जकरिया 3 - लिम्बुतुम् निङ्वाॽफुसाम्बे़न् निधाबे़बा सुफो 1 खे़ब्याङ् माङ्लाइङ्बे़ल्ले़ तुम् निङ्वाॽफुसाम्बा यहोसुन् यहवे दाङ्बे़ल्ले़ कुमाङ्लाइङ्बाल्ले़ कुदगि ये़बे़गरे़बा ओःन्धाक्ताङ्॥ यहोसुन् अप्मारे़ लागि माङ्लाइङ्बाल्ले़ कुजुक्वा ले़प्माङ् माफे़न्साम्मिन् ये़बे़गरे़॥ 2 यहवे दाङ्बे़ल्ले़ माफे़न्साम्मिन् मे़त्तु, “माफे़न्साम्मे, यरुसले़ःम्मिन् के़सेःक्पा यहवे दाङ्बे़ल्ले़ खे़ने़ॽ के़भे़ःक्लरो! थे कन् मनान् मिओलाम् लःप्मनाबा मिधक्पु मेःन्नाङ्बि?” 3 आल्ल यहोसुन् मक्वाॽ इसेःङ्बा चाङ् चाक्खुआङ् माङ्लाइङ्बे़ल्ले़ कुदगि ये़बे़गरे़॥ 4 खे़ब्याङ् खे़न् माङ्लाइङ्बे़ल्ले़ खुने़ॽ कुदगि के़ये़प्पाहाॽ मे़त्तुसि, “कन् मनाःल्ले़ मक्वा इसेःङ्बा कुजाङ्ङिन् फे़न्दे़म् पिरे़म्मे़ॽ॥” खम्भ्याङ् खे़ल्ले़ यहोसुन् मे़त्तु, “ओमे़त्ते़ॽ, आङ्गाॽ खे़ने़ॽ के़लायोन् खे़त्तुङ् पिने़आङ् वाॽ हे़क्क्याङ् आङ्गाॽ खे़ने़ॽ इमे़ल्लुङ्बा चाङ्हाॽ चाक्ने़आङ् वाॽ॥” 5 खे़ब्याङ् आङ्गाॽ मे़त्तुङ्, “यहोसुःल्ले़ कुधे़गेःक्पो सुत्थो पागारि खुःक्ते़म्मे़ॽ॥” कल्ले़चोगुल्ले़ खे़ङ्हाॽरे़ खुने़ॽ लत्छा सुत्थो पागारि मे़घुःक्तुआङ् चाङ् मे़जाक्तु, हे़क्क्याङ् यहवे दाङ्बे़ल्ले़ कुमाङ्लाइङ्बे़न् निःत्ताङ् ये़बे़गरे़॥ 6 खे़ब्याङ् यहवे दाङ्बे़ल्ले़ कुमाङ्लाइङ्बाल्ले़ यहोसुन् कन् इङ्जाङ्ङिन् पिरु— 7 “मुक्साम्दाङ्बा यहवे दाङ्बे़ल्ले़ अक्खे पाःत्तुॽ, ‘खे़ने़ॽ आङ्गाॽ आलाम्मो लाङ्गे़घेःक् हे़क्क्याङ् खे़ने़ॽ चोःक्मा के़बोङ्बा याःम्बक्हाॽ के़जोगुने़भग्र, खे़ने़ॽ आङ्गाॽ आहिम् ओगे़मे़प्पा नु आङ्गाॽ आलक्खुम्मिन् कम्ब्राङ् के़मे़प्पा के़बोङ्ॽ, हे़क्क्याङ् कप्मो कन् के़ये़प्पाहाॽरे़ खुन्छिॽ लुम्मो आङ्गाॽ खे़ने़ॽ लत्छा ताक्फा पिने़रो॥ 8 “‘तुम् निङ्वाॽफुसाम्बा यहोसुए! खे़ने़ॽ नु के़दगि के़युङ्बा के़न्देःङ्बाहाॽए ताःन्दिबा मिक्सेःन्निङ्लो॥ कुबोराक् मे़प्मनाबा आसे़वारोबे़न् आङ्गाॽ तारुङ्लो॥ 9 ओमे़त्ते़म्मे़ॽ, यहोसुःल्ले़ कुदगि आङ्गाॽ ये़प्सुङ्बा लुङ्ङिन्! खे़प्मो नुसि कुमिक् पत्, हे़क्क्याङ् खे़प्मो आङ्गाॽए कुभा सक्सेॽहाॽ लक्तुङ्ॽ, खम्भ्याङ् थिक्याःन्ले़ कन् लाजेॽओबा लायोन् खे़त्तुङ्देसुङ्ॽ॥ 10 खे़ल्ले़ याःन्दिक् खिनिॽ के़रे़क्ले़ खिनिॽ हिम्बेसाङ्बे़न् चे़ल्ले़क्सेॽ इक्ताप् सिगाङ् नु पःत्छेल्ले़ कुबुङ् सिगाङ् युङ्मारे़ लागि के़उःत्तुम्ॽ,’ मुक्साम्दाङ्बा यहवे दाङ्बे़ल्ले़ पाःत्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.