रुथरे़ कुसाप्पन् 1 - लिम्बुएलिमेले़क नु कुहिम्सयङ्हाॽ 1 उन्छेःन् खासे़न्लोःम्बा मे़मे़त्तुसिबा लाम्लोबाहाॽरे़ युक् मे़जोगुबा ये़म्मो लाजेॽओ साक् पोगे़, हे़क्क्याङ् यहुदा लाजेॽबा बेथले़हे़मलाम् कुभा मना थिक्ले़ कुमेःत्तिन् नु कुस्सा ये़म्बित्छा ने़त्छि तेॽरुसिआङ् मोआबिहाॽरे़ खुन्छिॽ लाजेॽओ कुभा ये़म्ले़ लागि युङ्से़ पे॥ 2 खे़न् मनाःल्ले़ कुमिङ् एलिमेले़क वये़॥ खे़ल्ले़ कुमेःत्तिल्ले़ कुमिङ् नाओमि वये़ हे़क्क्याङ् खे़ल्ले़ कुस्सा ये़म्बित्छाहाॽरे़ खुन्छिॽ मिङ् महलोन नु किल्योन वये़॥ खे़ङ्हाॽ यहुदा बेथले़हे़मबा एप्राति थाःक्कोबा मे़वये़॥ खे़ङ्हाॽ मोआब लाजेॽओ मे़बे, हे़क्क्याङ् आम्भा खे़प्मो युङ्मा मे़हेःक्ते़॥ 3 एलिमेले़क्के़न् मासिङ् हे़क्क्याङ् नाओमिन् एःक् कुस्सा ये़म्बित्छा ने़त्छिनु युङ्मा हेःक्ते़॥ 4 खे़न् ने़प्फु फुॽनुसाॽहाॽ ओर्पा नु रुथ मिङ् के़वाःप्मा मोआबि मे़न्छ्याहाॽनु मेःक्खिम् चोगे़सि॥ खे़न् एगाङ् हप्मे़न् तङ्बे थिबोङ् याङ्सि 5 महलोन नु किल्योन ने़प्माङ् माने़सि॥ आल्ल नाओमिन् ये़म्बा नु ये़म्बित्छासाहाॽ मेःन्ने एःक्से़त्छा पोःक्खे़रो॥ नाओमिन् नु रुथे़न् बेथले़हे़म नुःङ्सिॽ 6 कुभा ये़म् एगाङ् यहवे दाङ्बे़ल्ले़ कुमनाहाॽ हाङ्वागे़न् मुॽइसाम् पिरुसिबाल्ले़ चोगुल्ले़ याम्मो पोगुगे़न् कुजा थोःक्ते़बान् नाओमिःल्ले़ खे़प्सु॥ खुने़ॽ कुम्बाङ्लिहाॽनु मोआब लाजेॽलाम् आबाङे कुलाजेॽओ याङ्ना नुःङ्मारे़ लागि ताम्सिङ् चोगे़र यागे़॥ 7 खे़ब्याङ् खुने़ॽ कुम्बाङ्लिहाॽ याङ्सिङ्ङाङ् खुने़ॽ युङे़बा ते़न्निन् ले़रु, हे़क्क्याङ् आबाङे कुहिम् यहुदाबा लाम्मो थासिङ्॥ 8 खे़ब्याङ् नाओमिःल्ले़ खुने़ॽ कुम्बाङ्लिहाॽ लाम्मो मे़त्तुसि, “खे़न्छिॽ आबाङे पामारे़ खुन्छिॽ हिम्मो नुःक्खे़से़ॽ॥ खे़न्छिॽ आङ्गाॽ हे़क्क्याङ् आस्साहाॽ याप्मि नुरिक् आग्मे़त्ते़, हे़क्केलॽरिक्के यहवे दाङ्बे़ल्ले़ खे़न्छिॽ के़नुॽसि के़दासिर चोगुर॥ 9 हे़क्क्याङ् खुने़ॽ खे़न्छिॽ ने़प्माङ्ले़ याम्मो मेःक्खिम् के़जोःक्सुल्ले़ खे़न्छिॽ ये़म्बाहाॽरे़ खुन्छिॽ हिम्हाॽओ कम्ब्राङ् के़मे़त्छिर॥” खे़ब्याङ् खुने़ॽ खे़ङ्हाॽ चुप् मे़त्तुसि, हे़क्क्याङ् खे़ङ्हाॽ उःक्काङ् उःक् मे़हाबे़॥ 10 खे़न् एगाङ् खुन्छिॽ लॽरे़सि, “आन्छिगे खे़ने़ॽ के़मनाहाॽओ खे़ने़ॽनुए पित्छिगे़॥” 11 नाओमिःल्ले़ मे़त्तुसि, “मेःन्ना, आस्सासे, खे़न्छिॽ माबा हिम्मो के़नुःङ्सिर पोङ्ॽ॥ खे़न्छिॽ थेरो फाॽआङ् आङ्गाॽनु पेःक्मा के़गोःत्छिबाबे? खे़न्छिॽ ये़म्बा पोङ्मारे़ लागि आङ्गाॽ याम्मो ये़म्बित्छासा कप्मा मे़सुक्कान्॥ 12 हिम्मो नुःक्खे़से़ॽ॥ आङ्गाॽ काप्मुमा तुम्साङ् चुराङ्ङाङ् वाॽआ, आङ्गाॽ याम्मो मेःक्खिम् चोःक्मा मे़सुक्कान्॥ हे़क्तङ्बा निङ्साङ् चोःक्मा लाम् वाॽ हे़क्क्याङ् आइन् से़न्दिक्सा मेःक्खिम् चोःक्काआङ् ये़म्बित्छासा कप्मा सुक्तुङ्साङ् खे़ङ्हाॽ मे़बोआङ् यम्बा मे़बोङ् थे़म्बारे़ 13 खे़न्छिॽ हाङ्मा के़सुक्सुआङ्बि? हे़क्क्याङ् आङ्गाॽनु मेःक्खिम् मे़न्जोःक्के वाॽमा के़सुक्सुबि? मेःन्, आस्सासे, खे़न् पोङ्माए मे़न्छुक्मनाबा पाःन्लो॥ यहवे दाङ्बान् आङ्गाॽ आदक्ले़ङ्वाओ वाॽबाल्ले़ चोगुल्ले़ खे़न्छिॽनुःल्ले़आङ् साॽरिक् आङ्गाॽ के़साक्पा तुमुङ्ङाङ् वाॽ॥” 14 खे़ब्याङ् खे़ङ्हाॽ याम्मो उःक्काङ् उःक् मे़हाबे़॥ खे़न् एगाङ् ओर्पाःल्ले़ कुन्नुःप्मान् चुप् मे़त्तुआङ् खुने़ॽ आबाङे कुमनाहाॽओ नुःक्खे़बे, कर रुथे़न् कुन्नुःप्मे़न्नु खे़ःम्सिङ्ङाङ् पत्छे़॥ 15 नाओमिःल्ले़ रुथे़न् मे़त्तु, “ओमे़त्ते़साॽरे़, खे़ने़ॽ के़न्ने़ॽ आबाङे कुगाॽइहाॽओ नु कुमाङ् साम्माङ्हाॽओ नुःक्खे़आङ् पे, खे़ने़ॽआङ् नुःक्खे़ पेगे़ॽ॥” 16 कर रुथे़ल्ले़ खुने़ॽ मे़त्तु, “ले़राङ्ङे़ॽ फाॽआङ् आङ्गाॽ के़साक्पा मे़जाःत्ताङ्ङिन्ने़ॽ॥ आङ्गाॽ खे़ने़ॽनुए पेःक्मा फाःक्ताङ्ङे़ॽ॥ खे़ने़ॽ आत्ति के़बेःक् हे़क्क्याङ् के़युङ्, आङ्गाॽ खे़प्मोए पेःक्का हे़क्क्याङ् युङ्ङा॥ खे़ने़ॽ के़गाॽइहाॽ आङ्गाॽ आगाॽइ मे़बोङ्, खे़ने़ॽ के़निङ्वाॽफुमाङ्ङिन् आङ्गाॽ आनिङ्वाॽफुमाङ् पोङ्ॽ॥ 17 खे़ने़ॽ आत्ति के़मासिङ्, आङ्गाॽ खे़प्मोए मासिङ्ङा हे़क्क्याङ् खे़प्मोए मे़लुप्पार॥ सिमे़ल्ले़रक् आङ्गाॽ खे़ने़ॽलाम्बा लाःत्लाःत् चोःक्का, वेॽ पाःन्निल्ले़ लाःत्लाःत् पोङ्ङाने़भग्र निङ्वाॽफुमाङ्ङिल्ले़ कुमाङ्दे साङ्ग्राःन् आङ्गाॽ आसम्धाङ् चुक्ल॥” 18 रुथे़ल्ले़ आङ्गाॽनुए पेःक्मा से़क्खाबा निःन्धो चोगु सुरुरे़त्छ के़लॽबा कुसिङ् निःत्तुआङ् नाओमिःल्ले़ याम्मो वेॽ थेआङ् मे़बाःत्तुन्॥ 19 हे़क्क्याङ् खुन्छिॽ ने़प्माङ् लाम् थाने़त्छि, हे़क्क्याङ् बेथले़हे़म के़रे़ फे़रे़त्छि॥ आल्ल बेथले़हे़ःम्मो खुन्छिॽ के़रे़सिल्ले़ ये़क्यक्को के़रे़क् पिसाङ् कन् पाःन्निन् इङे़॥ मे़न्छुमाहाॽ अक्खेलॽरिक् पान् सेःन्दोमा मे़हेःक्ते़, “थे कन् से़क्खा नाओमिःन्नेबि?” 20 खुने़ॽ मे़त्तुसि, “आङ्गाॽ नाओमि आम्मे़त्ते़म्मिन्ने़ॽ कर मारा आमे़त्ते़ॽ, थेआङ्भे़ल्ले़ मुक्साम्दाङ्बा निङ्वाॽफुमाङ्ङिल्ले़ आङ्गाॽ आहिङ्मे़न् निङ्वाॽ के़बङ्बा चोगुआङ् वाॽ॥ 21 आङ्गाॽ कप्मोनु पेगाङ्ङिल्ले़ आङ्गाॽ के़रे़क् पाःन्हाॽ कत्तुङ्, कर आल्लो आङ्गाॽ यहवे दाङ्बे़ल्ले़ थेआङ् मेःन्ने नुःक्ताङ् फे़त्ताङ्ङाङ् वाॽ॥ आल्ल आङ्गाॽ मुक्साम्दाङ्बा निङ्वाॽफुमाङ्ङिल्ले़ खुम्दिङ् पिराङ्ङाङ् वाॽ हे़क्क्याङ् आङ्गाॽ आसम्धाङ् तुक्खे लाक्खेहाॽ तारुआङ् वाॽइल्ले़ आङ्गाॽ थेआङ् नाओमि आग्मे़प्पाबे?” 22 कम्भलॽरिक् नाओमिन् कुम्बाङ्लि मोआबि रुथे़न्नु सोरिक् मोआबलाम्बा नुःक्खे़ फे़रे़॥ बेथले़हे़ःम्मो खुन्छिॽ के़रे़ फे़रे़सिल्ले़ खारक् हःक्सि हे़क्मा मे़हेःक्तुर मे़यागे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.