जकरिया 1 - लिम्बुयहवे दाङ्बाओ नुःङ्मा उवा 1 दारा हाङ्ङिल्ले़ हाङ्युक् चोगुबा निसिगेक्पा तङ्बे ये़त्छिगेक्पा लाओ यहवे दाङ्बे़ल्ले़ कन् कुइङ्घङ्ङिन् इद्दोरे़ल्ले़ कुम्मे़न्छाॽ बेरेक्याहःल्ले़ कुस्सा माङ्निङ्वाॽपान् के़बाःप्पा जकरियाओ के़रे़— 2 “खिनिॽ पाधे़बाहाॽनु यहवे दाङ्बे़न् साॽरिक् कुयाःक्ले़ॽरे़आङ् वये़॥ 3 कल्ले़चोगुल्ले़ खे़ने़ॽ मनाहाॽ मे़त्ते़से़ॽ—मुक्साम्दाङ्बा यहवे दाङ्बे़ल्ले़ अक्खे पाःत्तुॽ, ‘आङ्गाॽओ नुःक्खे़म् त्ये़म्मे़ॽ, हे़क्क्याङ् आङ्गाॽ खिनिॽ ले़प्माङ् नुःङ्ङारो॥’ 4 “खिनिॽ पाधे़बाहाॽ हे़क्तङ्बा खिनिॽ मे़बोःक्खे़म्मिन्ने़ॽ, तगिबा माङ्निङ्वाॽपान् के़बाःप्पाहाॽरे़ खे़ङ्हाॽ अक्खे मे़मे़त्तुसिआङ् वये़—मुक्साम्दाङ्बा यहवे दाङ्बे़ल्ले़ अक्खे पाःत्तुॽ—‘आल्ल खिनिॽ ताप्फे़ःम्बा सुत्ना नु कुॽइभे़म्मा ये़प्ले़क् लाम्बा नुःक्खे़म्मे़ॽ॥’ कर खे़ङ्हाॽरे़ मे़ङ्घे़प्सुन् हे़क्क्याङ् आङ्गाॽ ले़प्माङ् निङ्वाॽए मे़म्बिरुन्,” यहवे दाङ्बे़ल्ले़ उवा चोगुॽ॥ 5 खिनिॽ पाधे़बाहाॽ आल्ल आत्ति मे़वाॽबे? हे़क्क्याङ् माङ्निङ्वाॽपान् के़बाःप्पाहाॽ, थे खे़ङ्हाॽ आप्फाल्ले़साङ् मे़हिङ्ङाङ् मे़वाॽबि? 6 कर आङ्गाॽ आसे़वारोबाहाॽ, आङ्गाॽ आमाङ्निङ्वाॽपान् के़बाःप्पाहाॽ इङ्जाङ् पिरुङ्सिङ्बा आबाःन्जाःक्हाॽ नु आङ्गाॽ आइङ्जाङ्हाॽरे़ थे खिनिॽ पाधे़बाहाॽ मे़गाःक्तुसिन्नाङ् मे़वये़म्बि? खे़ब्याङ् लायोलाम् मे़हिन्दे़आङ् खे़ङ्हाॽरे़ मे़बाःत्तु, “मुक्साम्दाङ्बा यहवे दाङ्बे़ल्ले़ आनिगे सुत्ना नु ये़प्ले़क् कुइसिक् आनिगे थे़मा मे़प्मा निःन्धो चोगुआङ् वये़ खे़न् आनिगे़नु चोगुआङ् वाॽरो॥” सिङ्बुङ्हाॽरे़ कुलुम्मो के़वाॽबा मना 7 दारा हाङ्ङिल्ले़ हाङ्युक् चोगुबा निसिगेक्पा तङ्बे सेबात मे़प्मनाबा थिबोङ्ङाङ् थिक्सिगेक्पा लाःल्ले़न् निबोङ्ङाङ् लिसिगेक्पा ये़न्नो इद्दोरे़ कुम्मे़न्छाॽ, बेरेक्याहरे़ कुस्सा माङ्निङ्वाॽपान् के़बाःप्पा जकरियाओ यहवे दाङ्बे़ल्ले़ कुइङ्घङ्ङिन् के़रे़॥ 8 ओमे़त्ते़ॽ, से़न्दिक् आङ्गाॽ अक्तङ्बा सुफो निसुङ्, आङ्गाॽ आदगि मनाधिक्ले़ हे़ःत्ताङ्बा अन्निन् युक्तुआङ् वये़॥ खुने़ॽ पाक्लुम्लुम्बा ते़न्नोबा थक्मेःप्पा लाओ के़भे़क्पा सिङ्बुङ्हाॽरे़ कुलुम्मो ये़बे़गरे़, हे़क्क्याङ् खुने़ॽ कुएगाङ् ले़प्माङ् हे़ःत्के़लॽबा, हे़ःत्यङ्यङ्बा नु फगे़रॽबा अन्हाॽआङ् मे़वये़॥ 9 आङ्गाॽ सेःन्दोसुङ्, “आदाङ्बे, कन्हाॽ थेसि?” आङ्गाॽनु के़बाःप्पा माङ्लाइङ्बे़ल्ले़ नुगप् पिराङ्, “कन्हाॽ थेसिबे के़लॽबान् आङ्गाॽ ओःन्धाक्ने़॥” 10 खे़ब्याङ् थक्मेःप्पा लाओ के़भे़क्पा सिङ्बुङ्हाॽरे़ कुलुम्मो के़ये़प्पागे़जाबा मनाःल्ले़ पाःत्तुर मे़त्ताङ्, “यहवे दाङ्बे़ल्ले़ इक्सादिङ् खाम्बेःक्मो के़रे़क् पिसाङ् पेःक्मारे़ लागि पाङ्घुसिबाहाॽ कन् अन्गे़युक्पाहाॽएरो॥” 11 हे़क्क्याङ् खे़ङ्हाॽरे़ थक्मेःप्पा लाओ के़भे़क्पा सिङ्बुङ्हाॽरे़ कुलुम्मो के़ये़प्पागे़जाबा माङ्लाइङ्बे़न् मे़जे़क्तु, “इक्सादिङ् खाम्बेःक्मो आनिगे के़रे़क् पिसाङ् पेगिगे़, हे़क्क्याङ् से़क्खाए, काक् इक्सादिङ् खाम्बेःक्मे़न् पप्प्राॽमा नु थेआङ् पाःप्मा मे़न्छुक्के ने़स्से़बा निसुम्बे़॥” 12 खे़ब्याङ् यहवे दाङ्बे़ल्ले़ कुमाङ्लाइङ्बे़ल्ले़ पाःत्तु, “मुक्साम्दाङ्बा यहवे दाङ्बाए, कन् नुबोङ् तङ्बे थारिक् आदाङ्बा यरुसले़म नु यहुदा पाङ्जुम्हाॽओबा मनाहाॽनु के़सिक् पोगे़आङ् वाॽ॥ आदाङ्बारे़ आभे़ल्ले़ थारिक् खे़ङ्हाॽ लुङ्माॽ के़न्दुक्तुसिन्बाबे?” 13 कल्ले़चोगुल्ले़ आङ्गाॽनु के़बाःप्पा माङ्लाइङ्बे़न् यहवे दाङ्बे़ल्ले़ आःन्छिङ्मा पाःन्हाॽ मे़त्तु॥ 14 खे़ब्याङ् आङ्गाॽनु ताॽगे़जे़ङ्बार के़बप्पा खे़न् माङ्लाइङ्बे़ल्ले़ आङ्गाॽ मे़त्ताङ्, “खे़ने़ॽ कन् पाःन्निन् उवा चोगे़ॽ—मुक्साम्दाङ्बा यहवे दाङ्बे़ल्ले़ अक्खे पाःत्तुॽ, ‘यरुसले़म नु सियोनरे़ कुलागि आङ्गाॽ साॽरिक् आनाहे़न्, 15 कर कम्ब्राङ् के़इःप्पाआङ् के़युङ्बा मे़न्छाम् सुवाङ्हाॽनु आङ्गाॽ साॽरिक् आसिक् पोगे़आङ् वाॽ! आङ्गाॽग यरुसले़म हे़क्क्याङ् सियोने़न्नु आजे़ःत्छिक्लक् आसाक्के़न् पोगे़आङ् वयाङ्, कर यरुसले़ःम्मिन् के़भप्पा खे़न् मे़न्छाम् सुवाङ्हाॽरे़ग आङ्गाॽ इःत्तुङ्बान्नुःल्ले़आङ् यरिक् तुक्खे मे़जाःत्तुसि॥’ 16 “खे़ल्ले़चोगुल्ले़ यहवे दाङ्बे़ल्ले़ अक्खे पाःत्तु, ‘आङ्गाॽ आलुङ्माॽ स्याःत् लॽरिक् यरुसले़ःम्मो नुःङ्ङारो॥ खे़प्मो आङ्गाॽ आहिम्मिन् याम्मो मे़जोगुॽ॥ यरुसले़म सिःक्मा इदाःक्के़न् खिङ्घिङ्बा पोङ्ॽ,’ मुक्साम्दाङ्बा यहवे दाङ्बे़ल्ले़ उवा चोगुॽ॥ 17 “याम्मो अक्खे पाःत्ते़ॽआङ् उवा चोगे़ॽ—मुक्साम्दाङ्बा यहवे दाङ्बे़ल्ले़ अक्खे पाःत्तुॽ, ‘आङ्गाॽ आबाङ्जुम्हाॽ याम्मो नुॽमादामारे़ कुधिम् पोङ्ङाङ् वे़त्, हे़क्क्याङ् यहवे दाङ्बे़ल्ले़ सियोने़न् याम्मो आःन्छिङ्मा पिरुॽ, खम्भ्याङ् यरुसले़ःम्मिन् याम्मो सेगुरो॥’” लिसि ताङ्हाॽ नु लिसि चोबेगुहाॽ 18 खे़ब्याङ् आङ्गाॽ थाःङ् ओमे़त्तुङ्, हे़क्क्याङ् ओमे़त्ते़म्मे़ॽ, खे़प्मो आङ्गाॽ आदगि लिसि ताङ्हाॽ पत्छे़॥ 19 आङ्गाॽनु के़बाःप्पार के़बप्पा खे़न् माङ्लाइङ्बे़न् सेःन्दोसुङ्, “कन्हाॽ थे़मासिबे?” खुने़ॽ नुगप् पिराङ्, “इस्राइल, यहुदा नु यरुसले़ःम्मिन् फुत्छिङ्ज्याङ् के़जोःक्पा ताङ्हाॽ आम्भा कन्हाॽरो॥” 20 खे़ब्याङ् यहवे दाङ्बे़ल्ले़ आङ्गाॽ लिसि फे़न्जेॽ के़धक्पाहाॽ ओसेःन्धाक्ताङ्॥ 21 आङ्गाॽ सेःन्दोसुङ्, “कन्हाॽ थे चोःक्से़ मे़दार मे़बप्पाबे?” खुने़ॽ नुगप् पिराङ्, “लत्छा मनारे़आङ् थे़गेक् फोङ्मा मे़न्छुक्के थारिक् यहुदान् फुत्छिङ्ज्याङ् के़जोःक्पा ताङ्हाॽ हाबा कन्हाॽरो, कर फे़न्जेॽ के़धक्पाहाॽग खे़ङ्हाॽ यङ्मा से़प्मासि, हे़क्क्याङ् यहुदा लाजेःल्ले़ कुदक्ले़ङ्वाओ खे़प्मोबा मनाहाॽ फुत्छिङ्ज्याङ् के़जोःक्पा मे़न्छाम् सुवाङ्हाॽरे़ खुन्छिॽ ताङ्हाॽ लाप्फुमा पिमासिरे़ लागि मे़द्ये़बारो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.