सपन्याह 1 - लिम्बु1 आमोनरे़ कुस्सा यहुदाबा हाङ् योसियाहःल्ले़ युक् चोगुबा ये़म्मो हिजकियाहरे़ कुबे़म्मे़न्छाॽ, अमर्याहरे़ कुजक्मे़न्छाॽ, गदल्याहरे़ कुम्मे़न्छाॽ, कुसिःल्ले़ कुस्सा सपन्याहओ यहवे दाङ्बे़ल्ले़ कन् कुइङ्घङ्ङिन् के़रे़॥ यहवे दाङ्बे़ल्ले़ कुघासे़ःन्ले़ ये़न् 2 “आङ्गाॽ इक्सादिङ् खाम्बेःक्मोलाम् के़रे़क् पाःन्हाॽ वरे़ङ्ले़ङ् नुप्सुङ्सिङ्लो,” यहवे दाङ्बे़ल्ले़ इङ्भन् चोगुरो॥ 3 “मनाहाॽ, थक्साहाॽ के़रे़क् मे़क्खुङ्सिङ्लो॥ ताङ्साङ्बोबा पुसाहाॽ, वरःङ्ङोबा पाधुङ् ले़क्ङाहाॽ आङ्गाॽ थ्यःङ् चोगुङ्सिङ्लो॥ आङ्गाॽ इक्सादिङ् खाम्बेःक्मोलाम् मे़न्छाम् सुवाङ्हाॽ मासुङ्सिङ्लो, हे़क्क्याङ् कुॽइगे़भे़म्बाहाॽरे़ लागि लुङ्हाॽरक् लुम्सिङ्ङाङ् ने़रो,” यहवे दाङ्बे़ल्ले़ इङ्भन् चोगुरो॥ यहुदाःल्ले़ कुदक्ले़ङ्वाओ 4 “यहुदाःल्ले़ कुदक्ले़ङ्वाओ नु यरुसले़म के़युङ्बा के़रे़क्ले़ खुन्छिॽ तक्ले़ङ्वाओ आङ्गाॽ आहुक्किल्ले़ साःप्सुङ्सिङ्लो॥ कन् ते़न्नोलाम् के़दाङ्बा के़याःक्पा के़रे़क् बाल साम्माङ्बा पाःन्हाॽ नु नावाइत्ला से़वा के़मे़प्पा के़रे़क् यक्याबाहाॽरे़ खुन्छिॽ मिङ् मासुङ् पिरुङ्सिङ्लो॥ 5 हिम्मोबा कौसिहाॽरे़ कुसम्धाङ् मे़न्छ्या पुरुक्मा खेसेबाहाॽ से़वा के़मे़प्पाहाॽ, यहवे दाङ्बे़न् से़वा के़मे़प्पाआङ् माङ्हे़क् के़जोःक्पार मोलोखओआङ् माङ्हे़क् के़जोःक्पाहाॽ, 6 यहवे दाङ्बे़न् तिम्मा के़ले़प्पाआङ् के़नुःङ्बा के़बेःक्पाहाॽ, हे़क्क्याङ् यहवे दाङ्बे़न् कोःप्माआङ् मे़ङ्गोःप्मनाबाहाॽ खुने़ॽ कुयाःम्बेओ पान् सेःन्मे़न्दोमनाबाहाॽआङ् आङ्गाॽ खुन्छिॽ मिङ् मासुङ् पिरुङ्सिङ्लो॥” 7 यहवे दाङ्बे़ल्ले़ कुदगि स्वाःत् वये़म्मे़ॽओ, थेआङ्भे़ल्ले़ यहवे दाङ्बे़ल्ले़ कुये़न्निन् निःत्ताङ् वाॽरो॥ यहवे दाङ्बे़ल्ले़ सिदुङ्जभा थिक् यारिप् चोगुआङ् वाॽरो, हे़क्क्याङ् खुने़ॽ तरेबाहाॽ उःत्तुसिआङ् चामा पाङ्घुसिरो॥ 8 यहवे दाङ्बे़ल्ले़ अक्खे पाःत्तुरो, “खे़न् सिदुङ्जभा चोःक्मा ये़न्नो के़रे़क् सुहाङ्युक्पाहाॽ, हाङ्ङिल्ले़ कुस्साहाॽ, खम्भ्याङ् वेॽ लाजेॽबा चाङ् के़जाङ्बाहाॽ के़रे़क् खुम्दिङ् पिरुङ्सिङ्लो॥ 9 खे़ल्ले़ याःन्दिक् लाम्धेःत्पुङ् के़गाःक्पाहाॽ, हे़क्क्याङ् खुन्छिॽ माङ्हाॽ मे़युङ्बा माङ्हिम्मो खार्मे़न्दक् नु इङ्ले़क् इसेःङ् के़जोःक्पाहाॽ के़रे़क् आङ्गाॽ खुम्दिङ् पिरुङ्सिङ्लो॥” 10 यहवे दाङ्बे़ल्ले़ अक्खेलॽरिक् पाःत्तुरो, “खे़न् ये़न्नो यरुसले़ःम्मोबा ङा लाम्धेःप्पोलाम् पेलि, कुसङ् पाङ्भेॽओलाम् हाःम्लाक्वा नु थे़गु माङ्वाहाॽलाम् पुरुःङ् के़लुःम्बा इक्लान् थाःङ् ले़प्माङ् पेःक्लो॥ 11 “सङ्इङ्दे़न्नो के़युङ्बासे, अःक्ते़म्मे़ॽआङ् हाबे़म्मे़ॽओ, खिनिॽ के़रे़क् के़सङ्बा के़इङ्बाहाॽ मे़मा मे़बेःक्लो, युप्पा इङ्मा सङ्मा याःम्बक् के़जोःक्पाहाॽरे़ खुन्छिॽ मिङ् मारो॥ 12 खे़न् ये़म्मो सेमि हाःन्दुङ्ङाङ् यरुसले़ःम्मिन् कोःत्तुङ्लो, हे़क्क्याङ् निङ्वाॽ याःन्दिक् के़दाबाआङ् के़युङ्बाहाॽ, कुयुःन्दाङ्वा के़दाङ्सिङ्बा चे़ल्ले़क्सेॽ थि हे़क्के के़युङ्बाआङ् ‘यहवे दाङ्बे़ल्ले़ नुबाआङ् मे़जोगुन्ॽ ताप्फे़ःम्बाआङ् मे़जोगुन्’ लॽरिक् निङ्वाॽ के़इःप्पा मनाहाॽ आङ्गाॽ खुम्दिङ् पिरुङ्सिङ्लो॥ 13 खे़ङ्हाॽरे़ खुन्छिॽ याङ्साकुन्धेहाॽ मे़नाप्तुसिरो, खे़ङ्हाॽरे़ खुन्छिॽ हिम्हाॽ मे़लुःन्दुरो॥ खे़ङ्हाॽरे़ हिम्हाॽ मे़जोगुॽ कर खे़प्मो युङ्मा मे़ङ्घोने़न्लो खे़ङ्हाॽरे़ चे़ल्ले़क्सेॽ इक्ताप्हाॽ मे़लेःत्तुरो कर खे़न् लाम्बा चे़ल्ले़क्सेॽ थि थुङ्मा मे़ङ्घोसुन्लो॥” यहवे दाङ्बे़ल्ले़ पयम् यम्बा कुये़न् 14 यहवे दाङ्बे़ल्ले़ पयम् यम्बा कुये़न्निन् चिदुप् वाॽरो, खे़न् निःत्ताङ् नु हाराहारा तार पत्लो॥ खे़प्से़म्मे़ॽ, यहवे दाङ्बे़ल्ले़ कुये़न्नोबा इक्लान् कुजाभे़न्लो, खे़प्मो थक्लिहाङ्हाॽ साॽरिक् यम्बा मे़अःक्लो॥ 15 खे़न् ये़न्निन् सिक्पोःक्मा ये़न्, तुक्खे लाक्खे नु के़साक्पा ये़न्, खाप्पुथ्यःङ् पोङ्मा नु मे़क्मासिमा ये़न्, खामाक्मा नु मुदोखाम्दोबा ये़न्, खाॽमित् नु माक्सिःङ्ग्याःप्पा ये़न्, 16 कब्रिङ् फाक्मनाबा ये़क्यक्हाॽरे़ कुसुक्पोबा चङ्हिम्हाॽरे़ कुदक्ले़ङ्वाओ थुत्थुरिःप्पा नु ते़न्धङ्गे़न् इक्ला लागे़इक्पा ये़न् पोङ्लो॥ 17 आङ्गाॽ मनाहाॽरे़ खुन्छिॽ सम्धाङ् ये़त्तुक्खे तारुङ्लो, हे़क्क्याङ् खे़ङ्हाॽ मिक्फःम्बा हे़क्के लाङ्मे़घेःक्लो, थेआङ्भे़ल्ले़ यहवे दाङ्बे़ल्ले़ कुदक्ले़ङ्वाओ खे़ङ्हाॽरे़ लायो मे़जोगुआङ् मे़वाॽरो॥ आल्ल खुन्छिॽ माक्खिन् च्वाःत् हे़क्के नु खुन्छिॽ हिदुःत् थे़ङाःङ्हाॽ हि हे़क्के से़आङ् ने़रो॥ 18 यहवे दाङ्बे़ल्ले़ कुसाक्के़न् के़बोःक्पा ये़न्नो खे़ङ्हाॽरे़ खुन्छिॽ युप्पाःल्ले़आङ् ताङ्मा मे़सुक्तुसिन्लो साम्म्याङ्ङिल्ले़आङ् से़ःप्मा मे़सुक्तुसिन्लो॥ खुने़ॽ कुनाहे़म्मा मिःल्ले़ काक् इक्सादिङ् खाम्बेःक्मे़न् नु खे़प्मो के़युङ्बाहाॽ थिक्ले़ङ्ले़ नुप्सुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.