रुथरे़ कुसाप्पन् 2 - लिम्बुबोअजरे़ कुइक्ताप्पो रुथे़न् 1 नाओमिःल्ले़ लत्छा बोअज मिङ् के़वाःप्पा कुमनाधिक् वये़॥ नाओमिःल्ले़ कुये़म्बा एलिमेले़क्के़ल्ले़ कुहिम्सयङ्बा लत्छा याङ्साकुन्धेसाबा थिक् वये़॥ 2 थिक्यान् मोओबलाम् के़भे़म्मा रुथे़ल्ले़ नाओमिन् मे़त्तु, “आङ्गाॽ इक्ताप्पाहाॽओ पेःक्काआङ् खे़ॽयो याःम्बक् के़जोःक्पा मनाहाॽरे़ मे़ले़रु मे़धबा कुजाहाॽ फुक्खुङ् तारुङ्बि? कुभारे़ग आङ्गाॽ याःम्बक् चोःक्मा मे़भाःक्कालाॽबे?” नाओमिःल्ले़ मे़त्तु, “पोङ्, आस्साए हे़क्केए चोगे़ॽ॥” 3 हे़क्क्याङ् रुथे़न् इक्ताप्पो पेआङ् याःम्बक् के़जोःक्पाहाॽरे़ खुन्छिॽ एगाङ् एगाङ् खे़ङ्हाॽरे़ मे़ले़रु मे़धबा चादाप्माहाॽ खम्मा हेःक्तु॥ हे़क्क्याङ् खे़न् इक्ताप्पिन् एलिमेले़क्के़ल्ले़ कुहिम्सयङ्बा बोअजरे़ए कुइक्ताप् ने़स्से़॥ 4 कुभा ये़म् एगाङ्, बोअजे़न् आबाङे बेथले़हे़मलाम् के़रे़द्ये़ हे़क्क्याङ् याःम्बक् के़जोःक्पाहाॽ तुमुसिआङ् मे़त्तुसि, “यहवे दाङ्बान् खिनिॽनु वाॽररो॥” खे़ङ्हाॽरे़ खुने़ॽ मे़मे़त्तु, “यहवे दाङ्बे़ल्ले़ खे़ने़ॽ मुॽइसाम् के़बिर!” 5 खे़ब्याङ् बोअजे़ल्ले़ याःम्बक् के़जोःक्पाहाॽओबा यम्बा मनान् सेःन्दोसु, “खे़न् चुक्मे़न् हाःत्निबे?” 6 से़वारोबाल्ले़ मे़त्तु, “खे़न् मोआबलाम्बा नाओमिःन्नु के़भे़म्मा वेॽ लाजेॽबा मे़न्छुमारो॥ 7 याःम्बक् के़जोःक्पाहाॽरे़ खुन्छिॽ एगाङ् फन्छिङ्माआङ् के़माबा के़याःक्पा कुजाहाॽ सिला कोःप्मा फाःक्ताङ्ङे़ॽ फाॽआङ् खुने़ॽ आङ्गाॽ मे़त्ताङ्॥ खुने़ॽ आन्देन् तानाम्माङ्धो याःम्बक् चोःक्नु याक् हे़क्क्याङ् आल्लो खारक् नाःम्सिङ्मारे़ लागि नाम्जिःक्खोॽओ युङ्सिङ्ङाङ् युङ्ॽ॥” 8 बोअजे़ल्ले़ रुथे़न् मे़त्तु, “आङ्गाॽ खे़ने़ॽ थे़माइ सुजा पिने़ ल? आङ्गाॽ आइक्ताप्पोरक् याःम्बक् चोगे़ॽ, वेॽ आत्तिआङ् मे़बेगे़न्ने़ॽ॥ कॽयो याःम्बक् के़जोःक्मा मे़न्छ्याहाॽनु याःम्बक् चोगे़ॽ॥ 9 खे़ङ्हाॽरे़ खुन्छिॽ याःम्बक्किन् ओमे़त्ते़ॽ हे़क्क्याङ् खे़ङ्हाॽरे़ याःम्बक् मे़जोगुर मे़याक्पादे़न्नो वये़ॽ॥ खे़ने़ॽ तुक्खे के़मे़न्जाःत्ने़ल्ल फाॽआङ् आङ्गाॽ आमनाहाॽ मे़त्तुङ्सिङ्ङाङ् वाॽ॥ हे़क्क्याङ् खे़ने़ॽ के़वामिःक्ने़भग्र पेगे़ॽआङ् मनाहाॽरे़ मे़भाःत्तु मे़युक्खुबा कुःन्दाओबा च्वाःत्तिन् थुङे़ॽ॥” 10 खे़ब्याङ् रुथे़न् खाम्बाङ्ङो साबन् फन्छिङ् हे़क्क्याङ् से़वा मे़त्तुआङ् बोअजे़न् मे़त्तु, “थेआङ् आङ्गाॽ आलागि खे़ने़ॽ कम्भ्यारिक् साॽरिक् निङ्वाॽ के़जोगुबाबे? आङ्गाॽ वेॽ लाजेॽबा मे़न्छुमान् थेआङ् लुङ्माॽ के़दुक्काबाबे?” 11 बोअजे़ल्ले़ मे़त्तु, “खे़ने़ॽ के़ये़म्बाःन् मासिङ्ङाङ् खे़ने़ॽ के़न्नुःप्मान् नुरिक् के़मे़त्तुबा पाःन्निन् आङ्गाॽ खे़प्सुङ्ङाङ् वाॽ॥ खे़ने़ॽ के़म्बा के़म्मा नु आबाङे के़लाजेन् के़ले़रुआङ् आभे़ल्ले़आङ् कुसेःन् मे़न्निएबा मनाहाॽरे़ खुन्छिॽ लुम्मो के़द्ये़आङ् के़युङ्बान् आङ्गाॽ निसुङ्ॽ॥ 12 खे़ने़ॽ के़जोगुबा के़याःम्बक्किल्ले़ थुम्घोन् निङ्वाॽफुमाङ्ङिल्ले़ के़बिर॥ इस्राइलबा निङ्वाॽफुमाङ् यहवे दाङ्बाल्ले़ कुग्रम्बाङ्ङो खे़ने़ॽ के़इःम्सिङ्ङाङ् के़वाॽ, खे़ने़ॽ खोमा के़बोङ्बा थुम्घोन् खुने़ॽ के़बिर!” 13 रुथे़ल्ले़ मे़त्तु, “खे़ने़ॽ आङ्गाॽ साॽरिक् लुङ्माॽ के़दुक्का, आङ्गाॽ खे़ने़ॽ लत्छा के़योःग्माआङ् मेःन्ना, हे़क्केसाङ् आङ्गाॽनु थिक्ने़त्छि पाःन्हाॽ के़बाःत्तुआङ् आङ्गाॽ आनिङ्वाॽ त्ये़र के़जोगु॥” 14 तःक् चामा ये़म् पोःक्खे़ल्ले़ बोअजे़ल्ले़ रुथे़न् मे़त्तु, “फे़रे़ॽ, खरे़ःङ्ङिन् च्ये़ॽ, खरे़ःङ्ङिन् कुवाओ हुम्से़ॽआङ् च्ये़ॽ॥” हे़क्क्याङ् खुने़ॽ याःम्बक् के़जोःक्पाहाॽनु युङ्सिङ्॥ बोअजे़ल्ले़ खुने़ॽ कुभा नमनाबा कुजाजि पिरु॥ खुने़ॽ कुसाप्पोक् खाघा च हे़क्क्याङ् आल्लसाङ् चामा कुजा नरे़॥ 15 खे़न् एगाङ् खुने़ॽ पोगे़आङ् चा फुङ्से़ पे॥ खे़ब्याङ् बोअजे़ल्ले़ कुयाःम्बक् के़जोःक्पा मनाहाॽ अक्तङ्बा इङ्जाङ् पिरुसि, “कुजा के़हे़गुम्माङ् के़युक्खुम्बा चाधःङ्माहाॽरे़ कुलुम्मोआङ् खे़न् सिला कोःप्मा फाःक्ते़म्मे़ॽ, खुने़ॽ मे़धेःक्ते़म् मे़साक्ते़म्मिन्ने़ॽ, 16 खे़न्नुःल्ले़ वेॽ के़घेःक्खुम्बा चाधःङ्माहाॽ लाम्बाआङ् कुभा कुजा खुने़ॽ ले़रे़म् पिरे़म्मे़ॽ हे़क्क्याङ् खे़ङ्हाॽ खुने़ॽ सुम्मा फाःक्ते़म्मे़ॽ॥” 17 अक्खेलॽरिक् रुथे़ल्ले़ युःन्छिक् थारिक् इक्ताप्हाॽओ सिला कोःत्तु खे़न् कोःत्तुबा कुदाप्माहाॽ नुगुल्ले़ फोलक् ङासि यारिक् कुजा लःन्दे़॥ 18 हे़क्क्याङ् खे़न् कुःत्छिङ्ङाङ् खुने़ॽ ये़क्यक्को फे़रे़, खे़ब्याङ् खुने़ॽ फुक्खु तारुबा यरिक् सिला कुजान् कुन्नुमे़ल्ले़ निसु॥ खे़न् एगाङ् रुथे़ल्ले़ आप्फेक् चआङ् नन्छुबा कुजाःन्नाङ् लःत्तुआङ् कुन्नुःप्मान् पिरु॥ 19 कुन्नुःप्मा नाओमिःल्ले़ खुने़ॽ सेःन्दोसु, “कभ्यारिक् कुजान् खे़ने़ॽ आइन् आत्ति के़भुक्खुबे? खे़ने़ॽ हाःत्ले़ कुइक्ताप्पो याःम्बक् के़जोगे़? खे़ने़ॽ लुङ्माॽ के़दुक्पा मनाःङ्ग मुॽइसाबारो, निङ्वाॽफुमाङ्ङिल्ले़ खे़न् मुॽइसाम् पिरुर!” कल्ले़चोगुल्ले़ खुने़ॽ बोअजरे़ कुइक्ताप्पो याःम्बक् चोगे़बा पाःन्निन् कुन्नुःप्मा नाओमिन् चे़क्तु॥ 20 हे़क्क्याङ् नाओमिःल्ले़ पाःत्तु, “यहवे दाङ्बे़ल्ले़ बोअजे़न् हाङ्वागे़न् मुॽइसाम् पिरुर, यहवे दाङ्बाल्ले़ चोगुबा माङ्हुप्पिन् खुने़ॽ आनिॽ कुहिङ्वे़त् के़वाॽबा नु आनिॽ हिम्सयङ्बा के़सिबा के़रे़क्ले़ खुनिॽ सम्धाङ् के़त्तुॽ॥ खे़न् मनान् आधे़ॽधे़ॽबा आनिॽ आबाङे निःत्ताङ्बा काॽइरो॥ खुने़ॽग आनिॽ ओमे़प्माए के़बोङ्बाआङ्लो॥” 21 रुथे़ल्ले़ पाःत्तु, “खे़न्नुःल्ले़ वेॽ चा हे़क्मा मे़न्जुःत्ते थारिक् खुने़ॽ कुमनाहाॽनु सोरिक् चासुम्मा याःम्बक् चोगे़ॽ मे़त्ताङ्ङाङ् वाॽ॥” 22 नाओमिःल्ले़ रुथे़न् मे़त्तु, “ओवा आस्साए, बोअजरे़ कुयाःम्बक् के़जोःक्मा मे़न्छुमाहाॽनु खे़ने़ॽ याःम्बक् चोगे़ॽ॥ कुभा वेॽ मनाःल्ले़ कुइक्ताप्पो के़बेःक्किल्ले़ खे़ने़ॽ तुक्खे चाःप्मा के़म्सुक्॥” 23 कल्ले़चोगुल्ले़ के़रे़क् मासि नु हःक्सि हे़क्मा मे़न्जुःत्ते थारिक् रुथे़ल्ले़ बोअजरे़ कुइक्ताप्पो याःम्बक् चोगु हे़क्क्याङ् खुने़ॽ आबाङे कुन्नुःप्मान्नु युङे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.