जकरिया 10 - लिम्बुसे़न्लप् खोमा माङ्हुप् 1 वहित् थामा नाॽबा ये़म्मो यहवे दाङ्बे़न् वहित् नाःक्ते़म्मे़ॽओ, यहवे दाङ्बे़ल्ले़ए खाॽमिःत्हाॽ के़बप्पा सुरित् केजङ् चोगुरो॥ खुने़ॽ के़रे़क् मनाहाॽरे़ खुन्छिॽ लागि वगेःङ्मा वहित् थासुरो, खुने़ॽ के़रे़क्ले़ खुन्छिॽ लागि इक्ताप्पो कुलिःम्बा पिरुसिरो॥ 2 नावाइत्लाहाॽरे़ इङ्ले़क्पा पान् मे़बाःत्तुरो, हे़क्क्याङ् कित्चाक् के़जोःक्पाहाॽरे़ इङ्ले़क्पा सुफोहाॽ मे़निसुरो, खम्भ्याङ् मे़न्वाॽमनाबा से़प्माङ्हाॽ मे़बाःत्तुरो, खे़ङ्हाॽरे़ कुसुम् मे़न्दम्मनाबा आःन्छिङ्मा मे़बिरुसिरो॥ कल्ले़चोगुल्ले़ मे़ल्लुक्कम्बाहाॽ मे़सुःम्बाल्ले़ चोगुल्ले़ तुक्खे मे़जाःत्तुसिबा मे़ल्लुक्हाॽ कुइसिक् मनाहाॽ ताप्मे़बे़ॽरो॥ 3 “आङ्गाॽ आसाक्के़न्निन् मे़ल्लुक्कम्बाहाॽ सम्धाङ् थारो, आङ्गाॽ लाम्लोबाहाॽ खुम्दिङ् पिरुङ्सिङ्लो, थेआङ्भे़ल्ले़ मुक्साम्दाङ्बा यहवे दाङ्बे़ल्ले़ आप्फेक् कुमे़ल्लुक्लुप्, यहुदाबा हिम्सयङ्हाॽ कम्ब्राङ् मे़त्तुसिरो, हे़क्क्याङ् खे़ङ्हाॽ थङ्ङो के़हे़न्छिङ्बा अन् हे़क्तङ्बा चोगुसिरो॥ 4 यहुदालाम् लाम्लोबाहाॽ कुम्मालुङ्, साःङ्गाहिम् लक्चु हे़क्क्याङ् थङ्ङोबा लि हे़क्के के़रे़क् मे़लःन्लो॥ 5 खे़ङ्हाॽनु सोरिक् थङ्ङो खुन्छिॽ निङ्मिहाॽ माराम्मोबा ले़क्वाओ चिदोॽ चिदोॽ के़दोॽबा मुक्साम्साबा मनाहाॽ हे़क्तङ्बा मे़बोङ्लो, थेआङ्भे़ल्ले़ यहवे दाङ्बे़न् खे़ङ्हाॽनु सोरिक् वाॽरो खे़ङ्हाॽ थङ् मे़जोःक्काङ् अन्गे़युक्पाहाॽ नाधामो मे़धासुसिरो॥ 6 “आङ्गाॽ यहुदाबा हिम्सयङ्हाॽ के़धुम्बा चोगुङ्सिङ्लो, हे़क्क्याङ् योसेफरे़ कुहिम्सयङ्हाॽ ताङ्से़ःप्तुङ्सिङ्लो॥ आङ्गाॽ खे़ङ्हाॽ याम्मो नुःक्तुङ् तारुङ्सिङ्लो, थेआङ्भे़ल्ले़ आङ्गाॽ खे़ङ्हाॽ लुङ्माॽ तुक्तुङ्सिङ्लो॥ आङ्गाॽ खे़ङ्हाॽ मे़नाॽरुङ्सिङ्ङिन्बा हे़क्तङ्बा मे़बोङ्लो, थेआङ्भे़ल्ले़ आङ्गाॽ यहवे दाङ्बा खुन्छिॽ निङ्वाॽफुमाङ्आरो, हे़क्क्याङ् आङ्गाॽ खे़ङ्हाॽरे़ खुन्छिॽ पेलिगे़न् तुवान् खे़प्सुङ्लो॥ 7 एफ्राइमबा मनाहाॽग मुक्साम्साबा मे़बोङ्लो, हे़क्क्याङ् चे़ल्ले़क्सेॽ थि के़धुङ्बाआङ् के़सःप्पा हे़क्के खे़ङ्हाॽरे़ खुन्छिॽ निङ्वाॽ पदादारो॥ खे़ङ्हाॽरे़ खुन्छिॽ मुॽइदाङ्साहाॽरे़ खे़न् मे़निसुआङ् मे़सःत्लो, यहवे दाङ्बाओ खे़ङ्हाॽरे़ खुन्छिॽ निङ्वान् पसःत्सःत्लो॥ 8 “खे़ङ्हाॽ आङ्गाॽ उःत्तुङ्सिङ्ङाङ् सुप्सुङ्सिङ्लो, थेआङ्भे़ल्ले़ से़क्खाए मे़ल्लुङ् हुङुङ्ङाङ् खे़ङ्हाॽ थे़ॽरुङ्सिङ्ङाङ् मे़वाॽरो हे़क्क्याङ् तगि कुइसिक् निःत्मे़न्दे़त्ते यरिक् मे़बोङ्लो॥ 9 आङ्गाॽ खे़ङ्हाॽ मे़न्छाम् सुवाङ्लुम्मो फुत्छाःङ् से़सुङ्सिङ्लो हे़क्केसाङ् माःङ्घाबा लाजेॽहाॽओ खे़ङ्हाॽरे़ निङ्वाॽ मे़इःत्तारो॥ खे़ङ्हाॽ नु खे़ङ्हाॽरे़ खुन्छिॽ मुॽइदाङ्साहाॽ मे़हिङ्लो हे़क्क्याङ् खे़ङ्हाॽ सोरिक् इस्राइलओ मे़नुःङ् मे़दारो॥ 10 आङ्गाॽ खे़ङ्हाॽ मिस्र लाजेॽलाम् नुःक्तुङ् तारुङ्सिङ्लो, हे़क्क्याङ् अस्सुर लाजेॽलाम् खे़ङ्हाॽ सुप्सुङ्सिङ्लो॥ आङ्गाॽ खे़ङ्हाॽ गिलाद नु लेबनान लाजेॽहाॽओ तारुङ्सिङ्लो खे़ब्याङ् खे़प्मो काक् लाजेन् मनाहाॽरे़ सधे़क् मे़धिम्सुरो॥ 11 खे़ङ्हाॽरे़ पयम् यम्बा तुक्खेवा वरःङ्ङिन् मे़लस्सुरो, खे़ङ्हाॽरे़ वाभे़ल्ले़ङ्हाॽ चिजि ये़म्ये़म् मे़जोगुरो हे़क्क्याङ् निल वहःङ्ङोबा केःम्बा कुदिम्बेहाॽ चप्तुलाःत्लो॥ अस्सुररे़ यम्बा कुहे़न्छिङ्मा कुआङ्दिङ्ङिन् यो मक्थारो हे़क्क्याङ् मिस्ररे़ कुहाङ् तक्काःत्तिन् माबेःक्लो॥ 12 आङ्गाॽ खे़ङ्हाॽ यहवे दाङ्बाओ के़धुम्बा चोगुङ्सिङ्लो, हे़क्क्याङ् खे़ङ्हाॽ खुने़ॽए कुमिङ्ङो लाङ्मे़घेक् मे़वाॽरो,” यहवे दाङ्बे़ल्ले़ पाःत्तुआङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.