सोलोमनरे़ कुसाम्लो 5 - लिम्बुये़म्बित्छा— 1 आङ्गाॽ लुङ्माॽ हिःप्ने़मा! आमेःक्खिम्सामे! आङ्गाॽ आभुङ्इक्को लासाङ्ङाङ् याक्कारो, आङ्गाॽ आमुर्र नु आमारुक् सुप्सुङ्ल वाॽआरो॥ आङ्गाॽ आसक्वाघुन् नु कुले़क्किन् चाङ्ल वाॽआरो, खे़ब्याङ् आसेजःङ्वान् नु पित्नुन् थुङुङ्ल वाॽआरो॥ चे़म्मे़ॽओ, आमिःम् आन्जुम्से हे़क्क्याङ् थुङे़म्मे़ॽओ, लुङ्माॽ हिःम्मारे़ निङ्वाॽ मे़न्दाए थे़म्बा थुङे़म्मे़ॽओ! मे़न्छुमाहाॽ— लिसिगेक्पा साम्लो मे़न्छुमा— 2 आङ्गाॽ इप्साङ्, कर आनिङ्वाःङ्ग मे़न्इम्मे वये़रो, आङ्गाॽ लुङ्माॽ हिःप्तुङ्बाल्ले़ लाम्धेःप्पान् खक्खक् मे़त्तुरो आङ्गाॽ खे़न् से़प्माङ्मो निसुङ्लो॥ आङ्गाॽ लुङ्माॽ हिःप्ने़मे, आङ्गाॽ आलागि कुलिङ्दो के़गे़प्माए, आङ्गाॽ आलागि कुलिङ्दो के़गे़प्माए, आङ्गाॽ सिगाङ् लाःप्मा फाःक्ताङ्ङे़ॽओ॥ सेःक्वाःल्ले़ आध्गेक्किन् वाबिःन्दे़आङ् पत्लो, से़न्दिक् खाम्दःम्बे़ल्ले़ आधे़गेक् इःन् के़सेःम्बा पोःक्खे़आङ् पत्लो॥ ये़म्बित्छा— मे़न्छुमा— 3 आङ्गाॽ आजाङ्ङिन् फे़न्दुङ्सुरुङ्लो, थेआङ् खे़न् आङ्गाॽ याम्मो चाक्खुङ्बे? आङ्गाॽ आलाङ्हाॽ वाहप्तुङ्सुरुङ्लो, हे़नाङ् याम्मो खे़ङ्हाॽ चिःन्दुङ्बाबे? 4 आङ्गाॽ लुङ्माॽ हिःप्तुङ्बाल्ले़ लाम्धेःप्पो कुहुक्किन् फत्छुरो, खुने़ॽ कुलागि आलुङ्माॽ तिक्तिक् लॽरे़रो॥ 5 खुने़ॽ सिगाङ् लाःप् पाङ्से़ पोगाङ्, आङ्गाॽ लाम्धेःप्पे़ल्ले़ कुए़प्मान् ते़म्सुङ्लो, खे़न् ये़म्मो आहुक्को मुर्रःन् ने़ःक्तुआङ् पत्छे़रो हे़क्क्याङ् आहुक्चोन् मुर्रःल्ले़ कुवाःल्ले़ वारगे़आङ् पत्छे़रो॥ 6 आङ्गाॽ लुङ्माॽ हिःप्तुङ्बाल्ले़ कुलागि लाम्धेःप्पान् हन्दुङ्लो, कर खुने़ॽग आन्देन् पेआङ् होःप्ते़रो! आङ्गाॽ खुने़ॽ कुइक्लान् चाॽरिक् खे़म्मा निङ्वाॽ चोगुङ्लो! आङ्गाॽ खुने़ॽ कोःत्तुङ् कर खुने़ॽ खोमा मे़न्छुक्पान्लो, आङ्गाॽ खुने़ॽ उःत्तुङ् कर थेआङ् नोगप् मे़ङ्घोबान्लो॥ 7 ये़क्यक् कम्ब्राङ् के़मे़प्पाहाॽरे़ आङ्गाॽ मे़दुमाङ्लो, खे़ङ्हाॽरे़ आङ्गाॽ मे़हिप्ताङ्ङाङ् मे़घाःन्दाङ्लो, ये़क्यक्को लुङ्धाक् के़गोबाहाॽरे़ आबःत्थाङ्ङिन् मे़देॽरुरो॥ 8 यरुसले़ःम्बा मे़न्छुमासे, आङ्गाॽनु माङ्हुप् चोगे़म्मे़ॽओ, आङ्गाॽ लुङ्माॽ हिःप्तुङ्बे़न् के़दुमुम्ने़ फग्र आङ्गाॽ आलुङ्माॽ हिःम्माङ् वाॽआरो कन् खुने़ॽ मे़त्ते़म् आबिरे़म्मे़ॽओ॥ मे़न्छुमाहाॽ— 9 मे़न्छुमाहाॽओ साॽरिक् पनुनुमाए, खे़ने़ॽ लुङ्माॽ के़हिःप्तुबान् थे वेॽहाॽनुःल्ले़आङ् वेॽ चोःक्पि? खुने़ॽओ अक्तङ्बा निङ्वाॽ के़माबा पान् थे वाॽबे? खे़ने़ॽनु लुङ्माॽ के़हिःप्तुबाल्ले़ लागि थे़मान् के़ये़ःक्पा चोःक्पे? मे़न्छुमा— 10 लुङ्माॽ हिःप्तुङ्बा आदाङ्बान् नुबा नु के़धुम्बा चोक्लो, खुने़ॽग हे़न्छिङ् थिबोङ्ङो खोगे़दे़प्पा लत्छा ये़म्बित्छारो॥ 11 खुने़ॽ कुनारान् इस्सेःङ्बा साम्म्याङ् हे़क्तङ्बा चोक्लो, खे़ब्याङ् कुधे़गेक् इःङ्ग के़नाःत्छिङ्बा नु काःक्वा हे़क्के माक्के़लॽबा चोक्लो॥ 12 खुने़ॽ कुमिक्किन् यङ्घङ्ङिल्ले़ कुयाओबा पुत्तुःक्के कुइसिक् चोक्लो हे़क्क्याङ् पित्नुओ वारुःम्मनाबा नु हःङ्गुःल्ले़ कुयाम्ले़ङ्बो के़ये़प्पा साप्पे़त्त्रुःक्मा कुसिङ् लॽरो॥ 13 सिदाॽ नु मारुक्हाॽरे़ के़दिम्बा फुङ्इक् कुइसिक् खुने़ॽ कुने़दे़ङ्बाहाॽ पनुनुबा चोक्लो॥ मुर्रःल्ले़ कुवाःल्ले़ वागे़रक्पा ले़क्वाभुङ् हे़क्तङ्बा खुने़ॽ कुम्ब्रा वसे़न् चोक्लो॥ 14 खुने़ॽ कुहुक्किन् कुइःत् के़दाबा चोक्लो हे़क्क्याङ् कुहुक्चोओ मुधिङ् युङ्मनाबा स्वागेःप्हाॽ वारुआङ् पत्लो॥ कुधक्किन् कुभिङ्लुङ् के़बप्पा तक्मिबाल्ले़ कुगेङ् हे़क्के वरे़ङ्ले़ङ् के़लॽबा चोक्लो॥ 15 कुलाङ् से़बङ्बान् साम्म्याङ् पाक्खोःङ्ङो ये़म्मनाबा ले़म्भालुङ् सित्लाङ्हाॽ हे़क्के लॽरो, खुने़ॽ ले़बनानबा केःम्बा साम्मासिङ्हाॽरे़ थिम्सुबा कोःक्मा हे़क्के कुहाङ्वा कुमाङ्वा के़याक्पा मिमिदिङ्बा चोक्लो॥ 16 खुने़ॽ कुम्ब्राओ कुजा के़नुॽबा पान् वाॽरो, काक् कुबाःन्हाॽओ, खुने़ॽ इमे़त्लुङ्बा चोक्लो॥ यरुसले़ःम्बा मे़न्छुमासे, आङ्गाॽ लुङ्माॽ हिःप्तुङ्बा, आन्जुम्मिन् हाबा कन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.