सोलोमनरे़ कुसाम्लो 3 - लिम्बुमे़न्छ्याःल्ले़ कुसे़प्माङ् 1 से़न्दिक् थक्मा आङ्गाॽ आने़त्नाओ, हे़क्केःल्ले़ आङ्गाॽ लुङ्माॽ हिःप्तुङ्बान् से़प्माङ् माक्तुङ्लो, आङ्गाॽ खुने़ॽ कोःत्तुङ्लो कर आङ्गाॽ खुने़ॽ मे़दुमुङ्ङिन्लो॥ 2 आङ्गाॽ पोगाङ्ङाङ् ये़क्यक्को कोःत्तुङ्ल ओमे़त्तुङ्लो, खे़प्मोबा माराम्हाॽ नु लाम्दोहाॽओ खुने़ॽ हक्सुङ्लो॥ आङ्गाॽ लुङ्माॽ हिःप्तुङ्बे़न् कोःत्तुङ्लो कर आङ्गाॽ खुने़ॽ मे़ङ्घोबान्लो॥ 3 ये़क्यक् कम्ब्राङ् के़मे़प्पाहाॽरे़ मे़निसाङ्लो॥ आङ्गाॽ खे़ङ्हाॽ से़ःन्लाप्तुङ्सिङ्लो, “आङ्गाॽ लुङ्माॽ हिःप्तुङ्बे़न् थे खिनिॽ के़निसुम्बि?” 4 आङ्गाॽ खे़ङ्हाॽ पक्थाङ्सिङ्लो हे़क्क्याङ् मिसाक् नानाक् के़राङ्ङाङ्लक् वयाङ्लो हे़क्केःल्ले़ आङ्गाॽ लुङ्माॽ हिःप्तुङ्बे़न् तुमुङ्लो॥ आङ्गाॽ आम्मारे़ कुहिम्मो, आङ्गाॽ सावाःन्छिङ्ङाबा याक्फाङ्ङो मे़न्देॽए थारिक् आङ्गाॽ खुने़ॽ ते़म्सुङ्ङाङ् पेःक्मा मे़म्भाःक्पाङ्लो॥ 5 यरुसले़मबा मे़न्छुमासे! आङ्गाॽनु माङ्हुप् चोगे़म्मे़ॽओ, पे़ःङ्वा नु स्याःक्पे़ल्ले़ कुमिङ्ङो माङ्हुप् चोगे़म्मे़ॽओ खे़म्ब्याङ् अक्खे पाःत्ते़म्मे़ॽओ आन्छिगे लुङ्माॽ हिःप्ने़सिगे़बा पाःन्नो आन्हम्से़म्मिन्ने़ॽओ॥ सुम्सिगेक्पा साम्लो मे़न्छुमा— 6 ले़ङ्हङ्बाहाॽरे़ मे़सङ्घुबा साङ्सिङ् हे़क्तङ्बा सुक्पा नु मुर्रले़ कुनाम्नुॽमा इसेःङ्बा मुरे़क् खारे़क्पा ये़ःङ्घादे़न्नोलाम् के़दाबा कन् मिःक्खुॽ के़इक्सिङ्बाआङ् के़धाङ्बे़न् हाःत्ने़बे? 7 ओमे़त्ते़म्मे़ॽ, सोलोमन हाङ्ङिल्ले़ कुलाधान् तुक्पोङ् थक्लिहाङ् मना इस्राइलबा के़रे़क्नुःल्ले़ नुबा थक्सुबाहाॽ चिबुःत्म़ेबुःत्तुआङ् थक्सुबाहाॽरे़ खुनिॽ याङ्सोबाहाॽरे़ खुनिॽ लुप्हाॽ फे़न्ल पत्लो॥ 8 खे़ङ्हाॽ के़रे़क् ताभे याङ्मा के़ले़बा मे़जोक्लो, थङ्ङो खे़ङ्हाॽ ये़त्तिम्बा के़बोङ्बा थक्सुबासिरो॥ के़रे़क्ले़ खुनिॽ से़बङ्बो ताभे मे़हेसुरो हे़क्क्याङ् से़न्दिक् निङ्मिःल्ले़ आभप्पि फाॽआङ् खुने़ॽ मे़गोसुर मे़वाॽरो॥ 9 सोलोमन हाङ्ङिल्ले़ ले़बनाःन्बा सिङ्ङिन् तारुरो हे़क्क्याङ् आप्फेक् कुलागि कुलाधाःन् चोगुबारो॥ 10 कुदक्लाङ्हाॽ युप्पाःल्ले़ सुःप्मनाबा चोक्लो हे़क्क्याङ् नाःम्सिङ्मा ते़न्निन् साम्म्याङ्लाम्बा मे़जोगुआङ् वाॽरो॥ खे़ल्ले़ कुयुङ्मादे़न्निन् यरुसले़मबा मे़न्छुमाहाॽरे़ लुङ्माॽ पहिःम् मे़भयुबारो खे़न् पारान्ला तेःत्तिल्ले़ ते़प्मनाबा चोक्लो॥ 11 सियोनबा मे़न्छुमासे, फे़रे़म्मे़ॽओ हे़क्क्याङ् सोलोमन हाङ्ङिन् ओमे़त्ते़म्मे़ॽओ॥ कुम्मारे़ खुने़ॽ कुमेःक्खिम् ये़न्नो, निङ्वाॽ तामा नु सःप्मा ये़न्नो, खुने़ॽ खुःक्तुबा तिवाजोन् खुने़ॽ कुधे़गेःक्को पत्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.