रुथरे़ कुसाप्पन् 3 - लिम्बुरुथे़न् नु बोअजे़न् हःक्सि हिप्मादे़न्नो तुम्सिॽ 1 कुभा ये़म् एगाङ् नाओमिःल्ले़ रुथे़न् मे़त्तु, “खे़ने़ॽ के़हिम् के़धाःङ् पोङ्मारे़ लागि खे़ने़ॽ के़हिम्साबाधिक् कोःप्मा पिमा आनिङ्वाॽ वाॽ॥ 2 बोअजे़न् आनिॽ आबाङे मना॥ खे़ने़ॽ खुने़ॽ कुयाःम्बक् के़जोःक्मा मे़न्छुमाहाॽनु याःम्बक् के़जोःक्ल के़वाॽ॥ आल्ल आङ्गाॽ आबाःन्निन् नुरिक्काङ् खे़प्से़ॽ॥ आइन् से़न्दिक् चानुक्मादे़न्नो खुने़ॽ हःक्सि हिप्तुर याक्॥ 3 खे़ने़ॽ वारुःम्सिङ्ङे़ॽ वाहप्सिङ्ङे़ॽ, कुनाम्गे़नुॽबा फुङ्नाम् हुःत्छिङ्ङे़ॽआङ् नुबा चाङ् चाक्खे़ॽ हे़क्क्याङ् खुने़ॽ हःक्सि हिप्तुबादे़न्नो पेगे़ॽ॥ कर खुने़ॽ चामा थुङ्मा मे़न्छुःत्ते थारिक् खे़ने़ॽ खे़प्मो के़वाॽ के़लॽबा खुने़ॽ निङ्वाॽ मे़घोसुन्ल॥ 4 खुने़ॽ इम्से़ पेःक्किल्ले़ खे़ने़ॽ खुने़ॽ कुइम्मादे़न्निन् ओमे़त्ते़ ने़स्से़ॽ॥ खे़न् एगाङ् पेगे़ॽआङ् खुने़ॽ कुलाङ् ले़प्माङ्बा कुघाम्देःत्तिन् फोःक्खे़आङ् खे़प्मोए ने़सिङ्ङे़ॽ॥ खे़ब्याङ् खे़ने़ॽ थे चोःक्मा पोङ्ॽ, खे़न् खुने़ॽए के़मे़त्॥” 5 रुथे़ल्ले़ मे़त्तु, “खे़ने़ॽ के़बाःत्तुबा हे़क्केए के़रे़क् आङ्गाॽ चोगुङ्ॽ॥” 6 रुथे़न् हःक्सि हिप्मादे़न्नो पे हे़क्क्याङ् कुन्नुःप्मे़ल्ले़ मे़त्तुबा हे़क्केए चोगु॥ 7 कुजा च थुङु सुरुआङ् बोअजे़ल्ले़ कुनिङ्वाॽ त्ये़॥ हःक्सि मे़लुप्सुआङ् ने़स्से़बादे़न्निल्ले़ कुबेसाङ् पेआङ् खुने़ॽ इप्से़॥ रुथे़न् याःक्याःक् स्वाःत्ताङ् त्ये़, खाम्देःत्तिन् फोःक्खुआङ् खुने़ॽ कुलाङ् ले़प्माङ् इप्से़॥ 8 से़न्दिक् खघप् बोअजे़न् सोरे़ हे़क्क्याङ् ले़ङ्सिङ्ङे़ल्ले़ मे़न्छुमाधिक् खुने़ॽ कुलाङ्ङिल्ले़ कुयाओ इप्से़आङ् ने़स्से़बा निसु॥ 9 खुने़ॽ सेःन्दोसु, “खे़ने़ॽ हाःत्ने़ग?” रुथे़ल्ले़ मे़त्तु, “आङ्गाॽ खे़ने़ॽ के़से़वारोमा रुथआरो, आदाङ्बे॥ खे़ने़ॽ आनिगे निःत्ताङ्बा आनिगे आप्फेक् मनाने़॥ आङ्गाॽ कम्ब्राङ् मे़प्मा लक्पे़न् खे़ने़ॽ के़हुक्को वाॽ॥ लुङ्माॽ तुक्ताङ्ङे़ॽआङ् आङ्गाॽ ते़न्धाम् मेःक्खिम् मे़त्ताङ्ङे़ॽ॥” 10 खुने़ॽ मे़त्तु, “खे़ने़ॽ यहवे दाङ्बे़ल्ले़ हाङ्वागे़न् मुॽइसाम् के़बिर, खे़ने़ॽ के़न्नुःप्मान् आक्ख्यारिक् नुरिक् के़मे़त्तु, खे़न्नुःल्ले़ यरिक् कन् पाःन्नो खे़ने़ॽ के़हिम्सयङ्हाॽ लुङ्माॽ के़दुक्तुसि हे़क्क्याङ् निङ्वाॽओ के़युक्खुसि॥ खे़ने़ॽ याङ्साकुन्धेसाबा इग्र कुभा याङ्गे़साॽबा थाङ्बे़न्ने़न्नु पेःक्मा के़सुक्तुबा वये़, कर खे़ने़ॽ हे़क्के के़न्जोगुन्॥ 11 आल्ल रुथए, खे़ने़ॽ के़निङ्वाॽ तुक्खे चामा मे़बोङ्ने़न्॥ खे़ने़ॽ के़बाःत्तुबा के़रे़क् पाःन्हाॽ आङ्गाॽ चोगुङ्ॽ॥ कन् ये़क्यक्कोबा के़रे़क् मनाहाॽरे़ खे़ने़ॽ सुम्बोधासामा के़जोक् फाॽआङ् मे़निसु॥ 12 से़क्खाए आङ्गाॽ निःत्ताङ्बा काॽइआ, आङ्गाॽ खे़ने़ॽ कम्ब्राङ् मे़प्माए पोङ्ॽ॥ कर कन्नुःल्ले़ आल्लसाङ् निःत्ताङ्बा लत्छा वेॽ काॽइधिक् वाॽ॥ 13 आल्ल से़न्दिक् नाम्दाःत्तात् आम्भा कप्मोए ने़स्से़ॽ॥ तानाम् खाओःत्ताङ् खे़ने़ॽ हुक्को ताःक्मा खुने़ॽ ते़न्नि मे़दे़न्ने़न्नि, आङ्गाॽ कोःत्तुङ्ॽ॥ कर खे़ने़ॽ के़लागि निःत्ताङ्बा काॽइःल्ले़ चोःक्मा के़बोङ्बा याःम्बक्किन् मे़जोगुन्ने़भग्र यहवे दाङ्बे़न् कुहिङ्वे़त् वाॽबा कुइसिक् कन् याःम्बक्किन् आङ्गाॽ चोगुङ्ॽ॥ आल्ल तानाम् थारिक् हाबा कॽयो ने़स्से़ॽ॥” 14 हे़क्केलॽरिक् रुथे़न् खे़प्मोए बोअजे़ल्ले़ कुलाङ् ले़प्माङ् इप्से़॥ कर तुम्बाःङ् वबाःङ् खाओःप्मानुःल्ले़ तगि हाःत्ले़आङ् मे़न्निए पोगे़, थेआङ्भे़ल्ले़ खुने़ॽ खे़प्मो त्ये़बा पाःन्निन् हाःत्ले़आङ् निङ्वाॽ मे़घोसुन्ल के़लॽबा बोअजे़ल्ले़ कुनिङ्वाॽ वये़॥ 15 बोअजे़ल्ले़ खुने़ॽ मे़त्तु, “खे़ने़ॽ के़हे़प्सुबा पःत्थाङ्ङिन् खाम्बाङ्ङो फे़से़आङ् ताःक्ते़ॽ॥” रुथे़ल्ले़ हे़क्केए चोगु॥ बोअजे़ल्ले़ खप्मे़न् फोलक् तुक्सि यारिक् हःक्सि खे़प्मो थे़क्तु पिरु हे़क्क्याङ् कक्के़न् फोःक्खुआङ् कुभक्ताङ्ङो कुःत्तुदेसु॥ खे़न् कुयुआङ् रुथे़न् ये़क्यक्को नुःक्खे़॥ 16 हिम्मो के़रे़द्ये़ःल्ले़ खुने़ॽ कुन्नुःप्माल्ले़ सेःन्दोसु, “आस्साए, हे़न् पोःक्खे़ग?” बोअजरे़ चोगुबा के़रे़क् पाःन्हाॽ रुथे़ल्ले़ पाःत्तु॥ 17 खे़ल्ले़ पाःत्तु, “खुने़ॽ आङ्गाॽ कन् फोलक् तुक्सि हःक्सि पिराङ्॥ खुने़ॽ थेआङ् मेःन्ने आङ्गाॽ आन्नुःप्माल्लो मे़बाङ्घाङ्ङे़न्॥” 18 नोओमिःल्ले़ खुने़ॽ मे़त्तु, “रुथए, आल्ल नासि थःत्ते़ॽआङ् युङे़ॽ आक्खे पोङ्ङि, ओमे़त्ते़ॽर वये़ॽ॥ आइन् कन् पाःन्निन् निःन्धो मे़न्जोःक्के बोअजे़न् नाःम्सिङ्मा मे़घोने़न्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.