रुथरे़ कुसाप्पन् 4 - लिम्बुबोअज नु रुथरे़ खुन्छिॽ मेःक्खिम् 1 बोअजे़न् पेआङ् ये़क्यक्कोबा यम्बा लाम्धेःत्तिल्ले़ कुबेसाङ् चुम्लुङ् के़बोङ्बादे़न्नो युङ्सिङ्॥ खे़प्मो एलिमेक्के़ल्ले़ के़रे़क्नुःल्ले़ निःत्ताङ्बा खे़न् कुगाॽइन् त्ये़, खे़ल्ले़ कुयाःम्बेओ बोअजे़ल्ले़ पान् पाःत्तुआङ् वये़॥ बोअजे़ल्ले़ खे़न् उःत्तुआङ् मे़त्तु, “कत्ना फे़रे़ॽआङ् युङे़ॽबा,” खुने़ॽ बोअजे़ल्ले़ कुबेसाङ् फे़रे़आङ् युङ्सिङ्॥ 2 बोअजे़ल्ले़ ये़क्यक्कोबा थिबोङ् तुम्भाक्पा ये़म्बित्छाहाॽ उःत्तुसिआङ् खे़प्मो युङ् पाङ्घुसि॥ खे़ङ्हाॽ के़रे़क् मे़युङ्सिङ् 3 खे़ब्याङ् बोअजे़ल्ले़ खे़न् निःत्ताङ्बा काॽइःन् मे़त्तु, “आनिॽ फुॽ एलिमेले़क्के़ल्ले़ लत्छा कुलक्थिक् लाजेःल्ले़ कुयाःम्बेओ खे़ने़ॽ के़निङ्वाॽ याक्लाॽबा॥ मोआबिहाॽरे़ खुन्छिॽ लाजेॽओलाम् नाओमिन् नुःक्खे़ फे़रे़आङ् वाॽ, हे़क्क्याङ् खे़न् कुलक्थिक् लाजेन् सङ्मा कुनिङ्वाॽ वाॽ॥ 4 कन् आङ्गाॽ आसुवाङ्बा तुम्भाक्साहाॽरे़ खुनिॽ तगि खे़ने़ॽ खे़न् लाजेन् थे़ॽरे़ॽ फाॽआङ् आङ्गाॽ खे़ने़ॽनु कन् पाःन्निन् पाःप्मा इःत्तुङ्ङाङ् वाॽ॥ निःत्ताङ्बा काॽइःल्ले़ चोःक्मा के़बोङ्बा याःम्बक्किन् खे़ने़ॽ चोगे़ॽ, कर खे़ने़ॽ के़न्जोगुन्ने़भग्र आङ्गाॽ मे़त्ताङ्ङे़ॽ, हे़क्क्याङ् आङ्गाॽ निङ्वाॽ खोसुङ्ॽ॥ थेआङ्भे़ल्ले़ खे़ने़ॽ के़एगाङ् निःत्ताङ्बा काॽइ आङ्गाॽआ॥” खे़ल्ले़ पाःत्तु, “निःत्ताङ्बा काॽइःल्ले़ चोःक्मा के़बोङ्बा याःम्बक्किन् आङ्गाॽ चोगुङ्ॽ॥” 5 खे़ब्याङ् बोअजरे़ मे़त्तु, “पोङ्ॽ, खे़ने़ॽ नाओमिःन्लाम्बा नु मोआबलाम् के़भे़म्मा मे़न्छुमा रुथलाम्बा खे़न् इक्ताप्पिन् के़इङुबा ये़न्नो के़मासिङ्बा एलिमेले़क्किल्ले़ कुलक्किन्नु सोसोरिक् खे़ल्ले़ कुमिङ्ङिन् मे़म्मारे़ लागि रुथे़न्नाङ् के़घोसुॽ॥” 6 कन् खे़प्सुआङ् खे़न् निःत्ताङ्बा काॽइःल्ले़ बोअजे़न् मे़त्तु, “हे़क्केने़भग्र आङ्गाॽ आघोमा लक्किन् खे़ने़ॽ ले़रुङ् पिने़, थेआङ्भे़ल्ले़ आस्साहाॽरे़ खे़न् इक्ताप्पो युक् चोःक्मा मे़ङ्घोसुम्बारे़त्छ, कल्ले़चोगुल्ले़ आङ्गाॽ चोःक्मा के़बोङ्बा निःत्ताङ्बा काॽइःल्ले़ कुयाःम्बक्किन् खे़ने़ॽ चोगे़ॽ॥ आङ्गाॽ कन् याःम्बक्किन् चोःक्मा मे़सुक्कान्॥” 7 खे़न् ये़म्मो लाजेॽसिङ्बुङ् इग्र याङ्साकुन्धे इङ्मा सङ्मा पोङ्ङिल्ले़ इग्र ले़क्मा पोङ्ङिल्ले़ के़सङ्बा मनाःल्ले़ लाङ्सुःप्पिन् फे़म्माआङ् के़इङ्बे़न् पिमा के़बोङ्बा वये़॥ ले़ङ्हङ् चोःक्मनाबान् से़क्खा के़बोङ्बा पाःन्निन् कम्भलॽरिक् इस्राइलिहाॽरे़ ओसेःन्धाङ् मे़जोगु॥ 8 खे़ल्ले़चोगुल्ले़ खे़न् निःत्ताङ्बा काॽइःल्ले़ बोअजे़न् मे़त्तु, “खे़ने़ॽ आबाङे के़लागि खे़न् इङे़ॽ॥” हे़क्क्याङ् खे़ल्ले़ कुलाङ्सुःप्पिन् फे़न्दु॥ 9 खे़ब्याङ् बोअजरे़ खे़प्मो के़वाॽबा तुम्भाक्पाहाॽ नु वेॽ मनाहाॽ मे़त्तुसि, “खे़निॽ के़रे़क् कन् पाःन्निन् के़निबा आसाःक्खि के़वयि, आङ्गाॽ आइन् नाओमिःन्लाम्बा एलिमेले़क हे़क्क्याङ् खुने़ॽ कुस्सा महलोन नु किल्योनरे़ च्याज्या मे़गत्तु, खे़ङ्हाॽ के़रे़क् आङ्गाॽ इङुङ्ङाङ् वाॽ॥ 10 कन्नु सोसोरिक्, महलोनरे़ मेमेदुमा कुमेत् मोआबलाम् के़भे़म्मा रुथे़न् आङ्गाॽ आमेत् पोङ्ॽ॥ हे़क्के पोङ्ङिल्ले़ के़सिबा के़घे़प्पा मनाःल्ले़ कुयाङ्सा कुन्धेहाॽ वाॽयाःक् हे़क्क्याङ् खुने़ॽ कुये़क्यक्को कुधाःक्हाॽ मे़वाॽ मे़याःक्॥ आइन्बा ये़न्नो कन् के़रे़क् पाःन्हाॽ के़निबा साःक्खि के़वयि॥” 11 खे़न् तुम्भाक्पाहाॽ नु मनाहाॽरे़ मे़बाःत्तु, “ओरो, आनिगे साःक्खि वयिगे़रो॥ थिन्दाङ् सायोबोराहाॽरे़ याकुबरे़ कुहिम्मिन् कुले़ःम् के़धिम्मा के़बिमा राहेल नु ले़आःन् हे़क्के खे़ने़ॽ के़मेःत्तिन् यहवे दाङ्बे़ल्ले़ चोगुररो, खे़ङ्हाॽग इस्राइलरे़ कुधाःक्सिरो॥ एप्राताओ खे़ने़ॽ के़मिङ्सो इङ्धाङ् पोङ्ल, हे़क्क्याङ् बेथले़हे़ःम्मो खे़ने़ॽ के़मिङ् तिःत्ल॥ 12 कन् सिसागे़न् मे़न्छ्यान्लाम्बा निङ्वाॽफुमाङ्ङिल्ले़ खे़ने़ॽ के़बिबा मुॽइदाङ्साःल्ले़ खे़ने़ॽ के़हिम्सयङ्ङिन् यहुदाःन्लाम् तामारे़ल्ले़ कत्तुबा ये़म्बित्छासा फारेसे़ल्ले़ कुहिम्यसङ् हे़क्के खे़ने़ॽ के़नुॽ के़दार चोगुररो॥” बोअजरे़ कुमुॽइदाङ्साहाॽ 13 कम्भलॽरिक् बोअजे़ल्ले़ रुथे़न् ते़न्धाम् मेःक्खिम् मे़त्तुआङ् हिम्मो तारु॥ आल्ल खुन्छिॽ सोरिक् इप्से़त्छिआङ् यहवे दाङ्बे़ल्ले़ खे़न् मुॽइसाम् पिरु हे़क्क्याङ् खुने़ॽ मे़न्छुक्मा पोःक्खे़आङ् लत्छा ये़म्बित्छासा कत्तु॥ 14 मे़न्छुमाहाॽरे़ नाओमिन् मे़मे़त्तु, “यहवे दाङ्बाल्ले़ कुनारा फोसे़ॽ! खुने़ॽ खे़ने़ॽ मे़न्छाॽधिक् के़बिरे़आङ् वाॽ॥ मे़न्छाॽइल्ले़ खे़ने़ॽ के़हिङ् के़गुम्॥ कन् ये़म्बित्छा अङे़ःक्वान् इस्राइलओ कुमिङ् के़इङ्बा पोङ्ल! 15 खे़ने़ॽ के़म्बाङ्लिःल्ले़ खे़ने़ॽ लुङ्माॽ के़दुक्॥ खे़ल्ले़ खे़ने़ॽ नुसि ये़म्बित्छा साहाॽनुःल्ले़आङ् यरिक् नुरिक् के़मे़त्ते़आङ् वाॽ॥ आल्ल खुने़ॽ लत्छा मे़न्छाॽ थिक् खे़ने़ॽ के़बिरे़आङ् वाॽ॥ खे़ल्ले़ खे़ने़ॽ के़हिङ्मन्नो के़सःत्ल के़यान् हे़क्क्याङ् काप्मुमा के़दुम्मिल्ले़ के़हिङ्ॽ॥” 16 नाओमिःल्ले़ चुक्पा अङे़ःक्वान् कुभक्तुङ्मो याङ्सिङ्, हे़क्क्याङ् खे़न् ओमे़त्तु हिङ्घु॥ 17 हिम्बेसाङ्बा मे़न्छुमाहाॽरे़ खे़न् ये़म्बित्छा सान् ओबेद मिङ् मे़वाःत्तु॥ खे़ङ्हाॽरे़ के़रे़क् मे़मे़त्तुसि, “नाओमिःल्ले़ कुस्सा ये़म्बित्छा थिक् सावाःन्छिङ्ङाङ् वाॽ॥” ओबेदे़न् यिसैरे़ कुम्बा नु दाउदरे़ कुन्धे़बा पोःक्खे़॥ 18 फारेसआङ्धो दाउद थारिक्पा मिङ्स्रान् अक्तङ्बा वाॽ—फारेसरे़ कुस्सा हेस्रोन, 19 हेस्रोनरे़ कुस्सा राम, रामरे़ कुस्सा अम्मिनादाब, 20 अम्मिनादाबरे़ कुस्सा नहसोन, नहसोनरे़ कुस्सा सल्मोन, 21 सल्मोनरे़ कुस्सा बोअज, 22 बोअजरे़ कुस्सा ओबेद, ओबेदरे़ कुस्सा यिसै हे़क्क्याङ् यिसैरे़ कुस्सा दाउद वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.