सोलोमनरे़ कुसाम्लो 4 - लिम्बुये़म्बित्छा— 1 आङ्गाॽ लुङ्माॽ हिःप्ने़माए, खे़ने़ॽ साॽरिक् नुमा के़जोःक्लो! खे़ने़ॽ साॽरिक् नुमा के़जोःक्लो! खे़ने़ॽ के़मिक्किन् पःत्थाङ् सिगाङ् पुत्तुःक्के कुइसिक् लॽरो॥ गिलादबा कोःक्माओ मे़न्दाक् लुप्हाॽ सङ्माङ् मे़बिन्ल मे़धाबा हे़क्के खे़ने़ॽ के़धेगेक् इःन् के़नाराओ से़रे़आङ् पत्लो॥ 2 आल्लो खारक् कुम्रिक् नःङ्मनाआङ् वाहप्मनाबा मे़ल्लुक्हाॽ हे़क्के खे़ने़ॽ के़हाबोॽबाहाॽ फसुःक्याःप्पा चोक्लो॥ खे़ङ्हाॽ के़रे़क् साॽरिक् के़दङ्बा चोक्लो के़हाबोॽबाहाॽ थिक्काङ् हार्गाःङ्वा मे़जोक्ने़न्लो॥ 3 खे़ने़ॽ के़म्ब्रासेन् हे़ःत्ताङ्बा इदाक् हे़क्के लॽरो, खे़ने़ॽ के़बाःत्तिल्ले़ खे़न् चाॽरिक् खे़म्दुरो॥ खे़ने़ॽ के़ने़दे़ङ्बान् पःत्थाङ् सिगाङ् कुभे़ल्ले़क् ने़त्छि चोःक्मनाबा फुॽले़ॽसेॽ हे़क्केदङ्बा चोक्लो॥ 4 खे़ने़ॽ के़निगिःङ्मान् दाउद हाङ्ङिल्ले़ कुजङ्हिम् हे़क्के लःप्पे़प्पा नु वरे़ङ्ले़ङ्बा चोक्लो॥ के़सित्लाओ लत्थिक् कान्धि पत्लो, खे़ङ्ग हे़न्छिङ्धिक् खोॽहाॽ फोःम्मनाबा हे़क्के निदे़त्लो॥ 5 काप्साबा पे़ःङ्वासाःत्हाॽ ले़क्वाभुङ्ङो चाराम्सिबा हे़क्के खे़ने़ॽ के़नुबक्हाॽआङ् थाःप्लो॥ 6 तानाम्बा सुरिःत्मान् मे़न्हुए थारिक्, माक्चिघुःङ्बान् मे़न्इःङ्सिङ्ङे थारिक् आङ्गाॽ पाङ्पःत्फुङ् कोःक्माओ, कुनाम्गे़नुॽबा सुक्पा के़युङ्बा थे़गुओ पेःक्कारो॥ 7 खे़ने़ॽ साॽरिक् नुमा के़जोक्, आङ्गाॽ लुङ्माॽ हिःप्ने़माए, कुधेआङ् कुमे़ङ्घेम्मा के़होःप्मा पनुनुमाए! 8 आमेःक्खिम्सामाए, ले़बनाःन्बा कोःक्माहाॽओलाम् आङ्गाॽनु पित्छिरो, ले़बनाःनलाम्बा आङ्गाॽनु फे़रे़ॽओ अमाना नाङ्जङ्लुङ्लाम्बा, खिरिङ्बाहाॽ नु थे़रिङ्बाहाॽ के़याक्पा सेनिर नु हेर्मोन कोःक्मालाम्बा थ्ये़ॽओ थे़गु माङ्वाहाॽलाम् खे़ने़ॽ ये़ॽओ॥ 9 आङ्गाॽ आलुङ्माॽ के़हिःम्मा, आङ्गाॽ आमेःक्खिम्सामे, खे़ने़ॽ के़मिक् चिराप्पा थिक्ले़ हे़क्क्याङ् खे़ने़ॽ के़सित्लाओ के़वारुबा कान्धि थिक्ले़ आङ्गाॽ आलुङ्मा हिःप्सुआङ् वाॽरो॥ 10 आङ्गाॽ आलुङ्माॽ के़हिःम्मा नु आमेःक्खिम्सामे, खे़ने़ॽ चाॽरिक् नुमासुक्मा के़जोःक्लो, खे़ने़ॽ लुङ्माॽ के़हिःप्माबे़न् सेॽजःङ्वाःन्नुःल्ले़आङ् कुजानुॽरो, खे़ने़ॽ के़नाम्नुॽमे़न् के़रे़क् मारुक्हाॽनुःल्ले़आङ् चाॽरिक् कुनाम्नुॽरो॥ 11 आङ्गाॽ लुङ्माॽ हिःप्ने़मे, खे़ने़ॽ के़म्ब्रासेन् सक्वाले़क् हे़क्के पलिम् लिम्लो, खे़ने़ॽ के़ल्सोःत्तिन् आलागि सक्वाघु नु पित्नु हे़क्के कुजानुॽरो॥ खे़ने़ॽ के़जाङ्ङिन् ले़बनाःनले़ कुनाम् हे़क्के कुनाम्नुॽरो॥ 12 आङ्गाॽ लुङ्माॽ हिःप्ने़मा, आङ्गाॽ आसिसामेःत्ते लुङ्धाक्किल्ले़ कब्रिङ् कबुबा फुङ्इक् हे़क्के के़लॽरो, हे़क्क्याङ् मे़दे़प्तुआङ् के़बप्पा आबाङे खुन्छिॽ वाबुन्दाक् हे़क्के के़लॽरो, 13 खे़ने़ॽ के़नःक्हाॽ फुॽले़सेॽइक्के़न् हे़क्के लॽरो, नुःब्नुबा सिङ्सेॽहाॽ के़धोःक्पा सेन्दिॽओ हुःप्मनाबा चान्, पाङ्बःत् फुङ्मा, 14 चतामसि, चाःन्द्रुक्, लुप्लाःक्, सोरङ्बा हे़क्क्याङ् के़रे़क् परिक्पा सुक्पाहाॽ, खे़प्मो मुर्र नु खाम्दोलि, काक् परिक्ले़न् नुबा कुनाम्गे़नुॽबा मारुक्हाॽ॥ 15 खे़ने़ॽग फुङ्इक्कोबा वाबुन्दाक्वा, ले़बनानबा कोःक्मालाम्बा के़गुङ्बा के़युबा वहःङ् सेसेबा कुजा के़नुॽबा च्वाःत्ने़रो॥ मे़न्छुमा— 16 थाङ्गे़त् पिसाङ्बा सुरित्ते, हुरे़ॽओ, लाङ्गे़त् पिसाङ्बा साम्मिःत्ते, आभुङ्इक्को पङे़ॽओ, हे़क्क्याङ् खे़ल्ले़ कुनाम्नुॽमा फुङ्नाम्मिन् के़रे़क् पिसाङ् से़ररो॥ लुङ्माॽ हिःप्तुङ्बे़न्, कुभुङ्इक्को ताररो! खे़म्ब्याङ् साॽरिक् नुःब्नुबा सिङ्सेॽहाॽ चररो! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.