सोलोमनरे़ कुसाम्लो 1 - लिम्बु1 सोलोमनरे़ के़रे़क्नुःल्ले़ नुबा कुसाम्लोहाॽ हाबा कन्लो— थिक्सिगेक्पा साम्लो मे़न्छुमा— 2 खे़ने़ॽ के़म्ब्राःल्ले़ आङ्गाॽ चुप् के़मे़त्तारो, खे़ने़ॽ के़लुङ्माॽ हिःप्मान् सेॽजःङ्वाःन्नुःल्ले़आङ् नुबा चोक्लो॥ 3 खे़ने़ॽ के़नाम्नुॽमान् चाॽरिक् सिराॽके़धाङ्बा चोक्, खे़ने़ॽ के़मिङ्ङिन् फुङ्नाम् हुङ्मनाबा हे़क्के लॽरो॥ खे़ल्ले़चोगुल्ले़ मे़न्छुमा हिन्जाॽहाॽरे़ खे़ने़ॽ लुङ्माॽ के़न्हिःप्लो॥ 4 आङ्गाॽ खे़ने़ॽनु तेॽराङ्ङे़ॽओ, आन्छिॽ खे़त्ने़त्छिआङ् पित्छिरो, खे़ने़ॽ आङ्गाॽ आहाङ् पोःक्खे़ॽओ हे़क्क्याङ् आङ्गाॽ खे़ने़ॽ के़याक्फाओ तेॽराङ्ङे़ॽओ॥ आन्छिॽ सोसोरिक् सःत्छिरो, सेॽजःङ्वाःन्नुःल्ले़आङ् यरिक् खे़ने़ॽ के़लुङ्माॽ हिःम्मे़न् इःत्छुरो॥ के़रे़क् मे़न्छुमहाॽरे़ खे़ने़ॽ लुङ्माॽ के़म्हिःप्लो॥ तेःङ्जुम्हाॽ— मे़न्छुमा— 5 यरुसले़ःम्मोबा मे़न्छुमासे! आङ्गाॽ माक्से़म्से़म्मा चोःक्कारो हे़क्केसाङ् आङ्गाॽ नुमा चोःक्कारो, केदारबा ये़ःङ्घादे़न्नो साःङ्गाहिम् हे़क्के माक्के़लॽमा, हे़क्केसाङ् सोलोमनरे़ कुहाङ्हिम्मोबा फोःन्दा हे़क्के पनुनुमा॥ 6 नाम्मिल्ले़ से़ःक्ताङ्ङाङ् माक्ताङ्मा पोःक्खाङ्बाल्ले़ चोगुल्ले़ के़निङ्वाॽमार ओमे़मत्ताङ्ङे़न्ने़ॽ, आम्भुॽ आन्साॽहाॽ आङ्गाॽनु खुनिॽ सिक् पोगे़आङ् वये़रो हे़क्क्याङ् खे़ङ्हाॽरे़ आङ्गाॽ चे़ल्ले़क्सेॽ इक्ताप्पो आङ्गाॽ याःम्बक् चोःक्मा मे़बाङ्घाङ्ङाङ् वये़रो॥ आङ्गाॽ आप्फेक् ओमत्छिङ्मा चोःक्सिङ्मा ये़म् मे़ङ्घोबान्लो॥ 7 आलुङ्माॽ के़हिःम्बे, आङ्गाॽ मे़त्ताङ्ङे़ॽओ के़मे़ल्लुक् मे़ःन्दा चाराम्से़ खे़ने़ॽ आत्तो के़देॽरुसिबे? ले़न्दिक्पा नाम्मो खे़ङ्हाॽ आत्ति मे़नाःम्सिङ्बाबे? खे़ब्याङ् वेॽ पित्कम्बाहाॽरे़ खुनिॽ पित्लुप्पो आङ्गाॽ खे़ने़ॽ कोःप्मार वाॽमा मे़बोङ्ने़न्लो॥ चुम्देङ्हाॽ— 8 मे़न्छुमाहाॽओ के़रे़क्नुःल्ले़ पनुनुमाए, थे खे़न् ते़न्निन् खे़ने़ॽ के़न्निसुम्बि? मे़ल्लुक् मे़ःन्दालुप्हाॽ तिम्दे़से़ॽर पेगे़ॽओ हे़क्क्याङ् पित्कम्बाहाॽरे़ खुनिॽ याक्साःल्ले़ कुबेसाङ् के़मे़ःन्दाक्हाॽ कमे़से़ॽओ॥ ये़म्बित्छा— 9 आङ्गाॽ लुङ्माॽ हिःप्ने़माए, फारो हाङ्ङिल्ले़ कुअन्लाःल्ले़ अन्माःन्नु खे़ने़ॽ तङ्ने़रो॥ 10 खे़ने़ॽ के़ने़दे़ङ्बो के़धेगेक् इःन् थाःल्ले़ नुबा निदे़त्लो हे़क्क्याङ् याङ्इत्छे हाराःल्ले़ के़निगिङ्मे़न् नुबा खे़म्दुआङ् पत्लो॥ 11 युप्पाःल्ले़ काप्तुबा साम्म्याङ् कौःन् आनिगे खे़ने़ॽ के़लागि थगुम्बे़रो॥ मे़न्छुमा— 12 आङ्गाॽ आहाङ्ङिन् आबाङे कुने़त्नाओ नाःम्सिङ्ङाङ् ने़स्से़ल्ले़ फुङ्नाम्मिल्ले़ कुनाम्नुॽमे़न् कुनाम्भ्वाःङ् से़रे़रो॥ 13 लुङ्माॽ हिःप्तुङ्बे़न् आसाङ्बेओ फोःम्मनाआङ् के़बप्पा पाङ्बःत् फुङ्मे़ल्ले़ कुसुङ्मे़न् हे़क्के लॽरो॥ 14 (लुङ्माॽ हिःप्तुङ्बे़न् एन-गदिबा चे़ल्ले़क्सेॽ इक्ताप्पो के़भे़क्पा ताम्भुङ्बा फुङ् कुइसिक् चोक्लो॥) ये़म्बित्छा— 15 आङ्गाॽ लुङ्माॽ हिःप्ने़माए, खे़ने़ॽ चाॽरिक् पनुनुमा के़जोःक्लो! चाॽरिक् पनुनुमा के़जोःक्लो! ने़त्छि के़मिक्हाॽ साप्पे़त्त्रुःक्माहाॽ हे़क्के लॽरो! मे़न्छुमा— 16 आङ्गाॽ आलुङ्माॽ के़हिःम्बे, खे़ने़ॽ साॽरिक् नुबा के़जोःक्लो! खे़ने़ॽग आङ्गाॽ चाॽरिक् आनिङ्वाॽ के़दासुरो! सरेःक्याःप्पान् आन्छिॽ ने़त्ना पोङ्लो॥ 17 साम्माङ्सिङ्ङिन् आन्छिॽ हिम्मोबा पे़रे़म्सिङ् पोङ्लो, आःङ्सिङ्हाॽ आन्छिॽ लिङ्खाम्बु पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.