सोलोमनरे़ कुसाम्लो 6 - लिम्बुमे़न्छुमाहाॽ— 1 मे़न्छुमाहाॽओ साॽरिक् पनुनुमाए, खे़ने़ॽ लुङ्माॽ के़हिःप्तुबान् आत्तान् पेआङ् वाॽबे? आनिगे याप्मि आमे़त्ते़ना हे़क्क्याङ् खुने़ॽ कोःप्मारे़ लागि आनिगे फाॽआसिगे़रो॥ मे़न्छुमा— 2 लुङ्माॽ हिःप्तुङ्बा आदाङ्बान् कुभुङ्इक्को पेआङ् वाॽरो, मारुक्हाॽरे़न् कुने़त्नाओ॥ खुने़ॽ कुभुङ्इक्को मे़ल्लुक् मे़ःन्दा चाराम्सुसिरो खे़ब्याङ् साङ्गा फुङ्हाॽ सुप्सुर याक्लो॥ 3 आङ्गाॽ खुने़ॽइन्नारो, लुङ्माॽ हिःप्तुङ्बा आदाङ्बान् आङ्गाॽइन्लो, साङ्गा फुङ्हाॽ लुम्मो खुने़ॽ कुमे़ल्लुक् कुमे़ःन्दा चाराम्सुसिरो॥ ङासिगेक्पा साम्लो ये़म्बित्छा— 4 आङ्गाॽ लुङ्माॽ हिःप्ने़माए, खे़ने़ॽ तिर्सा हे़क्के पनुनुमा के़जोःक्लो हे़क्क्याङ् यरुसले़म हे़क्के नुमा के़जोःक्लो॥ खे़ने़ॽग साॽरिक् नुमा निसा के़भोङ्बा तुरा हे़क्के के़लॽ॥ 5 खे़ने़ॽ के़मिक्किन् आङ्गाॽलाम्बा खे़त्ते़ॽओ, खे़ल्ले़ आङ्गाॽ नाक्ताङ् पेगाङ्ल याःन्दाङ्लो॥ गिलादबा कोःक्माओ मे़ःन्दालुप्हाॽ सङ्माङ् मे़बिन् मे़लाःङ्ल मे़धारो हे़क्केलॽरिक्के खे़ने़ॽ के़धेगेक् इःन् के़नाराओ से़रे़आङ् पत्लो॥ 6 आल्लो खारक् वाहप्मनाबा मे़ल्लुक्हाॽ हे़क्के खे़ने़ॽ के़हाबोॽबाहाॽ फसुःक्याःप्पा चोक्लो॥ खे़न् के़रे़क् थे़प्पे़त् के़गाम्बा चोक्लो हे़क्क्याङ् खे़न् काक् साॽरिक् के़दङ्बा चोक्लो॥ 7 पःत्थाङ् सिगाङ् खे़ने़ॽ कुने़दे़ङ्बान् पःत्थाङ् सिगाङ् कुभे़ल्ले़क् ने़त्छि चोःक्मनाबा फुॽले़ॽसेॽ हे़क्केदङ्बा चोक्लो॥ 8 खे़ॽयो तुक्पोङ् हाङ्माहाॽ, ये़प्पोङ् चक्मेःत्हाॽ मे़वाॽसाङ् खे़न्नुःल्ले़ यरिक् मे़न्छ्याहाॽ मे़वाॽसाङ्! 9 कर आङ्गाॽग लत्छारक् लुङ्माॽ हिःप्तुङ्लो, आङ्गाॽ आबुत्तुःक्के, आङ्गाॽ आलागि कुलिङ्दो के़गे़प्माए॥ खे़न् खुने़ॽ कुम्मारे़ थिक्लक् कुस्सा मे़न्छुमारो— कुम्मारे़ साॽरिक् लुङ्माॽ तुक्तुमा कुस्सारो! मे़न्छुमाहाॽरे़ खुने़ॽ मे़निसुआङ् कुनारा मे़भोसुरो, हाङ्माहाॽ नु चक्मेःत्हाॽरे़ खे़न् मे़जमुरो॥ 10 नाम् के़प्पा हे़क्के निगे़दे़प्पान् हाःत्निबे? खे़न् पनुनुमा कुभुम्बा लाब हे़क्तङ्मा चोक्लो, नाम् हे़क्के से़दिङ्दिङ् के़ओःप्मा चोक्लो॥ 11 ने़वालाओ खारक् के़लिङ्बा सिङ्बुङ्हाॽ ओमे़प्मा फाॽआङ्, चे़ल्ले़क्सेल्ले़ कुबुङ्ङो कुनःक् कुभे़क्वा के़लःम्बा हे़क्क्याङ् फुॽले़सेॽल्ले़ कुबुङ्ङो कुभुङ्फे़क्मेत् ओमे़प्मा फाॽआङ् आङ्गाॽ खजङ्सेॽ सिङ्बुङ् के़युङ्बा इक्ताप्पो पेगाङ्॥ 12 कर आङ्गाॽ कुभा पान् निङ्वाॽ खोमानुःल्ले़ तगि, आङ्गाॽ हक्चघत् हाङ्युक्पे़ल्ले़ कुअन्लाधान् युक्तुङ्ङाङ् वयाङ्लो॥ मे़न्छुमाहाॽ— 13 सुलम्मिबा मे़न्छ्याए, खे़ने़ॽ नुःक्खे़ॽ, नुःक्खे़ॽओ, आनिगे खे़ने़ॽ अदक्तक्काङ् ओमे़त्तासिगे़रो॥ महनैमओ के़लाःङ्बाहाॽ ओमे़मे़त्तुसिबा हे़क्के थेआङ् खिनिॽ आङ्गाॽ याप्मि ओमे़प्मा थेआङ् निङ्वाॽ के़जोगुम्बाबे? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.