जकरिया 8 - लिम्बुयरुसले़ःम्मिन् याम्मो कुसङ् पोङ्ॽ 1 याम्मो मुक्साम्दाङ्बा यहवे दाङ्बे़ल्ले़ कन् कुइङ्घङ्ङिन् आङ्गाॽओ के़रे़॥ 2 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“सियोनरे़ कुलागि आङ्गाॽ साॽरिक् कुनागे़हे़म्बा पोःक्खाङ्ङाङ् वाॽआ॥ आङ्गाॽ खे़न् नाहे़त्तुङ्बाल्ले़ चोगुल्ले़ खे़ल्ले़ कुनिङ्मिहाॽनु आसिक् पोःक्मे़ल्ले़ ओॽआरो॥” 3 यहवे दाङ्बे़ल्ले़ अक्खे पाःत्तुॽ—“आङ्गाॽ नुःङ्ङाआङ् सियोनओ युआ, हे़क्क्याङ् यरुसले़ःम्मो युङ्ङा॥ खे़ब्याङ् यरुसले़ःम्मिन् ‘नसाःन्साबा ये़क्यक्’ मे़मे़त्तुॽ, हे़क्क्याङ् मुक्साम्दाङ्बा यहवे दाङ्बे़ल्ले़ कुगोःक्मान् ‘सेसे कोःक्मा’ मे़मे़त्तुॽ॥ 4 यरुसले़ःम्बा माराम्हाॽओ याम्मो कुदुम्बिप्पा ये़म्बित्छाहाॽ नु मे़न्छुमाहाॽ खुन्छिॽ कुदुम्स्याक् मे़बोङ्बे़ल्ले़ चोगुल्ले़ हुक्को तक्कात् मे़दक्सिङ्ङाङ् मे़युङ्ॽ॥ 5 ये़क्यक्कोबा माराम्हाॽ पाङ्गे़वाबा हिन्जाॽबित्छाॽहाॽरे़ कुले़ःम् मे़धिम्सुॽ॥ 6 खे़न् ये़न्नो कन् मनाहाॽओलाम् के़हिङ्बाहाॽरे़ लागि कन् पाःन्निन् निङ्वाॽ के़माबा पोङ्बिला, कर थे खे़न् आङ्गाॽ आनिमोआङ् निङ्वाॽ के़माबा पोङ्ङाङ्बि?” मुक्साम्दाङ्बा यहवे दाङ्बे़ल्ले़ उवा चोगुॽ॥ 7 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“ओमे़त्ते़ॽ, आङ्गाॽ आमनाहाॽ नाङ्गे़न्बा लाजेॽ नु नाम्धाबा लाजेॽहाॽलाम् ताङ्से़ःप्तुङ्सिङ्ॽ॥ 8 आङ्गाॽ खे़ङ्हाॽ यरुसले़ःम्मो युङ्से़ तारुङ्सिङ्ॽ॥ खे़ङ्हाॽ आङ्गाॽ आमना मे़बोङ्ॽ, हे़क्क्याङ् आङ्गाॽ खे़ङ्हाॽरे़ खुन्छिॽ नसाःन्साबा नु साम्योबा निङ्वाॽफुमाङ् पोङ्ङा॥” 9 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“मुक्साम्दाङ्बा यहवे दाङ्बे़ल्ले़ कुहिम्मिल्ले़ कुबुङ् मे़युक्खुल्ले़ खे़प्मो के़वाॽबा माङ्निङ्वाॽपान् के़बाःप्पाहाॽरे़ ‘माङ्हिम्मिन् चोःक्मा के़सुक्तुम्ल’ फाॽआङ् मे़बाःत्तुबा पाःन्निन् आल्लो कप्मो के़वाॽबाहाॽरे़ के़घे़प्सुम्ल के़वयिॽ॥ 10 थेआङ्भे़ल्ले़ खे़न् ये़म्मिन्नुःल्ले़ तगि मना नु थक्सारे़ लागि नाम्याक् होःप्ते़॥ निङ्मिहाॽरे़ मे़जोगुल्ले़ आत्तिन् मनाहाॽआङ् हाङ्हाङ् लॽरिक् याःम्बक्को पेःक्मा मे़न्छुक्के मे़वये़, थेआङ्भे़ल्ले़ आङ्गाॽ के़रे़क् मनाहाॽ खुन्छिॽ हिम्बेसाङ्बाहाॽरे़ तक्ले़ङ्वाओ फोःक्खुङ्सिङ्ङाङ् मे़वये़॥ 11 कर आल्ल आङ्गाॽ कन् के़हिङ्बा के़याःक्पा मनाहाॽओ तगिबा ये़न्हाॽ कुइसिक् मे़जोक्कान्॥ 12 “खिनिॽ हुक्हाॽ के़धुम्बा पोङ्ल थेआङ्भे़ल्ले़ याॽरिःम्बाहाॽ नुरिक् पोधाङ्, चे़ल्ले़क्सेःल्ले़ कुबुङ्ङो कुजाॽ थोक्, खाम्बाङ्ङिल्ले़ पोगुगे़न् कुजा फत्छुॽ, खम्भ्याङ् ताङ्साङ्बे़ल्ले़ सेःक्वा थासुॽ॥ आङ्गाॽ कन् के़रे़क् पाःन्हाॽ कन् के़हिङ्बा के़याःक्पा मनाहाॽ लक्खोमा युक् पिरुङ्सिङ्ॽ॥ 13 यहुदा नु इस्राइलबा यक्युङ्बासे! आक्खेलॽरिक् मे़न्छाम् सुवाङ्हाॽरे़ खुन्छिॽ लुम्मो खिनिॽ माङ्दे साङ्ग्रा चाहाक् के़बोःक्खिआङ् वये़, खे़ल्ले़चोगुल्ले़ आङ्गाॽ खिनिॽ ताङ्से़ःप्निङ्ॽ हे़क्क्याङ् खिनिॽ हाङ्वागे़न् मुॽइसाम्रे़ कुबुङ् के़बोःक्खिॽ॥ “खिनिॽ मे़गिसे़म्मिन्ने़ॽ, कर खिनिॽ हुक्हाॽ के़धुम्बा पोङ्ल॥” 14 थेआङ्भे़ल्ले़ मुक्साम्दाङ्बा यहवे दाङ्बाल्ले़ अक्खे पाःत्तुॽ—“आक्खेलॽरिक् खे़निॽ पाधे़बाहाॽरे़ आङ्गाॽ आसिक् मे़भोःक्खुल्ले़ खे़ङ्हाॽओ ये़त्तुक्खे ताःप्मा निःन्धो चोगुङ्ङाङ् वये़ हे़क्क्याङ् आङ्गाॽ आनिङ्वाॽ मे़लोरे़न्॥ 15 हे़क्केलॽरिक्के आल्ल यरुसले़ःम्मो नु यहुदाओ याम्मो नुॽमादामा चोःक्मारे़ लागि आङ्गाॽ निङ्वाॽ निःन्धो चोगुङ्ङाङ् वाॽ॥ खिनिॽ मे़गिसे़म्मिन्ने़ॽ॥ 16 खिनिॽ चोःक्मा के़बोङ्बा याःम्बक्हाॽ हाबा कन्हाॽएरो—थिक्नु वेॽ कुजे़क्पा पान् पारे़म्मे़ॽ, हे़क्क्याङ् खिनिॽ खासे़न्लोम्मा हिम्मो से़क्खा नु कुदोःप्मा खासे़न् चोगे़म्मे़ॽ॥ 17 कर खिनिॽ आबाङे हिम्बेसाङ्बे़ल्ले़ कुदक्ले़ङ्वाओ ताप्फे़ःम्बा चे़म्भन् मे़जोगे़म्मिन्ने़ॽ, हे़क्क्याङ् इङ्ले़क्पा माङ्हे़क् चोःक्मा निङ्वाॽ मे़जोगे़म्मिन्ने़ॽ॥ आङ्गाॽ कन् के़रे़क् पाःन्हाॽ चिःत्तुङ्ॽ,” मुक्साम्दाङ्बा यहवे दाङ्बे़ल्ले़ उवा चोगुॽ॥ 18 याम्मो मुक्साम्दाङ्बा यहवे दाङ्बे़ल्ले़ कन् कुइङ्घङ्ङिन् आङ्गाॽओ के़रे़॥ 19 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“लिसिगेक्पा, ङासिगेक्पा, नुसिगेक्पा नु थिबोङ्गेक्पा लाओ तःक्ने़त् युङ्मारे़ कुले़क्वा यहुदाबा मनाहाॽ मे़सःत्ल, खुन्छिॽ निङ्वाॽ तार हे़क्क्याङ् ये़ये़ मे़लॽर॥ हे़क्क्याङ् खे़ङ्हाॽरे़ से़क्खा नु सनारुङ् निङ्वाॽ मे़इःत्तुर॥” 20 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“यरिक् ये़क्यक्कोबा यक्युङ्बाहाॽ नु यरिक् मनाहाॽ आल्लसाङ् मे़दारो, 21 हे़क्क्याङ् लत्छा ये़क्यक्कोबा मनाहाॽ वेॽ ये़क्यक्को अक्खे मे़लॽर मे़बेक्, ‘मुॽइसाम् नाःक्से़ खिमो यहवे दाङ्बाओ पेगि हे़क्क्याङ् मुक्साम्दाङ्बा यहवे दाङ्बे़न् कोःत्तुम्॥ आङ्गाॽ आप्फेक्काङ् पेःक्का॥’ 22 यरिक् मुक्साम्साबा मे़न्छाम् सुवाङ्हाॽ नु मे़न्छाम् याप्मिहाॽ मुक्साम्दाङ्बा यहवे दाङ्बे़न् कोःत्छे़ नु मुॽइसाम् नाःक्से़ यरुसले़ःम्मो मे़दारो॥” 23 मुक्साम्दाङ्बा यहवे दाङ्बे़ल्ले़ अक्खे पाःत्तुॽ—“खे़न् ये़न्नो के़रे़क् मे़न्छाम् सुवाङ्हाॽलाम् नु के़रे़क् पाःन्दाङ् के़बाःप्पाहाॽओलाम् थिबोङ् मनारे़ लत्छा यहुदिन् कुदेःत् फे़राओ मे़दे़म्सुआङ् अक्खे मे़मे़त्तुॽ, ‘आनिगे खे़ने़ॽनु सोरिक् पेगिगे़, थेआङ्भे़ल्ले़ निङ्वाॽफुमाङ्ङिन् खे़ने़ॽनु वाॽ फाॽआङ् आनिगे खे़प्सुम्बे़आङ् वयिगे़रो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.