रोमि 9 - लिम्बुनिङ्वाॽफुमाङ्ङिल्ले़ सेगुसिबा सुवाङ् 1 इङ्गाॽ पाःप्मा निङ्वाॽ इःत्तुङ्बा पाःन्निन् से़क्खाएरो॥ इङ्गाॽ ख्रिस्तरे़ कुमनाआ हे़क्क्याङ् इङ्गाॽ इङ्ले़क् मे़बाःत्तान्लो॥ आघासिङ्ङिन् नु सेसेमाङ्ङिल्ले़ इङ्गाॽ पाःत्तुङ्बा पाःन्निन् से़क्खाए चोक्लो फाॽआङ् निःन्धो चोःक्सुॽरो॥ 2-3 आमिःम् इस्राइलि फुॽनुसाॽ नु ने़ॽनुसाॽहाॽरे़ खुनिॽ लागि इङ्गाॽ निङ्वाॽओ तुक्खेःल्ले़ साॽरिक् याःन्दाङ्ङाङ् वाॽआरो॥ आबाङे आसुवाङ् इस्राइलिहाॽरे़ से़न्लप् खोमा मे़सुक्तुल्ले़ग इङ्गाॽ खुम्दिङ्ङो थामा नु ख्रिस्तलाम् लाःत्लाःत् पोङ्मा सुक्ताङ्बामे़न्॥ 4 निङ्वाॽफुमाङ्ङिल्ले़ इस्राइलिहाॽ आबाङे कुस्सा पोङ्से़ सेगुसिआङ् कुमिमिदिङ्ङिन् खे़ङ्हाॽ ओसेःन्धाक्तुसि॥ हे़क्क्याङ् खे़ङ्हाॽनु माङ्हुप्हाॽ चोगुआङ् साम्योथिम्मिन् पिरुसि॥ खे़ङ्हाॽए निङ्वाॽफुमाङ्ङिल्ले़ माङ्हिम्मोबा से़वा चोःक्मान् नु यरिक् माङ्हे़क्हाॽ पिरुसिरो॥ 5 कुमिङ् के़से़बा अब्राहाम, इसहाक नु याकुबे़न् खे़ङ्हाॽरे़ आबाङे खुनिॽ ताक्थे़बासिरो, हे़क्क्याङ् ये़सु ख्रिस्ते़न् मे़न्छाम्गे़न् थक्को खुनिॽ सुवाङ्ङोए सावाःन्छिङ्लो॥ खुने़ॽए के़रे़क् सम्दाङ् हाङ् के़जोःक्पा निङ्वाॽफुमाङ्लो॥ सदादिङ् कुनारा मे़भोसुररो! आमे़न्॥ 6 कङ्ग निङ्वाॽफुमाङ्ङिल्ले़ खे़ङ्हाॽनु चोगुबा माङ्हे़क्हाॽग मे़गे़रे़म्बा मेःन्लो, थेआङ्भे़ल्ले़ इस्राइल सुवाङ्लाम्बा सागे़वाःन्छिङ्बाहाॽ के़रे़क्क से़क्खाबा इस्राइलि मेःन्छिरो॥ 7 अब्राहामरे़ कुमुॽइदाङ्सा मे़बोङ्ङिल्ले़सा के़रे़क् से़क्खाबा कुस्सा मे़म्बोङ्ने़न्लो॥ कर साम्योसाप्लाओ अक्खेलॽरिक् साप्ते़आङ् पत्, “माङ्हे़क् चोगुङ्बा के़स्सा इसहाकलाम्मे के़मुॽइदाङ्साहाॽ मे़बोङ्लो॥” 8 कन् फाॽइङ्ग अब्राहामरे़ नासिङ्गे़न् कुधक्कोलाम् सागे़वाःन्छिङ्बाहाॽ निङ्वाॽफुमाङ्ङिल्ले़ कुस्सासि के़लॽबा पान् मेःन्लो, कर निङ्वाॽफुमाङ्ङिल्ले़ पिने़ फाॽआङ् पिरुबा माङ्हे़क्लाम्बा सागे़वाःन्छिङ्बाहाॽए अब्राहामरे़ से़क्खाबा कुमुॽइदाङ्सासिरो॥ 9 खे़न् माङ्हे़क्किल्ले़ अक्खे पाःत्तुरो, “आन्ने़म्माॽ बा कन् ये़म्मो इङ्गाॽ नुःङ्ङा ताआरो, हे़क्क्याङ् के़मेःत् साराःल्ले़ ये़म्बित्छा साधिक् कत्तुरो॥” 10 हे़क्केरक् मेःन्, कर आनिगे ताक्थे़बा इसहाकलाम् कुमेत् रिबेक्काःल्ले़ काप्साबासाहाॽ कत्तुसिआङ् वये़, 11-13 कर खे़न् काप्साबासाहाॽ सावाःन्छिङ्मानुःल्ले़ तगिए, खे़ङ्हाॽरे़ नुबा नु ताप्फे़ःम्बा याःम्बक् थेआङ् मे़न्जोःक्के, निङ्वाॽफुमाङ्ङिल्ले़ रिबेक्कान् अक्खे मे़त्तुआङ् वये़रो, “तुम्बाल्ले़ फोॽबान् से़वा चोगुॽरो॥” निङ्वाॽफुमाङ्ङिल्ले़ पाःत्तुबा कुइसिक् साम्योसाप्लाओ अक्खेलॽरिक् साप्ते़आङ् पत्, “इङ्गाॽ याकुबे़न् लुङ्माॽ तुक्तुङ्, कर ए़साउःन् चिःत्तुङ्लो॥” अक्खेलॽरिक् निङ्वाॽफुमाङ्ङिल्ले़ मनाहाॽरे़ खुनिॽ याःम्बक्किन् ओमे़त्तुआङ् मेःन्, कर खुने़ॽ आबाङे कुनिङ्वाॽसोक् कुइसिक् सेगुॽ के़लॽबा पाःन्निन् निःन्धो चोगुरो॥ 14 हे़क्केःल्ले़ आनिॽ थे पाःप्माबे? निङ्वाॽफुमाङ्ङिन् नुःरिक्काङ् खासे़न् मे़लोःन्ने़न्बि? से़क्खासाङ् मेःन्लो! 15 थेआङ्भे़ल्ले़ निङ्वाॽफुमाङ्ङिल्ले़ मोसान् अक्खे मे़त्तु, “आत्तिन् नुरिक् मे़प्मा निङ्वाॽ चोगुङ् खे़न् नुरिक् मे़त्तुङ्, हे़क्क्याङ् आत्तिन् लुङ्माॽ तुक्मा निङ्वाॽ चोगुङ् खे़न् लुङ्माॽ तुक्तुङ्॥” 16 खे़ल्ले़चोगुल्ले़ मनाहाॽरे़ निङ्वाॽ चोःक्माल्ले़ इग्र तम्सिङ् चोःक्माल्ले़ग मेःन्, कर निङ्वाॽफुमाङ्ङिल्ले़ लुङ्माॽ आदुक्ते़बालाम् काक् पाःन्हाॽ तारो॥ 17 थेआङ्भे़ल्ले़ साम्योसाप्लाओ निङ्वाॽफुमाङ्ङिल्ले़ फारो हाङ्ङिन् अक्खे मे़त्तुआङ् पत्, “खे़ने़ॽ के़सम्दाङ् आमुक्साम्मिन् ओसेःन्दाङ् चोगुङ्ङाङ् काक् इक्सादिङ् खाम्बेःक्मो आमिङ्ङिन् इङ्भोर के़लॽबा निङ्वाॽसोक्को इङ्गाॽए खे़ने़ॽ हाङ् चोःक्ने़आङ् वाॽआरो॥” 18 खे़ल्ले़चोगुल्ले़ निङ्वाॽफुमाङ्ङिल्ले़ आत्तिन् नुरिक् मे़प्मा निङ्वाॽ चोगुॽ खे़न् नुरिक् मे़त्तुॽ, हे़क्क्याङ् आत्तिन् कुनिङ्वाॽ नुःङ्मा के़साक्पा चोःक्मा निङ्वाॽ चोगुॽ, खे़न्निन् कुनिङ्वाॽ नुःङ्मा के़साक्पा चोगुॽरो॥ 19 हे़क्केःल्ले़ खिनिॽओ कुभारे़ इङ्गाॽ अक्खे याप्मि के़मे़त्तिबिला, “हे़क्केने़ फाॽग्र निङ्वाॽफुमाङ्ङिल्ले़ आल्लसाङ् थेआङ् पान् आधिक्पाबे? आत्तिल्ले़आङ् खुने़ॽ चोःक्मा इःत्तुबा पाःन्निन् अप्मा मे़सुक्तुन्लो॥” 20 मे़न्छाम् याप्मिए, निङ्वाॽफुमाङ्ङिन्नु मुरा के़दोबा खे़ने़ॽ हाःत्ने़बे? चोःक्मनाबा चिगक्वाःल्ले़ के़जोक्पे़न् “थेआङ् अक्तङ्बा के़जोगाङ्बाबे?” मे़त्तुबि? 21 सॽमनाबा खाम्मोलाम् कोःम्भलेःल्ले़ नुबा याःम्बक्को ओगप् के़बोङ्बा फुजिक् हे़क्क्याङ् हाबा खे़न् खाम्मोलाम् मे़न्जोबा याःम्बक्को ओगप् के़बोङ्बा फुजिक् चोःक्मा युक् मे़गत्तुम्बि? 22 निङ्वाॽफुमाङ्ङिल्ले़ कुसिक्किन् नु कुमुक्साम्मिन् ओसेःन्दाङ् चोःक्मा युक् कत्तुने़ फाॽग्र हे़क्केलॽरिक्के मे़क्मारे़ लागि यारिप् के़बोङ्बा मनाहाॽ सिक्किल्ले़ कुले़क्वा नासि थःत्तुसिल्ले़ आनिॽ थे पाःप्माबे? 23 हे़क्क्याङ् तगिसा कुमिमिदिङ्ङिन् खोमा फाॽआङ् यारिप् चोगुसिआङ् लुङ्माॽ तुक्तुसिबाहाॽ इमे़ल्लुङ्बा कुमिमिदिङ्ङिन् ओसेःन्धाक्से़ निङ्वाॽफुमाङ्ङिल्ले़ अक्खे चोगुरो॥ 24 हे़क्केलॽरिक्के आनिॽ यहुदिसाङ्, थिम्मे़न्दङ् सुवाङ्साङ्, खे़न् सेगुसिबाहाॽग आनिॽएरो॥ 25 निङ्वाॽफुमाङ्ङिल्ले़ पाःत्तुबा पाःन्निन् माङ्निङ्वाॽपान् के़बाःप्पा होसेरे़ साम्योसाप्लाओ अक्खेलॽरिक् साप्तुआङ् पत्लो, “आत्तिन्हाॽ आमना मे़होःप्ते़ खे़ङ्हाॽ आमना चोगुङ्सिङ्लो॥ तगि लुङ्माॽ मे़दुक्तुङ्सिङ्ङिन्बाहाॽ, आल्लो लुङ्माॽ तुक्तुङ्सिङ्लो॥” 26 हे़क्क्याङ्, आत्तिन् ते़न्नो “खिनिॽ आमना के़होःप्ति लॽरिक् के़म्मे़त्तिआङ् वये़, बा खे़न् ते़न्नो ‘आजुनि निङ्वाॽफुमाङ्ङिल्ले़ कुस्सानिङ्’ के़म्मे़त्तिॽरो॥” 27 माङ्निङ्वाॽपान् के़बाःप्पा यसैयाःल्ले़ इस्राइलिहाॽरे़ खुनिॽ याःम्बेओ अक्खेलॽरिक् पाःत्तुआङ् पत्, “इस्राइलिहाॽग आत्तात्तान्ने निःप्मा सुक्मे़न्दे़प्मनाबा वाहङ्ङिल्ले़ कुयाओबा ये़ःङ्घा हे़क्के यरिक् मे़जोःक्साङ् के़दाङ्बा के़याःक्पाहाॽरक् ताङ्मे़से़ःप्लो॥ 28 थेआङ्भे़ल्ले़ दाङ्बाल्ले़ कुघुम्दिङ्ङिल्ले़न् इङ्जाङ्ङिन् कन् इक्सादिङ् खाम्बेःक्मो हाराए के़त्तुॽरो॥” 29 यसैयारे़ इस्राइलरे़ कुयाःम्बेओ कन् तगिसा पाःत्तुआङ् वाॽबा हे़क्केए, “मुक्साम्दाङ्बा निङ्वाॽफुमाङ्ङिल्ले़ आनिॽ लागि कुमुॽइदाङ्सान् आन्धाॽरे़न्निल्ले़ग आनिॽ सदोम नु गमोरा कुइसिःक्के खाप्पुथ्यःङ् आबोःक्खे़बारो॥” इस्राइलिहाॽरे़ नसान् मे़न्जोगुन् 30 हे़क्केःल्ले़ आल्ल आनिॽ थे पाःप्माबे? थिम्मे़न्दङ् सुवाङ्हाॽरे़ग साम्योबा पोङ्मा मे़ङ्गोःत्तुन्छाङ् नसान् मे़जोगुबालाम्बा साम्योबा मे़बोःक्खे़॥ 31 कर इस्राइलिहाॽरे़ साम्योथिम्मिन् इःप्मा नाःप्माआङ् साम्योबा पोङ्मा तम्सिङ् मे़जोगुसाङ् साम्योबा मे़न्बोःक्खे़न्लो॥ 32 थेआङ् मे़न्बोःक्खे़न्बे? थेआङ्भे़ल्ले़ खे़ङ्हाॽरे़ कङ्ग आबाङे याःम्बक्लाम्बा खोमा सुक्ते़त् के़लॽबा मे़इःत्तुआङ् नसाःन्लाम्बा के़दाबा साम्योबान् मे़ङ्गोःत्तुन्लो॥ हे़क्क्याङ् खे़ङ्हाॽग याप्मि के़घःबा लुङ्ङो मे़दोःक्ते़आङ् मे़जोःन्दे़रो॥ 33 कङ्ग साम्योसाप्लाओ अक्खेलॽरिक् साप्ते़बा कुइसिक् पोःक्खे़रो, “ओमे़त्ते़म्मे़ॽ, इङ्गाॽ यरुसले़म्मो मनाहाॽ मे़दोःक्ल फाॽआङ् मना के़घबा लुङ्ङिन् ने़स्सुङ्लो, हे़क्क्याङ् मे़ले़ःङ्ङाङ् मे़गे़ङ्ल फाॽआङ् लुङ्जेक् ने़स्सुङ्लो, कर खुने़ॽ सम्दाङ् नसान् के़जोःक्पाङ्ग आप्फाल्ले़आङ् सिरिङ्ममो मे़धाने़न्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.