे़क्क्याङ् यहवे दाङ्बे़ल्ले़ साॽरिक् कुसिक् पोःक्मा ये़न्निन् खिनिॽ सम्धाङ् थामानुःल्ले़ तगिए खिनिॽ सोरिक् चुप्से़म्मे़ॽओ॥ 3 यहवे दाङ्बे़ल्ले़ कुइङ्जाङ् के़इःप्पा के़नाःप्पा कन् लाजेॽओबा चुङ्जिगे़न् नःम्नःम्बासे, खिनिॽ खुने़ॽ कोःत्ते़म् हक्से़म्मे़ॽओ॥ साम्योनिमान् खिनिॽ कोःत्ते़म्मे़ॽओ, चुङ्जिगे़न् नःम्नःम्बा पाःन्हाॽ हक्से़म्मे़ॽओ, यहवे दाङ्बे़ल्ले़ कुसाक्के़न् पोःक्मा ये़न्नो हाग खिनिॽ से़ःप्सिङ्मादे़न् के़घोसुम्बिरो॥ पलिस्तिहाॽरे़ तक्ले़ङ्वाओ 4 गाजा ये़क्यक्किन् चिजि खक्खक् पोङ्लो, अस्कलोने़न् मुरे़क् खारे़क् पोङ्ङाङ् मे़ले़रुरो॥ ले़न्जोःल्ले़ अस्दोदे़न् कुघाले़म् मे़जोगुरो, हे़क्क्याङ् एक्रोने़न् हाॽयाक् मे़आःक्खुरो॥ 5 तुङ्गोदिङ् वरःङ्ङिल्ले़ कुयाओ के़युङ्बा करेति सुवाङ्से, खिनिॽ के़जिःत्ते़ के़स्ये़ॽइरो! पलिस्तिहाॽरे़ खुन्छिॽ लाजेॽ कनाने, यहवे दाङ्बे़ल्ले़ कुबाःन्जाक्किन् के़दक्ले़ङ्वाओ वाॽरो॥ खुने़ॽ पाःत्तुॽ, “आङ्गाॽ खे़ने़ॽ खाप्पुथ्यःङ् मे़ङ्ने़रो, हे़क्क्याङ् खे़ने़ॽओ आत्तिन्नाङ् मे़युङ्ने़न्लो॥” 6 करेतिहाॽ मे़युङ्बा वरःङ्ङिल्ले़ कुयाओबा लाजेन्, मे़ल्लुक्कम्बाहाॽरे़ खुन्छिॽ लागि वाॽमादे़न् पोङ्लो हे़क्क्याङ् मे़ल्लुक्हाॽरे़ लागि चाराम्मादे़न् पोङ्लो॥ 7 खे़न् यहुदा हिम्सयङ्बा के़हिङ्बा के़याःक्पाहाॽरे़ लागि पोङ्लो, खे़प्मो खे़ङ्हाॽरे़ मे़ल्लुक् चाराम्दे़न् मे़घोसुरो॥ युःन्छिक् खे़ङ्हाॽ अस्कलोनबा हिम्हाॽओ मे़इम्लो॥ यहवे खुन्छिॽ निङ्वाॽफुमाङ्ङिल्ले़ खे़ङ्हाॽ ओमे़त्तुसि कम्ब्राङ् मे़त्तुसिरो खुने़ॽ खे़ङ्हाॽ नुॽमादामे़न् याम्मो नुःक्तु पिरुसिरो॥ मोआब नु अम्मोन 8 “मोआबिहाॽरे़ खुन्छिॽ वरे़ॽ पाःन्निन् नु आम्मोनिहाॽरे़ खुन्छिॽ नामे़न्छाॽ पाःन्निन् खे़प्सुङ्ङाङ् वाॽरो, खे़ङ्हाॽरे़ आङ्गाॽ आमनाहाॽ कुनामे़न्छाॽ मे़मे़त्तुसिआङ् वाॽरो, हे़क्क्याङ् खुन्छिॽ लाजेन् तेॽमारे़ लागि यङ्मा मे़से़रुसिआङ् वाॽरो॥” 9 कल्ले़चोगुल्ले़ मुक्साम्दाङ्बा यहवे, इस्राइलबा निङ्वाॽफुमाङ्ङिल्ले़ उवा चोगुरो, “आङ्गाॽ कुहिङ्वे़त् वाॽआबा कुइसिक्, से़क्खाए मोआबे़न् सदोम हे़क्तङ्बा पोङ्लो अम्मोनिहाॽ गमोरान् हे़क्के ताम्भुङ् याःन्सुङ् नु युम् के़याक्पा पाक्लुम्लुम्बादे़न् पोङ्लो, हे़क्क्याङ् सदादिङ्ले़ लागि चा मे़न्नुॽमनाबा लाजेॽ पोङ्लो॥ के़वाॽबा के़याःक्पा आमनाहाॽरे़ खे़ङ्हाॽ मे़नाप्तुसिरो, खे़ब्याङ् के़हिङ्बा के़याःक्पा आङ्गाॽ आसुवाङ्हाॽरे़ खे़ङ्हाॽरे़ खुन्छिॽ लाजेन् मे़युक्तुरो॥” 10 खे़ङ्हाॽरे़ खुन्छिॽ आङ्दिङ् लॽमे़ल्ले़ कुले़क्वा खे़ङ्हाॽरे़ हाबा कन् पाःन्निन् मे़दुमुरो, थेआङ्भे़ल्ले़ खे़ङ्हाॽरे़ मुक्साम्दाङ्बा यहवे दाङ्बे़ल्ले़ कुमनाहाॽ कुनामे़न्छाॽ नु सिदाप् वरे़ॽ मे़मे़त्तुसिआङ् वये़रो॥ 11 आल्ल यहवे दाङ्बे़न् खे़ङ्हाॽरे़ खुन्छिॽ किप्मा के़घुबा पोङ्लो खे़ब्याङ् खुने़ॽ लाजेॽओबा के़रे़क् माङ्हाॽ इरे़म्सुसिरो, के़रे़क् कुया कुयाओबा, सुवाङ्हाॽरे़ खुन्छिॽ आप्फेक् लाजेॽ थक्मा खुने़ॽ माङ्से़वा मे़मे़त्तुरो॥ कुस नु अस्सुर 12 “कुसिसे, खिनिॽआङ् आदाभेःल्ले़ के़ज्ये़प्ति के़से़रिरो,” दाङ्बे़ल्ले़ पाःत्तुरो 13 खुने़ॽ थाङ्गे़त् पिसाङ्बे़ल्ले़ कुदक्ले़ङ्वाओ कुहुक्किन् सन्छुआङ् अस्सुरे़न् मे़क्खुरो॥ खुने़ॽ निनबेन् वरे़ङ्ले़ङ् चिजि खक्खक् नु मुरे़ःक् खे़रे़ःक् थेआङ् के़होःप्पादे़न् हे़क्तङ्बा कुसे़ङ्ग्रा चोगुरो॥ 14 थक्सालुप् नु थक्सा सुम्, के़रे़क् कुसक्मा के़याक्पा परिक् परिक्पाहाॽ खे़प्मो मे़ने़ मे़इम्लो॥ मुरे़क् खारे़क् थेआङ् के़होःप्पादे़न्नोबा फक्थिःम्बा नु के़अःक्पा फक्थिःम्बे़ल्ले़ खे़प्मोबा सित्लाङ्ङो हाप् चोगुरो॥ खे़ङ्हाॽ मे़अःक्पा इक्लाःल्ले़ पेधाःप्हाॽओलाम् लोःक्खुरो, लाम्धाःत्हाॽओ लुङ्जिगेःक्हाॽ नु लुङ्घे़ल्ले़क्हाॽ ने़रो, पे़रे़म्बा साम्माङ्सिङ् कुदाॽमाहाॽ यःक्पे़त् निधाःप्लो॥ 15 कङ्ग आम्भा खे़प्मो कुमिङ् के़इङ्बाआङ् के़ने़बा ये़क्यक्किन्लो खे़ल्ले़ कुनिङ्वाओ अक्खेलॽरिक् पाःत्तुआङ् वये़रो, “आङ्गाॽ पयम् यम्बा, आङ्गाॽनुःल्ले़ वेॽ हाःत्ताङ् होप्लो॥” खे़न् आक्तङ्बा चिजि खक्खक्पादे़न् पोःक्खे़बे, ताम्भुङ् थक्साहाॽरे़ खुन्छिॽ लुङ्फुक्कु पोःक्खे़रो॥ खे़त्नालाम् के़बोङ्बाआङ् के़बेःक्पा के़रे़क्ले़ कुनामे़न्छाॽ मे़मे़त्तुर खुन्छिॽ हुक्चोःक्किल्ले़ मे़सोःक्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.