जकरिया 4 - लिम्बुछक्कङ् नु ने़त्छि चैतुन सिङ्बुङ् 1 खे़ब्याङ् कुभा मनान् मिक्युमोलाम् तादाप् लॽरिक् फोःङ्मनाबा हे़क्के आङ्गाॽनु के़बाःप्पा खे़न् माङ्लाइङ्बे़न् याम्मो त्ये़आङ् सोसाङ्॥ 2 खुने़ॽ सेःन्दोसाङ्, “खे़ने़ॽ थेःन् के़निसु?” आङ्गाॽ नुगप् पिरुङ्, “कुसम्मो निःङ्गेॽ युङ्मा लत्छा यम्बा खोर्या के़बप्पा साम्म्याङ् इसेःङ्बा छक्कङ् थिक् निसुङ्ॽ॥ खे़ल्ले़ कुसम्मो नुसि सेमिहाॽ पत्, हे़क्क्याङ् कुसम्मो के़बप्पा सेमि थप्मे नुसि तःङ्ग्रे फम्मा चक्सिङ्ङाङ् पत्॥ 3 सेमि हाःम्मा छक्कङ्ङिल्ले़ कुबेसाङ् चैतुन सिङ्बुङ् ने़त्छिआङ् युङ्ॽ, खोर्याःल्ले़ कुजुप्साङ् ले़प्माङ् लत्छा नु वेॽइन् कुभे़न्छाङ् ले़प्माङ् युङ्ॽ॥” 4 खे़ब्याङ् आङ्गाॽनु के़बाःप्पा खे़न् माङ्लाइङ्बे़न् सेःन्दोसुङ्, “आदाङ्बे, कन्हाॽ थे़माबे?” 5 खुने़ॽ नुगप् पिराङ्, “कन्हाॽ थे़मा फाॽआङ् कुसिङ् के़न्निःत्तुन्बि?” आङ्गाॽ नुगप् पिरुङ्, “आँहाॽ, आङ्गाॽ कुसिङ् मे़निःत्तान् आदाङ्बे॥” 6 कल्ले़चोगुल्ले़ खुने़ॽ मे़त्ताङ्, “यरुबाबेलरे़ कुलागि यहवे दाङ्बे़ल्ले़ कुबाःन्जाक् कन् वाॽ—‘थुम्मे़ल्ले़आङ् मेःन् मुक्साम्मिल्ले़आङ् मेःन्, कर आङ्गाॽ आयाम्साम्मिल्ले़,’ मुक्साम्दाङ्बा यहवे दाङ्बे़ल्ले़ पाःत्तुॽ॥ 7 कोःक्मा फाङ्जङ् थे़गु माङ्वा हे़क्तङ्बा पयम् यम्बा याप्मि के़हम्बा पाःन्हाॽ थे़माआङ्बे? यरुबाबेलरे़ कुदगि खे़ने़ॽ ले़प्पे़प्पा के़बोङ्ॽ॥ हे़क्क्याङ् मनाहाॽ मे़सःत्ताङ् ‘निङ्वाॽफुमाङ्ङिल्ले़ कन् हाङ्वागे़न् मुॽइसाम् पिरुर, हाङ्वागे़न् मुॽइसाम् पिरुर!’” तियाहा मे़लॽर मे़अःक्किल्ले़ खुने़ॽ कुम्मालुङ्ङिन् युक्खुॽ॥ 8 खे़ब्याङ् यहवे दाङ्बे़ल्ले़ कुइङ्घङ्ङिन् आङ्गाॽओ के़रे़— 9 “कन् माङ्हिम्मिल्ले़ कुयुक्नान् यरुबाबेलरे़ कुहुक्किल्ले़ युक्खुआङ् युङ्ॽ, खुने़ॽ कुहुक्किल्ले़ खे़न् चोगु सुरुॽ॥” खे़ब्याङ् मुक्साम्दाङ्बा यहवे दाङ्बे़ल्ले़ आङ्गाॽ पाङ्घाङ्बा फाॽआङ् खे़ने़ॽ निङ्वाॽ के़घोसुॽ॥ 10 माङ्हिम् चोःक्मा याःम्बक्किन् चबे़ःत्छिक्लक् पोङ्ङिल्ले़ मनाहाॽ खुन्छिॽ सिक्खे़ङ् कर यरुबाबेलरे़ कुहुक्को कुसिःक्मा खिःन् मे़निसुल्ले़ खे़ङ्हाॽ मे़सःत्॥ माङ्लाइङ्बे़ल्ले़ मे़त्ताङ्, “कन् नुसि सेमिहाॽ यहवे दाङ्बे़ल्ले़ कुमिक्लो, खे़न् मिक्हाॽरे़ के़रे़क् इक्सादिङ् खाम्बेःक्मो ओमे़मे़त्तुआङ् पत्लो॥” 11 खे़ब्याङ् आङ्गाॽ माङ्लाइङ्बे़न् सेःन्दोसुङ्, “कन् सेमियुङ्दे़न् छक्कङ्ङिल्ले़ चुक्वा नु फे़ङ्वा ले़प्माङ् के़युङ्बा कन् ने़त्छि चैतुन सिङ्बुङ्हाॽ थेबे?” 12 याम्मो खुने़ॽ सेःन्दोसुङ्, “ने़त्छि साम्म्याङ् कुहोःन्द्रालाम् निःङ्गेॽ के़बेःक्पा ने़त्छि चैतुने़ल्ले़ कुबोराक्हाॽरे़ कुबे थेग?” 13 खुने़ॽ नुगप् पिराङ्, “कन्हाॽ थेबे फाॽआङ् खे़ने़ॽ कुसिङ् के़न्नितुम्बि?” आङ्गाॽ मे़त्तुङ्, “आँहाॽ, कुसिङ् मे़निःत्तान्, आदाङ्बे॥” 14 खे़म्ब्याङ् खुने़ॽ मे़त्ताङ्, “कन् ने़त्छिग के़रे़क् इक्सादिङ् खाम्बेःक्मोबा यहवे दाङ्बे़ल्ले़ कुमाङ्सेवा याःम्बक् चोःक्मारे़ लागि माङ्थोःक्ना के़बोङ्बासिरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.