जकरिया 6 - लिम्बुलिसि अन्लाधाहाॽ 1 याम्मो आङ्गाॽ थाःङ् ओमे़त्तुङ्, हे़क्क्याङ् आङ्गाॽ आदगि ने़त्छि कोःक्माहाॽरे़ कुलुम्मोलाम् लिसि अन्लाधाहाॽ मे़ये़बा निसुङ्सिङ्॥ खे़न् कासाबा कोःक्मा फाङ्जङ् थे़गु माङ्वा चोगे़॥ 2 थिक्सिगेक्पा अन्लाधाओ हे़ःत्के़लॽबा अन्हाॽ, निसिगेक्पा अन्लाधाओ माक्के़लॽबा अन्हाॽ, 3 सुम्सिगेक्पा अन्लाधाओ फगे़लॽबा अन्हाॽ नु लिसिगेक्पा अन्लाधाओ हे़ःत्यङ्यङ्बा अन्हाॽ मे़यागे़, खे़ङ्हाॽ के़रे़क् के़धुम्बा मे़जोगे़॥ 4 आङ्गाॽनु के़बाःप्पा खे़न् माङ्लाइङ्बे़न् सेःन्दोसुङ्, “आदाङ्बे, कन्हाॽ थेसिबे?” 5 खे़न् माङ्लाइङ्बे़ल्ले़ नुगप् पिराङ्ङाङ् आङ्गाॽ मे़त्ताङ्, “कन्हाॽ साङ्ग्राम्पेदाङ्बा के़रे़क् पिसाङ् के़बेःक्पा लिसि सुरित् कजङ्सिरो, खे़ङ्हाॽ काक् इक्सादिङ् खाम्बेःक्मोबा दाङ्बे़ल्ले़ कुदगिलाम् मे़ये़म्सिङ्ङाङ् एगाङ् मे़लःन्दे़ मे़ये़बारो॥ 6 माक्के़लॽबा अन्हाॽ के़याक्पा अन्लाधान् थाङ्गे़त् पिसाङ् पेक्, फगे़लॽबा अन्हाॽ के़याक्पा अन्लाधान् नाम्धा ले़प्माङ् पेक्, हे़क्क्याङ् हे़ःत्यङ्यङ्बा अन्हाॽ के़याक्पा अन्लाधान् लाङ्गे़त् पिसाङ् पेक्॥” 7 आल्ल के़धुम्बा अन्हाॽ लाःक्कात् मे़लःन्दे़ल्ले़ खे़ङ्हाॽ के़रे़क् पिसाङ् के़प्मारे़ लागि मे़साःम्सिङ्ल मे़वये़॥ माङ्लाइङ्बे़ल्ले़ खे़ङ्हाॽ मे़त्तुसि, “इक्सादिङ् खाम्बेःक्मोबा के़रे़क् पिसाङ् पेगे़म्मे़ॽ॥” हे़क्क्याङ् खे़ङ्हाॽ इक्सादिङ् खाम्बेःक्मोबा के़रे़क् पिसाङ् मे़बे॥ 8 खम्भ्याङ् माङ्लाइङ्बे़ल्ले़ अःक्ते़आङ् आङ्गाॽ मे़त्ताङ्, “ओमे़त्ते़ॽ, खे़न् थाङ्गे़त् ले़प्माङ् के़बेःक्पाहाॽरे़ यहवे दाङ्बे़ल्ले़ कुयाम्साम्मिन् खे़प्मो नाःम्सिङ्मा मे़बिरुआङ् वाॽरो॥” यहोसुन् तिच खुःक्मा इङ्जाङ् 9 यहवे दाङ्बे़ल्ले़ कन् कुइङ्घङ्ङिन् आङ्गाॽओ के़रे़— 10 “लाजेॽलाम् लाःक्कात् बेबिलोन मे़लःत्तु मे़देसुसिबालाम् के़भे़म्बाहाॽ हेल्दै, तोबियाह नु यदायाहलाम् हुक्सोयाङ् ताःक्ते़ॽ॥ आम्भा खे़न् ये़न्नो सपन्याहरे़ कुस्सा योसियाहःल्ले़ कुहिम्मो पेगे़ॽ॥ 11 खे़ङ्हाॽलाम् साम्म्याङ् नु युप्पा ताःक्ते़ॽआङ् लत्छा तिच चोगे़ॽ, हे़क्क्याङ् यहोसादाक्के़ल्ले़ कुस्सा तुम् निङ्वाॽफुसाम्बा यहोसुःल्ले़ कुधे़गेःक्को खे़न् तिचःन् खुःक्ते़ॽ॥ 12 मुक्साम्दाङ्बा यहवे दाङ्बे़ल्ले़ अक्खे पाःत्तुॽ फाॽआङ् खे़न् मे़त्ते़ॽ—‘ओमे़त्ते़ॽ, कन् मनाःल्ले़ कुमिङ्ग पोराःक्लो, खे़न् आप्फेक् कुयुक्नादे़न्नो पोआङ् यहवे दाङ्बे़ल्ले़ कुहिम्मिन् चोगुॽ॥ 13 आम्भा खुने़ॽए यहवे दाङ्बे़ल्ले़ कुहिम्मिन् चोगुॽ, हे़क्क्याङ् खुने़ॽ हाङ् मिङ्सो इङ्धाङ् खोसुॽ हे़क्क्याङ् खुने़ॽ कुहाङ्युक्नाओ युङ्ङाङ् हाङ्युक् चोगुॽ, खम्भ्याङ् खे़न् हाङ्युक्नाःल्ले़ कुबेसाङ् निङ्वाॽफुसाम्बा थिक् पोङ्ॽ॥ हे़क्क्याङ् खे़न् ने़प्फुरे़ खुन्छिॽ लुम्मो नादङ् पोङ्ॽ॥’ 14 हेल्दै, तोबियाह, यदायाह नु सपन्याहरे़ कुस्सा हेनरे़ खुन्छिॽ निङ्वाॽसोक्ले़ लागि यहवे दाङ्बे़ल्ले़ कुहिम्मो खे़न् तिचःन् मे़ने़स्सु॥” 15 खे़न् माःङ्घा माःङ्घा के़युङ्बाहाॽ मे़दाआङ् यहवे दाङ्बे़ल्ले़ कुहिम्मिन् चोःक्मा मे़भाॽरुसिॽ, हे़क्क्याङ् मुक्साम्दाङ्बा यहवे दाङ्बे़ल्ले़ आङ्गाॽ खिनिॽओ पाङ्घाङ्बा फाॽआङ् कुसिङ् के़निःत्तुम्ॽ॥ खिनिॽ निङ्वाॽ के़बिरुम्माङ् यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्हाॽ के़इःत्तुम् के़नाःत्तुम्ने़भग्र कन् पाःन्हाॽ पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.