सोलोमनरे़ कुसाम्लो 8 - लिम्बु1 आम्माऱेए कुनु के़धुङुआङ् क़ेबोऱेबा, खे़ने़ॽ आङ्गाॽ आप्फेक् आम्भुॽ के़बोःक्खे़ल्ले़ग लाम्मो तुम्ने़ल्ले़ आङ्गाॽ खे़ने़ॽ चुप् मे़त्ने़बा वये़मे़न्लो, हे़क्क्याङ् आत्तिन्हाॽरे़आङ् थेआङ् मे़म्बाःत्तुम्बा वये़मे़न्लो॥ 2 खे़ने़ॽ आङ्गाॽ आम्मारे़ कुहिम्मो तेॽने़बा वये़रो—खुने़ॽए हुॽराङ्ङाङ् वये़रो॥ आङ्गाॽ खे़ने़ॽ मारुक् केःप्मनाबा चे़ल्ले़क्सेॽ थि पिने़मे़न्लो, आङ्गाॽ आफुॽले़सेॽलाम् युमनाबा सेजङ्वान् थुङ्मा पिने़बा वये़रो॥ 3 कुभे़न्छाङ् हुक्किन् आध्गेक् सिगाङ् वाॽरो हे़क्क्याङ् कुजुप्साङ् हुक्किल्ले़ आङ्गाॽ लुङ्माॽ हिःप्पार सुःन्नारो॥ 4 यरुसले़मबा मे़न्छुमासे, आङ्गाॽनु माङ्हुप् चोगे़म्मे़ॽओ, “खे़न्छिॽ लुङ्माॽ के़हिःप्ने़सिबाओ आनिगे मे़हम्आसिगे़न्लो॥” तुक्सिगेक्पा साम्लो मे़न्छुमाहाॽ— 5 लुङ्माॽ हिःप्तुमाल्लो नाःम्सिङ्ल खे़न् मुरे़क् खारे़क्पा ये़ःङ्घादे़न्लाम् के़भे़म्मे़न् हाःप्पे? नाङ्सेॽ सिङ्बुङ् सिगाङ्लाम् खे़ने़ॽ फोःङ्ने़रो, खे़ने़ॽ के़म्मारे़ कुसाप्पोःक्को के़हाङ्सिङ्ङाङ् के़वये़ खे़ॽयो सागे़वाःन्छिङ्ङाङ् के़वये़॥ मे़न्छुमा— 6 खे़ने़ॽ आभे़ल्ले़साङ् के़सिक्लुङ्मो आङ्गाॽ कत्ताङ्ङे़ॽओ के़मिङ्ङिन् लक्मनाबा सिक्रिःन् हे़क्के कत्ताङ्ङे़ॽओ, लुङ्माॽ हिःप्सिङ्मे़ङ्ग सिमे़न् हे़क्के के़धुम्बा चोक्लो, नाहेम्मे़न् इःप्पुङ्ङिन् हे़क्के मुक्साम्बा चोक्लो॥ खे़न् मिधुङ् मिराक् पोङ्ङाङ् लःन्लो खे़ब्याङ् हुरुरुना के़दिःप्पा मि हे़क्के तिःत्लो॥ 7 च्वाःत्तिल्ले़ खे़न् वरङ्मा से़प्मा मे़सुक्तुन्लो॥ के़गुङ्बा के़युबा च्वाःत्तिल्ले़आङ् खे़न् हुम्मा मे़सुक्तुन्लो॥ कुभा मनाःल्ले़ याङ्साकुन्धे लःत्तुआङ् मिःम्जिन् इङ्मा कोःत्तुने़ फग्र मनारे़ खे़न् मे़येःत्तुरक्लो॥ मे़न्छुमाःल्ले़ कुम्भुॽहाॽ— 8 आनिगे लत्छा चुक्मा नुस्साॽधिक् वाॽरो, खुने़ॽ कुनुबक्हाॽ यम्बा मे़म्बोङ्ङे वाॽरो॥ कुभा थाङ्बे़न्धिक् कुइङ्लाप्से़ ताःल्ले़ आनिगे थे़मा चोगुम्बे़बाबे? 9 खे़न् लुङ्धाक् पोःक्खे़बा हे़क्केःल्ले़ग आनिगे खे़प्मो युप्पा चङ्हिम् चोगुम्बे़बा वये़रो॥ खे़न् लाम्धेःप् पोःक्खे़बा हे़क्केःल्ले़ग हे़क्मनाबा साम्माङ्सिङ्ङिल्ले़ फाङ्मनाआङ् खे़न् से़ःप्तुम्बे़बा वये़रो॥ मे़न्छुमा— 10 आङ्गाॽग लत्छा लुङ्धाक्कारो, आङ्गाॽ आनुःन्ग खे़ल्ले़ कुजङ्हिम्लो॥ खे़ल्ले़चोगुल्ले़ आङ्गाॽ लुङ्माॽ हिःप्तुङ्बे़ल्ले़ कुनिमो कुसिक् चिम्ल के़याःम्मा हे़क्तङ्मा आङ्गाॽ पोःक्साङ्ङाङ् वाॽआरो॥ 11 बाल-हामोन मे़प्मनाबा ते़न्नो सोलोमने़ल्ले़ लत्छा चे़ल्ले़क्सेॽ कुइक्ताप् ने़रो॥ याःन्गे़मबाहाॽरे़ खे़न् याङ्ङो मे़देॽरुआङ् ने़रो हे़क्क्याङ् के़रे़क्ले़ खुने़ॽ हे़न्छिङ्धिक् युप्पायाङ् मे़बिरुरो॥ 12 सोलोमने़ल्ले़ खे़न् हे़न्छिङ् युप्पा याङ्हाॽ तेॽरुररो, खे़न् याःन्गे़मबाहाॽरे़ किप् ने़त्छि याङ्ङिन् मे़घोसुररो, आङ्गाॽग आबाङे चे़ल्ले़क्सेॽ इक्ताप् कत्तुङ्लो॥ ये़म्बित्छा— 13 आभुङ्इक्को के़वाॽमा लुङ्माॽ हिःप्ने़मे, के़इक्लान् खे़म्मा खोसुङ्लरो॥ आङ्गाॽ आन्जुम्हाॽरे़ खे़ने़ॽ के़सुत्लान् खे़म्मा फाॽआङ् मे़हाङ्घुर मे़वाॽरो॥ मे़न्छुमा— 14 लुङ्माॽ हिःप्ने़बा आदाङ्बे, पे़ःङ्वा कुइसिक् आङ्गाॽओ हारा फे़रे़ॽओ, मारुक् के़लिङ्बा कोःक्माओ थाङ्बे़न् खिरेबे़न् हे़क्के खे़ने़ॽ आङ्गाॽओ त्ये़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.