जकरिया 9 - लिम्बुइस्राइलरे़ कुनिङ्मिहाॽरे़न् खासे़न् 1 यहवे दाङ्बे़ल्ले़ कुइङ्घङ् अक्तङ्बा वाॽरो— “यहवे दाङ्बे़ल्ले़ कुघासे़न्निन् हद्राक लाजेॽओ वाॽरो, हे़क्क्याङ् खे़न् दमस्कस ये़क्यक्कोओआङ् चुक्लो, थेआङ्भे़ल्ले़ यहवे दाङ्बे़ल्ले़ कुमिक्किन् इस्राइलबा मनाहाॽओ चुक्ते़बा हे़क्के के़रे़क् मनाहाॽओआङ् चुक्ते़आङ् वाॽरो॥ 2 दमस्कसबा इःन्दोओ के़ने़बा हमातओआङ् खे़न् थारो, हे़क्क्याङ् तुरोस नु सिदोनओबा मनाहाॽ के़ले़बा के़निबा मे़जोःक्साङ् खे़न् थारो॥ 3 तुरोसे़ल्ले़ आबाङे कुलागि से़ःप्सिङ्मादे़न् यक् चोगुआङ् ने़रो, खे़ल्ले़ युप्पान् खाम्हिःक् यारिक् नु साम्म्याङ्ङिन् माराम्हाॽओबा ले़क्वा कुइसिक् लुप्सुआङ् युङ्लो॥ 4 कर यहवे दाङ्बे़ल्ले़ खे़ल्ले़ कुयाङ्साकुन्धेन् नाप्तुरो, हे़क्क्याङ् खे़ल्ले़ कुमुक्साम्मिन् वरःङ्ङो मे़क्खु पिरुरो, खे़ब्याङ् मिःल्ले़ खे़न् खाप्पुथ्यःङ् पोङ्लो॥ 5 “अस्कलोनरे़ खे़न् निसुरो हे़क्क्याङ् पगि किरो, मे़न्छुमान् सादुङ्ङिल्ले़ तरुबा हे़क्के गाजान् तुक्खे चारो॥ एक्रोने़न्नाङ् साॽरिक् तुक्खे चामो थारो, थेआङ्भे़ल्ले़ खे़ल्ले़ निङ्साङ् चोगुबान् नुप्लो॥ गाजाबा हाङ्ङिन् खाप्पुथ्यःङ् मे़क्लो, हे़क्क्याङ् अस्कलोनओ याम्मो हाःत्ताङ् मे़युङ्ने़न्लो॥ 6 के़भुत्छिङ्बा सुवाङ्हाॽरे़ अस्दोदे़न् हुक्काप् मे़जोगुरो, हे़क्क्याङ् पलिस्तिहाॽरे़ खुन्छिॽ आङ्दिङ् लॽमे़न् मे़क्खुङ्लो॥ 7 कर आल्ल खुन्छिॽ मुराओबा माक्खिन् नु खुन्छिॽ हाबोॽबाहाॽरे़ कुभिःप्मोबा सिक्के़ले़ःङ्बा पाःन्हाॽ लःत्तुङ्देसुङ्लो॥ खुन्छिॽ के़नम्बा के़याःक्पा मनाहाॽ आमना मे़बोङ्लो हे़क्क्याङ् खे़ङ्हाॽ यहुदाबा थाःक् हे़क्तङ्बा मे़बोङ्लो, खे़ब्याङ् एक्रोने़ङ्ग यबुसिहाॽ कुसिङ्बा पोङ्लो॥ 8 थङ्ङो के़भप्पाहाॽलाम् आहिम्मिन् ताङ्से़ःप्मारे़ लागि खे़न् के़रे़क् पिसाङ् आङ्गाॽ साःङ्गाहिम् चोगुङ्लो॥ आत्तिन् कुॽइगे़भे़म्बाहाॽरे़आङ् आमनाहाॽ याम्मो तुक्खे मे़न्जाःत्तुसिन्लो, थेआङ्भे़ल्ले़ आल्ल खे़ङ्हाॽ आप्फेक् कोसुङ्सिङ्लो॥” ताये़म्मोबा हाङ् 9 यहवे दाङ्बे़ल्ले़ पाःत्तुॽ, “सियाेनरे़ कुस्सा मे़न्छुमाए, साॽरिक् सःत्ते़ॽओ! यरुसले़मरे़ कुस्सा मे़न्छुमाए, खे़ने़ॽ साॽरिक् अःक्ते़ॽओ! ओमे़त्ते़ॽ, खे़ने़ॽ के़हाङ्ङिन् खे़ने़ॽओ तार पत्लो, खुने़ॽग से़न्लप्दाङ्बा नु साम्योबा चोक्लो, खुने़ॽ नःम्नःम्बा चोक् हे़क्क्याङ् अदङ् सम्धाङ् अदङ्ङिल्ले़ कुस्सा लत्छा अदङ्साःत्तिन् युक्तुआङ् तार पत्लो॥ 10 आङ्गाॽ एफ्राइमलाम् अन्लाधाहाॽ खे़त्तुङ्सिङ्लो हे़क्क्याङ् यरुसले़ःम्लाम् थक्सुबा अन्हाॽ तेॽरुङ्सिङ्लो, हे़क्क्याङ् थङ् चोःक्मा लिॽहाॽ फल्लक् फल्लक् ए़क्लो॥ खुने़ॽ मे़न्छाम् सुवाङ्हाॽरे़ लागि नुॽमादामारे़न् उवा चोगुरो, खुने़ॽ कुहाङ्जुम्मिन् थिक् वरःङ्ङोलाम् वेॽ वरःङ् थारिक्, खम्भ्याङ् युफ्रेतिस वहःङ्ङोलाम् योॽबाःल्ले़ कुनुप्मो थारिक् पोङ्लो॥ 11 सियोनए, खे़ने़ॽनु हुप्तुङ्बा माक्खिॽओबा माङ्हुप्पिल्ले़ चोगुल्ले़ मे़दे़म्सु मे़देॽरुसिबा खे़ने़ॽ के़मनाहाॽ आङ्गाॽ च्वाःत् मेःन्नेबा लुम्बाःत्तोलाम् लःत्तुङ्सिङ्लो॥ 12 निङ्साङ् के़जोःक्पा मे़दे़म्सु मे़देॽरुसिबा पुङ्लाधाबासे, खिनिॽ आबाङे से़ःप्सिङ्मादे़न्नो नुःक्खे़म्मे़ॽओ॥ तुक्खे के़ज्ये़ॽइबाल्ले़ चोगुल्ले़ निले़ङ् यारिक् मुॽइसाम् पिनिङ् फाॽआङ् आल्ल खिनिॽ लागि उवा चोगुङ्ल पत्तारो॥ 13 थेआङ्भे़ल्ले़ यहुदान् आङ्गाॽ आलिॽइन् हे़क्के ले़ॽरुङ्लो, हे़क्क्याङ् खे़प्मो आङ्गाॽ एफ्राइम्मिन् तोङ् हे़क्के फत्छुङ्लो॥ सियोनए, आङ्गाॽ खे़ने़ॽ के़स्साहाॽ ग्रिसरे़ कुस्साहाॽरे़ खुन्छिॽ तक्ले़ङ्वाओ हुसुङ्सिङ् पक्खुङ्सिङ्लो, हे़क्क्याङ् खे़ने़ॽ थक्लिहाङ्ङिल्ले़ कुदाभे हे़क्तङ्बा चोःक्ने़रो॥” निङ्वाॽफुमाङ्ङिल्ले़ कुमनाहाॽ याम्मो फोःक्खुसि 14 खे़ब्याङ् यहवे दाङ्बे़न् खे़ङ्हाॽओ ओःन्धाक्सिङ्लो, खुने़ॽ कुदोःङ्हाॽ साःम्भे कुइसिक् ले़क्लो॥ मुक्साम्दाङ्बा यहवे दाङ्बे़ल्ले़ थुत्तुरिःप्पान् मुःत्तुरो, हे़क्क्याङ् यो ले़प्माङ्बा सुरित् केजङ्ङो लाङ्घेःक्ल पेःक्लो॥ 15 मुक्साम्दाङ्बा यहवे दाङ्बे़ल्ले़ खे़ङ्हाॽ ताङ्से़ःप्तुसिरो हे़क्क्याङ् खे़ङ्हाॽरे़ निङ्मिहाॽ खाप्पुथ्यःङ् मे़जोगुसिरो, हे़क्क्याङ् अर्दोओबा लुङ्हाॽरे़ खे़ङ्हाॽ मे़नाःन्दुसिरो॥ खे़ङ्हाॽरे़ सोसोत्लराङ्ङो मे़ज मे़धुङुरो हे़क्क्याङ् मयुसिबा कुइसिक् मे़अःक्लो॥ खे़ङ्हाॽ ले़त्ति तोःम्मादे़न्निल्ले़ कुसुक्पाहाॽओ सामाक्खिॽ साङ्मा छे़ःङ्ग्यान् तिम्बा हे़क्के माक्खिल्ले़ ले़ःक्तुसिरो॥ 16 खे़ल्ले़ याःन्दिक् यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्ङिल्ले़ खे़ङ्हाॽ से़ःप्तुसिरो, थेआङ्भे़ल्ले़ खे़ङ्हाॽ खुने़ॽ कुमनाहाॽरे़ खुन्छिॽ मनासुम्सिरो तिचओबा मुधिङ्लुङ् हे़क्के खे़ङ्हाॽ खुने़ॽ कुलाजेॽओ मे़ले़क्लो॥ 17 खे़ङ्हाॽ साॽरिक् पनुनुबा नु के़घे़म्सिङ्बा मे़बोङ्लो! पोगुगे़न् कुजाःल्ले़ नालिगे़न् थाङ्बे़न्हाॽ के़घे़म्सिङ्बा चोगुसिरो खम्भ्याङ् कुबोक् चे़ल्ले़क्सेॽ थिःल्ले़ मे़न्छ्याहाॽ के़वे़म्मा चोगुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.