सोलोमनरे़ कुसाम्लो 7 - लिम्बुये़म्बित्छा— 1 हाङ्युक्पे़ल्ले़ कुस्सा मे़न्छुमाए! लाङ्लोःत्ति के़जाक्खुबा खे़ने़ॽ के़लाङ्हाॽ साॽरिक् नुबा चोक्लो॥ खे़ने़ॽ के़लाङ् से़बङ्बाहाॽरे़ कब्रिङ् कुघोःप्मान् कुहुक्चो के़नुॽबा साप्चोबाल्ले़ चोगुबा याःम्बक् हे़क्के लॽरो॥ 2 खे़ने़ॽ के़बेहि योःक्किन् काक्पे़त्ता खोर्या हे़क्के लॽरो॥ खे़ङ्ग मारुक् फुप्मनाबा सेजःङ्वाःल्ले़ के़दिम्बा चोक्लो॥ के़साप्पोःक्पान् ले़क्वा फुङ्ङिल्ले़ कबु युक्खुबा मासिःल्ले़ कुलुप् हे़क्के लॽरो॥ 3 काप्साबा पे़ःङ्वासाःत्हाॽ हे़क्के खे़ने़ॽ के़नुबक्हाॽआङ् थाःप्लो॥ 4 खे़ने़ॽ के़निगिःङ्मान् तक्मिबा केःङ् चङ्हिम् हे़क्के लॽरो, खे़ने़ॽ के़मिक्किन् हेस्बोनबा वरक्हाॽ हे़क्तङ्बा चोक्लो, खे़ङ्ग यम्बा ये़क्यक्को पयम् यम्बा ताःक्हन् पेसाङ् युङ्लो॥ के़ने़बोन्ग दमस्कस ले़प्माङ् ओगे़मबा ले़बनाःन्बा चङ्हिम् कुइसिःक्पा चोक्लो॥ 5 खे़ने़ॽ के़धे़गेक्पान् कर्मेल कोःक्मा हे़क्के लॽरो॥ केःम्बा के़धेगेक् इःन् तिल्ले़क् के़ले़क्पा नु माक्ताङ्बा चोक् खे़ल्ले़ हाङ्ङिन् कुसिराॽ के़धाङ्बा चोगुरो॥ 6 आङ्गाॽ आलुङ्माॽ के़हिःम्मे, खे़ने़ॽ साॽरिक् नुमा के़जोःक्लो, खे़ने़ॽ चाॽरिक् नुमासुक्मा के़जोःक्लो, खे़ने़ॽग के़रे़क् आसःप्माने़रो॥ 7 खे़ने़ॽ खे़बक्सिङ् हे़क्तङ्मा केःम्मा के़जोःक्लो, के़नुहाॽ खे़बक्सिङ्ङिल्ले़ कुबजा हे़क्के लॽरो॥ 8 आङ्गाॽ खे़बक्सिङ्ङिन् लिङुङ्लो हे़क्क्याङ् खे़ल्ले़ कुजाॽइन् तुबुङ्लो॥ आङ्गाॽ आलागि खे़ने़ॽ के़नुहाॽ चे़ल्ले़क्सेल्ले़ कुबजा हे़क्के लॽरो हे़क्क्याङ् खे़ने़ॽ के़सक्मान् नाङ्सेॽइल्ले़ कुनाम् हे़क्के नाम्लो॥ 9 खे़ने़ॽ के़म्ब्रान् नुबा चे़ल्ले़क्सेॽ हे़क्के कुजा के़नुॽबा चोक्लो॥ आल्ल चे़ल्ले़क्सेॽ थिन् लुङ्माॽ हिःप्तुङ्बाल्ले़ कुम्ब्राओ सरक् के़त्लरो, खुने़ॽ कुम्ब्रासेन् नु कुहाबोॽबाओ खे़न् होआङ् पेःक्लरो॥ मे़न्छुमा— 10 आङ्गाॽग लुङ्माॽ हिःप्तुङ्बे़ल्ले़न्नारो, खे़म्ब्याङ् खुने़ॽ आङ्गाॽ आमिःप्माल्ले़ तरुरो॥ 11 फे़रे़ॽओ आलुङ्माॽ के़हिःम्बे, आन्छिॽ प्याङ्सिगे़न् इक्ताप् हे़न्गाति पित्छिरो हे़क्क्याङ् पाङ्भेॽओ से़न्दिक् इम्सिरो॥ 12 तानाम् हाराए आन्छिॽ चे़ल्ले़क्सेॽ इक्ताप्हाॽओ पित्छिरो, चे़ल्ले़क्सेल्ले़ कुभुङ्फे़क्मेत् फे़क्ते़बि फाॽआङ् ओमे़त्छुरो हे़क्क्याङ् फुॽले़सेल्ले़ कुभुङ् फे़क्ते़बि फाॽआङ् ओमे़त्छुरो खे़प्मो आङ्गाॽ खे़ने़ॽ आमिःम्मे़न् पिने़रो॥ 13 खे़ने़ॽ मिक्के़युबा मिक्युःन्देःल्ले़ कुनाम्मिन् के़नाम्सुरो हे़क्क्याङ् के़रे़क् परिक्पा कुजा के़नुॽबा सिङ्सेॽहाॽ लाम्धेःप्पुङ्मोए ने़रो॥ आलुङ्माॽ के़हिःम्बे, आङ्गाॽ खे़ने़ॽ के़लागि कुसङ् नु तगिबा निङ्वाॽ के़दाबा सिङ्सेॽहाॽ याङ्घोःत्तुङ् युक्खुङ्ङाङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.