जकरिया 7 - लिम्बुतःक्ने़त् युङ्मा मेःन्, खासे़न् नु लुङ्मा तुक्मा 1 दारा हाङ्ङिल्ले़ हाङ्युक् चोगुबा लिसिगेक्पा तङ्बे किसलेब ला इग्र फाङ्सिगेक्पा लाःल्ले़ लिसिगेक्पा ये़न्नो यहवे दाङ्बे़ल्ले़ कन् कुइङ्घङ्ङिन् जकरियाओ के़रे़॥ 2 बेथेलबा मनाहाॽरे़ सरेसेर नु रेगेम-मेलेक्के़न् हे़क्क्याङ् खे़ङ्हाॽरे़ खुन्छिॽ मनाहाॽ यहवे दाङ्बाओ कम्भलॽरिक् मुॽइसाम्ले़ लागि पेलि फाक्से़ मे़बाङ्घुसिआङ् वये़, 3 हे़क्केलॽरिक् मुक्साम्दाङ्बा यहवे दाङ्बे़ल्ले़ कुहिम्मोबा निङ्वाॽफुसाम्बाहाॽ नु माङ्निङ्वाॽपान् के़बाःप्पाहाॽ अक्खे मे़मे़त्तुसिआङ् से़ःन्मे़लाप्तुसि, “माङ्हिम्मिन् मे़यन्छु मे़देसुबाल्ले़ चोगुल्ले़ यरिक् तङ्बे तगिआङ्धो चोगुम् युरुम्बे़बा हे़क्के थे ङासिगेक्पा लाओ आनिगे मे़रिङ् थक्मा नु तःक्ने़त् युङ्मा पोङ्बि?” 4 हे़क्क्याङ् मुक्साम्दाङ्बा यहवे दाङ्बे़ल्ले़ कुइङ्घङ्ङिन् आङ्गाॽओ के़रे़— 5 “लाजेॽओबा के़रे़क् मनाहाॽ नु निङ्वाॽफुसाम्बाहाॽ अक्खेलॽरिक् सेःन्दोसे़म्सिम्मे़ॽ, ‘खिनिॽ खे़न् नुबोङ् तङ्बे थारिक् ङासिगेक्पा नु नुसिगेक्पा लाओ तःक्ने़त् के़युङिआङ् मे़रिङ् के़धक्तिल्ले़, थे खे़न् आङ्गाॽ आमिङ्ङिल्ले़ लागिए तःक्ने़त् के़युङिआङ् वये़बि? 6 हे़क्क्याङ् आल्ल खिनिॽ के़जाम् के़धुङुम्माङ् के़वयिल्ले़ थे खे़न् खिनिॽ आप्फेक् लागि के़जाम् के़धुङुम्माङ् के़न्वयिन्बि? 7 यरुसले़म नु खे़न् के़रे़क् पिसाङ्बा पाङ्जुम्हाॽओ चिजि ये़म्ये़म् नु नुॽमादामा पोःक्खे़आङ् वये़ हे़क्क्याङ् नेगेव नु नाम्धा पिसाङ् थे़गुगुबादे़न्हाॽओ चिजि ये़म्ये़म् पोःक्खे़आङ् वये़बा तगिबा माङ्निङ्वाॽपान् के़बाःप्पाहाॽलाम् इङ्भन् पोःक्खे़बा यहवे दाङ्बे़ल्ले़ कुइङ्घङ्ङिन् हाबा कन् वये़रो॥’” 8 हे़क्क्याङ् जकरियाओ यहवे दाङ्बे़ल्ले़ कन् कुइङ्घङ्ङिन् याम्मो के़रे़— 9 “मुक्साम्दाङ्बा यहवे दाङ्बे़ल्ले़ अक्खे पाःत्तुॽ, ‘कुदोःप्मा खासे़न् लोःन्दे़म्मे़ॽ थिक्ले़ वेॽइन् लुङ्माॽ तुक्ते़म्मे़ॽआङ् नुरिक् मे़त्ते़म्मे़ॽ॥ 10 कुये़म्बा के़सिमा मेमेदुमाहाॽ नु ये़त्छा होॽदोःक्हाॽ, वेॽ लाजेॽबा इग्र याङ्गे़साॽबाहाॽ तुक्खे मे़जाःत्ताम्सिम्मिन्ने़ॽ॥ खिनिॽ निङ्वाॽओ थिक्नु वेॽ ताप्फे़ःम्बा मे़इःत्तासिम्मे़न्ने़ॽ॥’ 11 “कर खे़ङ्हाॽरे़ सिङ्सिङ् ये़क्ये़क्काङ् खे़म्मा मे़न्दे़न्दे़न्, खे़ङ्हाॽ आधिङ्गानि मे़बोःक्खे़आङ् खुन्छिॽ एःक्किन् मे़हिसु हे़क्क्याङ् खुन्छिॽ ने़भाक्हाॽ मे़हुॽरु॥ 12 मुक्साम्दाङ्बा यहवे दाङ्बे़ल्ले़ कुयाम्साम्मोलाम् तगि तगिबा माङ्निङ्वाॽपान् के़बाःप्पाहाॽलाम् पिरुसिबा साम्योथिम्मिन् नु इङ्घङ्ङिन् खे़म्मा खे़ङ्हाॽ मे़न्दे़न्दे़न्, हे़क्क्याङ् खे़ङ्हाॽरे़ खुन्छिॽ निङ्वान् लुङ्से़रुङ्बा कुइसिक् के़साःक्पा मे़जोगु॥ कल्ले़चोगुल्ले़ मुक्साम्दाङ्बा यहवे दाङ्बे़न् साॽरिक् कुयाःक्ले़ॽरे़॥ 13 “‘आङ्गाॽ खे़ङ्हाॽ उःत्तुङसिङ्ङिल्ले़ आक्खेलॽरिक् खे़ङ्हाॽरे़ मे़ङ्घे़प्सुन्, हे़क्केलॽरिक्के खे़ङ्हाॽरे़ आङ्गाॽ मे़उःत्ताआङ् पेलि मे़भाक्काल्ले़ खे़म्घे़म् मे़लाप्पान्,’ मुक्साम्दाङ्बा यहवे दाङ्बे़ल्ले़ पाःत्तुॽ॥ 14 ‘खे़ङ्हाॽ वेॽ लाजेॽबा मे़बोःक्खे़आङ् मे़युङे़बा मे़न्छाम् सुवाङ्हाॽरे़ खुन्छिॽ लुम्मो सुरित् केजङ्ङिल्ले़ फे़सुसिबा कुइसिक् आङ्गाॽ फुत्छिङ्ज्याङ् चोगुङ्सिङ्॥ आत्तिन्हाॽआङ् तामा पेःक्मा मे़न्छुक्ते़न्ल थारिक् खे़ङ्हाॽरे़ खुन्छिॽ लाजेन् चिजि खक्खक् पोःक्खे़॥ कम्भलॽरिक् खे़ङ्हाॽरे़ खे़न् नुबा लाजेन् चिजि खक्खक्पा मे़जोगुरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.