जकरिया 11 - लिम्बु1 ले़बनानए, खे़ने़ॽ के़लाम्धेःप्पाहाॽ हन्दे़ॽओ, हे़क्केलॽरिक् मिःल्ले़ के़साम्माङ्सिङ्हाॽ थ्यःङ् चोगुररो! 2 आङ् सिङ्बुङ्से, मे़रिङ् थक्ते़म्मे़ॽओ, थेआङ्भे़ल्ले़ साम्माङ्सिङ्ङिन् चोःन्दे़आङ् ने़रो, हे़क्क्याङ् केःम्बा नु नुबा सिङ्बुङ्हाॽ मे़गे़आङ् युङ्लो॥ बासानबा यहिबा सिङ्बुङ्से, मे़रिङ् थक्ते़म्मे़ॽओ! थेआङ्भे़ल्ले़ तुम्भुङ्ला ताम्भुङ्हाॽ मे़ले़ःक्खुआङ् ने़रो॥ 3 मे़ल्लुक्कम्बाहाॽ मे़रिङ् मे़धक्पान् खे़प्से़म्मे़ॽओ, खुन्छिॽ पनुनुबा थक्सा चाराम्मादे़न्निन् मे़मे़क्खुआङ् ने़रो! खिरिङ्बाहाॽ मे़हुःक्पे़न् खिनिॽ खे़प्से़म्मे़ॽओ, थेआङ्भे़ल्ले़ यर्दनबा सरेःक्याःप्पा ताम्भुङ्ङिन् थ्यःङ् पोःक्खे़आङ् ने़रो! ने़प्फु मे़ल्लुक्कम्बाहाॽ 4 यहवे दाङ्बा आनिङ्वाॽफुमाङ्ङिल्ले़ अक्खे पाःत्तुॽ, “‘चे़प्मा से़प्मासि के़बोङ्बा मे़ल्लुक् मे़ःन्दाहाॽ चाराम्से़से़ॽ॥’ 5 खे़ङ्हाॽ के़इङ्बाहाॽरे़ खे़ङ्हाॽ मे़जे़प्तु मे़स्ये़रुसिॽ, खम्भ्याङ् खे़ङ्हाॽ खुम्दिङ् मे़ङ्घोए मे़बेःक्॥ खे़ङ्हाॽरे़ अक्खे मे़बात्तुॽ, ‘यहवे दाङ्बे़ल्ले़ कुनारा पोररो, थेआङ्भे़ल्ले़ आनिगे याङ्साकुन्धेसाबा पोःक्खिगे़!’ के़इङ्बाहाॽरे़ मे़साङुसिबा मे़ल्लुक्कम्बाहाॽरे़आङ् खे़ङ्हाॽ मे़न्दाङ्घुसिन्ॽ॥ 6 थेआङ्भे़ल्ले़ आल्लआङ्धो लाजेॽओबा मनाहाॽ आलुङ्माॽ स्याःत् मे़ल्लॽने़न्॥ से़क्खासाङ् आङ्गाॽ के़रे़क् खुन्छिॽ आप्फेक् हिम्बेसाङ्बाहाॽरे़ खुन्छिॽ हुक्को नु खुन्छिॽ आप्फेक् हाङ्ङिल्ले़ कुहुक्को थासुङ्सिङ्ॽ॥ खे़ङ्हाॽरे़ लाजेन् मे़युक्तुॽ, हे़क्क्याङ् खे़ङ्हाॽरे़ खुन्छिॽ हुक्कोलाम् आङ्गाॽ खे़ङ्हाॽ मे़से़ःप्तुङ्सिङ्ङिन्ॽ॥” 7 कल्ले़चोगुल्ले़ चे़प्मा से़प्मासिरे़ लागि मे़गत्तुसिबा मे़ल्लुक् मे़ःन्दाहाॽ, से़क्खाःल्ले़ थक्सा लुप्पो तुक्खे मे़जाःत्तुसिबा मे़युक्तुसिबाहाॽ आङ्गाॽ चाराम्सुङ्सिङ्॥ हे़क्क्याङ् आङ्गाॽ आलागि तक्कात् ने़त्छि याङ्सिङ्ङा—लत्छारे़ कुमिङ् “लुङ्गुम्” नु वेॽइल्ले़ कुमिङ् “थिक्हुप्” वाःत्तुङ्—हे़क्क्याङ् मे़ल्लुक् लुप्हाॽ चाराम्सुङ्सिङ्॥ 8 आङ्गाॽ लत्छा लाओसा सुम्सि मे़ल्लुक्कम्बाहाॽ लःत्तुङ्देसुङ्सिङ्॥ खे़न् थक्सा लुप्हाॽरे़ आङ्गाॽ मे़जिःत्ताङ्, हे़क्क्याङ् खे़ङ्हाॽरे़ आङ्गाॽ आनिङ् सत्त्रे़ॽ मे़ले़ॽरु॥ 9 आङ्गाॽ मे़त्तुङ्सिङ्, “आङ्गाॽ खिनिॽ मे़ल्लुक्कम्बा मे़बोङ्ङान्॥ के़सिबाहाॽ मे़सिए मे़नाॽ, के़मे़क्पाहाॽ मे़मे़क्के मे़नाॽ, हे़क्क्याङ् के़हिङ्बाहाॽरे़ थिक्हाॽरे़ वेॽहाॽरे़ खुन्छिॽ ने़क्सान् मे़जररो॥” 10 खे़ब्याङ् आङ्गाॽ “आलुङ्गुम्” मे़प्मनाबा तक्काःत्तिन् याङ्सिङ्ङा, हे़क्क्याङ् इस्राइलबा के़रे़क् मनाहाॽनु चोगुङ्बा माङ्हुप्पिन् मे़ङ्गे़प्मना चोगुङ्ङाङ् खे़न् ए़क्खुङ्॥ 11 खे़न् माङ्हुप्पिन् आम्भा खे़ल्ले़ याःन्दिक् मे़ङ्गे़प्मनाबा पोःक्खे़, हे़क्क्याङ् कम्भलॽरिक् आङ्गाॽ ओमे़मे़त्ताङ्ल मे़बत्छाङ्बा के़इङ्बाहाॽरे़ खे़ङ्ग यहवे दाङ्बे़ल्ले़ कुबाःन्जाक् नेरत्छ फाॽआङ् निङ्वाॽ मे़घोसु॥ 12 खे़ब्याङ् आङ्गाॽ के़इङ्बाहाॽ मे़त्तुङ्सिङ्, “खिनिॽ नुबा पोःक्खे़बा के़निसुम्ने़भग्र आङ्गाॽ आनाम्याक्किन् आबिरे़म्मे़ॽ॥ मेःन्ने़भग्र खिनिॽए कत्ते़म्मे़ॽ॥” कल्ले़चोगुल्ले़ खे़ङ्हाॽरे़ आङ्गाॽ सुम्बोङ् युप्पा याङ्इत्छेॽ मे़बिराङ्॥ 13 यहवे दाङ्बे़ल्ले़ आङ्गाॽ मे़त्ताङ्, “खे़ने़ॽ याङ्ङिन् कोम्भाल्यान् लाप्फुसे़ पिरे़ॽ”—कन् इमे़ल्लुङ्बा कुमे़न्निन् खे़ङ्हाॽरे़ आङ्गाॽ आलागि मे़याक्तुरो॥ खम्भ्याङ् आङ्गाॽ खे़न् सुम्बोङ् युप्पाःल्ले़ कुआःत्हाॽ तेॽरुङ्ङाङ् यहवे दाङ्बे़ल्ले़ कुहिम्मोबा याङ्युङ्मादे़न्नो कोःम्भाल्याःल्ले़ कुलागि लाप्तेसुङ्॥ 14 खे़ब्याङ् यहुदा नु इस्राइल लुम्मोबा फुॽनुसाॽ काॽइःन् नुप्ल याःम्मारे़ लागि आङ्गाॽ “थिक्हुप्” मे़प्मनाबा वेॽ तक्काःत्तिन् ए़क्खुङ्॥ 15 खम्भ्याङ् यहवे दाङ्बे़ल्ले़ आङ्गाॽ मे़त्ताङ्, “कुसुम् मे़न्दम्मनाबा मे़ल्लुक्कम्बे़ल्ले़ कुभे़जुम् कुभे़यान् खे़ने़ॽ याम्मो याङ्सिङ्ङे़ॽ॥ 16 थेआङ्भे़ल्ले़ से़क्खासाङ् आङ्गाॽ कन् लाजेॽओ लत्छा अक्तङ्बा मे़ल्लुक्कम्बाधिक् फोःक्खुङ्ॽ, खे़ल्ले़ के़माबाहाॽ कम्ब्राङ् मे़मे़त्तुसिन्ॽ, फुत्छिङ्ज्याङ् के़से़बाहाॽआङ् मे़भुक्खुसिन्ॽ, के़गाःम्बाहाॽआङ् मे़वेःन्दुसिन्ॽ, मे़न्दुक्मनाबा कुयाम् चाङ्जाङ्बाहाॽआङ् चामे़राम्सुसिन्ॽ, कर खे़ल्ले़ वरुप्लुप्पा मे़ल्लुक्किल्ले़ कुलाङ् तोॽभेःत्ते़न् थे़ःक्खुआङ् खुन्छिॽ तगि सान् चरो॥ 17 “मे़ल्लुक् लुप्हाॽ के़ले़प्पाआङ् के़बेःक्पा के़घे़प्पा कुसुम् मे़न्दम्मनाबा मे़ल्लुक्कम्बान् चिःत्ते़स्ये़रो! खे़ल्ले़ कुहुक्किन् नु कुजुप्साङ् मिक्किन् ताभेःल्ले़ च्ये़प्तुररो! खे़ल्ले़ कुहुक्किन् के़रे़क् सर्गे़ङ् हेबेःक्लरो हे़क्क्याङ् खे़ल्ले़ कुजुप्साङ् मिक्किन् खामे़न्निमनाबा पोङ्लरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.