जकरिया 5 - लिम्बुके़बे़बार के़बप्पा साप्लाथङ्मा सुफो 1 खे़ब्याङ् आङ्गाॽ याम्मो ओमे़त्तुङ्, हे़क्क्याङ् आङ्गाॽ आदगि के़बे़बार के़बप्पा लत्छा साप्लाथङ्माधिक् पत्छे़॥ 2 खुने़ॽ सेःन्दोसाङ्, “खे़ने़ॽ थे के़निसुर के़बत्?” आङ्गाॽ नुगप् पिरुङ्, “निबोङ् हुक्सिक् केःम्बा कुलाम्ति नु थिबोङ् हुक्सिक् कुभे़रे़बा के़बे़बार के़बप्पा साप्लाथङ्माधिक् आङ्गाॽ निसुङ्ॽ॥” 3 खे़ब्याङ् खुने़ॽ आङ्गाॽ मे़त्ताङ्, “कन् साप्लाथःङ्मो लाजेॽओ के़रे़क् थामा के़इःप्पा साक्मुरा माङ्देन् पत्, थेआङ्भे़ल्ले़ कल्ले़ थिक्नाहाङ् पिसाङ् पाःत्तुबा कुइसिक् के़रे़क् खुःन्द्रिक्पाहाॽ लाजेॽलाम् लाःक्कात् मे़लःत्तुसिॽ, हे़क्क्याङ् वेॽ ले़प्माङ् पाःत्तुबा कुइसिक् इङ्ले़क् माङ्गे़हे़क्सिङ्बाहाॽ खक्पे़त् लाजेॽलाम् लाःक्कात् मे़लःत्तुसिॽ॥ 4 मुक्साम्दाङ्बा यहवे दाङ्बे़ल्ले़ उवा चोगुॽ, ‘आङ्गाॽ साक्मुरा माङ्दे पाङ्घुङ् तासुङ्ङाङ् वाॽ, हे़क्क्याङ् के़रे़क् खुःन्द्रिक्पाहाॽरे़ खुन्छिॽ हिम्मो नु आमिङ्ङो इङ्ले़क् माङ्गे़हे़क्सिङ्बाहाॽरे़ खुन्छिॽ हिम्मो खे़न् लाःत्, खम्भ्याङ् हिम्मो खे़न् याक् हे़क्क्याङ् खे़ल्ले़ खे़प्मोबा सिङ् नु लुङ्हाॽ ने़प्माङ् खाप्पुथ्यःङ् चोगुदेसुरो॥’” साप्पोओ लत्छा मे़न्छुमा यागे़बा सुफो 5 खे़ब्याङ् आङ्गाॽनु ताॽगे़जे़ङ्बा माङ्लाइङ्बे़न् तगि फे़रे़आङ् मे़त्ताङ्, “थो ओमे़त्ते़ॽ, खे़प्मो थे़माइ निधाःप्ल पत्॥” 6 खे़ब्याङ् आङ्गाॽ सेःन्दोसुङ्, “खे़न् थेबे?” हे़क्क्याङ् खुने़ॽ नुगप् पिराङ्, “खे़ङ्ग लत्छा कुसिःक्मा साप्पोरो॥ लाजेॽ के़रे़क् के़वाॽबा मनाहाॽरे़ खुन्छिॽ फे़न्याःम्बक्किन् हाबा कन्लो॥” 7 खिमो माक्लुम्बा कुसुःप्नाःन् थाःङ् हल्ले़क् मे़हन्दु, हे़क्क्याङ् साप्पोओ मे़न्छुमाधिक् युङे़गरे़बा निसुङ्॥ 8 हे़क्क्याङ् माङ्लाइङ्बे़ल्ले़ पाःत्तु, “कन् फे़न्याःम्बक्किन् हाबा कन्लो॥” खे़ब्याङ् खुने़ॽ खे़न् मे़न्छुमान् साप्पोओ याङ्यो इःन्दु केःत्तु, हे़क्क्याङ् माक्लुम्बा कुसुःप्माल्ले़ साप्पोःल्ले़ कुम्ब्राःन् सुःप्तु॥ 9 खे़ब्याङ् आङ्गाॽ थाःङ् वरे़क् ओमे़त्तुङ्, हे़क्क्याङ् मे़न्छुमा ने़त्छि ये़सिर पत्छे़सिबा निसुङ्सिङ्, हे़क्क्याङ् खुन्छिॽ लाप्पो सुरित् केजङ्ने पत्छे़॥ खुन्छिॽ लाप्हाॽ लिलिवाःल्ले़ कुलाप् हे़क्तङ्बाने पत्छे़, हे़क्क्याङ् खे़न् ने़प्फु मे़न्छुमाहाॽरे़ खे़न् साप्पोन् इक्सादिङ् खाम्बेःक्मान् नु ताङ्साङ्बे़ल्ले़ कुलुम्मो पक्खे़ तेॽरे़सु॥ 10 खे़ब्याङ् आङ्गाॽनु ताॽगे़जे़ङ्बा माङ्लाइङ्बे़न् सेःन्दोसुङ्, “कन् ने़प्फुरे़ साप्पोन् आत्ति तेॽसुर पत्छिबाबे?” 11 खे़ल्ले़ आङ्गाॽ नुगप् पिराङ्, “खे़ल्ले़ कुलागि लत्छा माङ्हिम् चोःक्से़ बेबिलोन लाजेॽओ तेॽसुर पत्छि॥ आल्ल खे़न् माङ्हिम्मिन् चोःक्मा चुःत्ताङ् खे़न् साप्पोन् हाबा खे़ल्ले़ कुयुक्नाओए युङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.