सोलोमनरे़ कुसाम्लो 2 - लिम्बु1 आङ्गाॽग सारोनबा लोजि फुङ्आरो, ने़वाला लुम्मोबा ले़क्वा फुङ्आरो॥ ये़म्बित्छा— 2 तिङ्ग्रेक् लुम्मो खोगे़दे़प्पा ले़क्वा फुङ् हे़क्के मे़न्छ्याहाॽरे़ खुनिॽ लुम्मो लुङ्माॽ हिःप्तुङ्मे़न् वाॽरो॥ मे़न्छुमा— 3 ताम्भुङ् सिङ्बुङ्हाॽ लुम्मो लत्छा नाङ्सेॽ सिङ्बुङ् हे़क्के थाङ्बे़न्हाॽरे़ खुनिॽ लुम्मो लुङ्माॽ हिःप्तुङ्बे़न् वाॽरो॥ खे़ल्ले़ इःप्तुबा नाम्जिःक्खोॽ सिगाङ् युङ्मा आसिराॽ थाङ्लो खे़ल्ले़ कुजाॽइन् आङ्गाॽ साॽरिक् कुजानुॽर निसुङ्लो॥ 4 खुने़ॽ आङ्गाॽ कुजामा कुधुङ्मादे़न्नो तेॽराङ्लो हे़क्क्याङ् आसम्दाङ् लुङ्माॽ हिःम्मा निसान फत्छुरो॥ 5 चे़ल्ले़क्सेॽ खे़क्याःल्ले़ आङ्गाॽ के़धुम्मा चोगाङ्ङे़ॽओ, नाङ्सेॽइल्ले़ आङ्गाॽ आयाम् चाङ्जाङ् चोगे़ॽओ॥ लुङ्माॽ हिःम्मे़ल्ले़ आङ्गाॽ मे़न्धुम्मनाबा पोःक्खाङ्ङाङ् वाॽआरो॥ 6 कुभे़न्छाङ् हुक्किन् आध्गेक् सिगाङ् वाॽरो हे़क्क्याङ् कुजुप्साङ् हुक्किल्ले़ आङ्गाॽ हे़प्पारो॥ 7 यरुसले़मबा मे़न्छुमासे! आङ्गाॽनु माङ्हुप् चोगे़म्मे़ॽओ, पे़ःङ्वा नु स्याःक्पे़ल्ले़ कुमिङ्ङो माङ्हुप् चोगे़म्मे़ॽओ खे़म्ब्याङ् अक्खे पाःत्ते़म्मे़ॽओ आन्छिगे लुङ्माॽ हिःप्ने़सिगे़बा पाःन्नो आन्हम्से़म्मिन्ने़ॽओ॥ निसिगेक्पा साम्लो मे़न्छुमा— 8 आङ्गाॽ लुङ्माॽ हिःप्तुङ्बे़ल्ले़ कुइक्लान् खे़प्सुङ्लो, कोःक्मा फाङ्जङ् सम्धाङ् लोःक्ल पिन्लो हे़क्क्याङ् थे़गु माङ्वाहाॽ नाःक्सुर॥ 9 आङ्गाॽ लुङ्माॽ हिःप्तुङ्बान् चाःत्चाःप्पा पे़ःङ्वा हे़क्के लॽरो, इग्र थाङ्बे़न् खिरेबा कुइसिक् चोक्लो॥ खुने़ॽग आनिगे लुङ्धाक्किल्ले़ कुएगाङ् ये़प्लो, हे़क्क्याङ् पेधाःप्पोलाम्बा ओमरो खे़ब्याङ् पेधाःप्पोबा हङ्हङ्दाङ्बालाम् मिक्चो मॽरो॥ 10 आङ्गाॽ लुङ्माॽ हिःप्तुङ्बे़न् आङ्गाॽनु ताॽजे़ङ्लो॥ आङ्गाॽ लुङ्माॽ हिःप्ने़माए, पोगे़ॽओ, आङ्गाॽ लुङ्माॽ हिःप्ने़माए, आङ्गाॽनु फे़रे़ॽओ॥ ये़म्बित्छा— 11 चुङ्सिःक्मान् ले़क्ते़ पेरो, वहित् थामान्नाङ् मारे़बेरो, 12 इक्सादिङ् खाम्बेःक्मो फुङ्हाॽ फे़क्ते़आङ् युङ्लो, साम्लोमा ये़म्मिन् आम्भा कन्लो, आनिॽ लाजेॽओ पुत्तुःक्केहाॽ मे़बाःप्पा खे़म्दे़त्लो॥ 13 पःत्छेॽहाॽ तुम्मा इःत्ते़आङ् वाॽरो, सुरित्ते़न् चे़ल्ले़क्सेॽ फुङ्हाॽरे़ कुनाम्मिल्ले़ थिम्सुआङ् वाॽरो॥ आङ्गाॽ लुङ्माॽ हिःप्ने़माए, फे़रे़ॽओ, आङ्गाॽ पनु आनुमे, आङ्गाॽनु फे़रे़ॽओ॥ 14 याक्पेन् काॽरे़आङ् खे़ल्ले़क् पःक्खे़बा ते़न्नो के़जिङ्सिङ्बाआङ् के़युङ्बा आसाप्पे़त्त्रुःक्माने़रो, खे़ने़ॽ नुमा के़नारान् आङ्गाॽ ओसेःन्धाक्ताङ्ङे़ॽओ, खे़ने़ॽ सेःम्सेःम्बा के़इक्लान् खे़म् पाङ्घाङ्ङे़ॽओ! 15 आन्छिॽ चे़ल्ले़क्सेल्ले़ कुभुङ्फे़क्मेत् फे़क्मा ये़म्मो चे़ल्ले़क्सेॽ इक्ताप्पिन् फे़त्लाःम्मानुःल्ले़ तगिए खे़न् चुजुक्सा किधिबाहाॽ ते़म्से़से़ॽओ॥ मे़न्छुमा— 16 आलुङ्माॽ के़हिःम्बान् आङ्गाॽइन्नेरो हे़क्क्याङ् आङ्गाॽ खुने़ॽए़न्नारो॥ खुने़ॽग ले़क्वाभुङ्हाॽरे़ कुलुम्मो कुमे़ल्लुक् मे़ःन्दाहाॽ चाराम्सुसिरो, 17 तानाम्बा सुरित्ते़न् मे़न्हुए थारिक् खम्भ्याङ् खाधाम्मानुःल्ले़ तगि॥ लुङ्माॽ हिःप्ने़मे, नुःक्खे़ त्ये़ॽओ, बेतेरबा कोःक्माओ खिरेबान् नु पे़ःङ्वान् हे़क्के खे़न् हे़क्के खे़ने़ॽआङ् नुःक्खे़ त्ये़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.