रोमि 6 - लिम्बुलायोल्ले़ कुमुक्साम्मिन् मे़गे़ 1 आल्ल आनिॽ थे पाःप्माबे? लुङ्गुम्मिन् आत्तात्तान्ने आघोसुम्ल फाॽआङ् लायो चोःक्मार वाॽमाबि? 2 मेःन्लो! हे़क्के चोःक्मा मे़नुॽने़न्लो! आनिॽग कुसिवे़त् मना हे़क्तङ्बा आजोःक्लो, हे़क्क्याङ् आल्ल लायोल्ले़ कुयुक्को आन्वाॽने़न्लो॥ हे़क्केःल्ले़ आल्लआङ्धो लायो चोःक्मार वाॽमा मे़नुॽने़न्लो॥ 3 आनिॽ ख्रिस्त ये़सुओ बप्तिस्मा आबोःक्खे़ल्ले़ खुने़ॽनुए आस्ये़ के़लॽबान् कुसिङ् के़न्निःत्तुम्मिन्बि? 4 खे़ल्ले़चोगुल्ले़ आनिॽग बप्तिस्मालाम् सिमे़न्नो खुने़ॽनु आहुम्सिङ्, हे़क्केःल्ले़ ख्रिस्ते़न् पानुदिङ् पा निङ्वाॽफुमाङ्ङिल्ले़ मिमिदिङ्गे़न् कुमुक्साम्मिल्ले़ सिमे़न्लाम्बा कुहिङ्वे़त् चोगुबा कुइसिक् आनिॽआङ् कुसङ् हिङ्मन्नो आहिङ्लो॥ 5 आनिॽ कुसिमे़न्नो खुने़ॽनु थिक्हुप् आबोःक्खे़आङ् आवाॽने़ फाॽग्र ख्रिस्ते़न् सिमे़न्लाम् याम्मो हिङे़बा हे़क्के आनिॽआङ् खुने़ॽनुए सिमे़न्लाम् याम्मो आहिङ्लो॥ 6 लायोल्ले़ कुयुक्किन् आनिॽ हिङ्मन्नोलाम् मे़क्ल हे़क्क्याङ् आल्लआङ्धो लायोरे़ कुयोःक्पा आम्बोङ्ङिन्ल फाॽआङ् आनिॽ तगिसमा हिङ्मन्निन् ख्रिस्ते़न्नु सिलाम्साक्मा सिङ्ङो फोःन्दे़आङ् वाॽ के़लॽबान् कुसिङ् आनिःत्तुम्, 7 थेआङ्भे़ल्ले़ आत्तिन् स्ये़आङ् वाॽ खे़न् लायोल्ले़ कुयुक्कोनु चोःक्युम्भोबा पोःक्खे़आङ् वाॽरो॥ 8 आल्ल आनिॽ ख्रिस्ते़न्नु सोरिक् आस्ये़आङ् आवाॽने़ फाॽग्र खुने़ॽनुए आनिॽआङ् याम्मो आहिङ्लो फाॽआङ् नसान् आजोगुम्लो॥ 9 ख्रिस्ते़ङ्ग स्ये़आङ् कुहिङ्वे़त् पोःक्खे़बाल्ले़ आल्ल याम्मो मे़सिने़न्लो के़लॽबान् आनिॽ आनिसुम्लो॥ हे़क्केःल्ले़ आल्लआङ्धो खुने़ॽ सम्दाङ् सिमे़ल्ले़ युक् मे़गत्तुन्लो॥ 10 ख्रिस्ते़न् स्ये़ल्ले़ लायोल्ले़ कुमुक्साम्मिन् नाःम्मा फाॽआङ् सदादिङ्रे़ लागि खुने़ॽ थिक्ले़ङ्ङो स्ये़, कर आल्ल खुने़ॽ कुहिङ्वे़त् वाॽरो, हे़क्क्याङ् कुहिङ्मन्निन् खुने़ॽ निङ्वाॽफुमाङ्ङिल्ले़ कुनिङ्वाॽ तामा फाॽआङ् हिङ्लो॥ 11 हे़क्केलॽरिक्के कुसिवे़त् मनाःल्ले़ लायो मे़जोगुम्बा कुइसिक् खिनिॽ लायो चोःक्माओ के़स्ये़ॽइ कर ख्रिस्त ये़सुन् नु थिक्हुप् के़बोःक्खिआङ् निङ्वाॽफुमाङ्ङिल्ले़ कुनिङ्वाॽ तामारे़ लागि के़हिङिबा फाॽआङ् निङ्वाॽ इःत्ते़म्मे़ॽओ॥ 12 खे़ल्ले़चोगुल्ले़ लायोल्ले़ खिनिॽ नासिङ्गे़न् थक्किन् युक्मा मे़बाङ्घे़म्मिन्ने़ॽओ, मेःन्ने फाॽग्र फे़न्निङ्वाॽइल्ले़ कुबाःन्निन् ते़न्दिङ् के़जोगुम्लो॥ 13 खिनिॽ थक्कोबा याम्लक्हाॽ ताप्फे़ःम्बा याःम्बक् चोःक्मारे़ लागि लायोन् मे़दोःन्दे़म् मे़बिरे़म्मिन्ने़ॽ॥ खे़ल्ले़ कुले़क्वा सिमे़न्लाम् हिङ्मन्नो के़दाबा मनाहाॽ कुइसिक् खिनिॽ आबाङे निङ्वाॽफुमाङ्ङो तोःन्नाॽसिम्मे़ॽ, हे़क्क्याङ् खिनिॽ याम्लक्हाॽ साम्योबा याःम्बक् चोःक्मारे़ लागि निङ्वाॽफुमाङ्ङो तोःन्दे़म्मे़ॽओ॥ 14 खिनिॽ सम्दाङ् लायोन् युक् चोक् मे़बाङ्घे़म्मिन्ने़ॽ, थेआङ्भे़ल्ले़ खिनिॽ साम्योथिम्मिल्ले़ कुयुक्को के़होःप्तिॽ, कर निङ्वाॽफु लुङ्गुम्मिल्ले़ कुयुक्को के़वयिॽरो॥ साम्योनिमाल्ले़ कुयोःक्पा 15 कन् काक् फाॽइङ्ग थे़माबे? आनिॽ साम्योथिम्मिल्ले़ कुयुक्को आहोप् कर निङ्वाॽफु लुङ्गुम्मिल्ले़ कुयुक्को आवाॽबाल्ले़ लायो चोगुम्बि? आप्फाल्ले़आङ् चोगुम् मेःन्! 16 आत्तिन्हाॽ इङ्जाङ् खे़म्मा के़दे़न्दिॽ, बा खे़ल्ले़ कुयोःक्पा के़बोःक्खिॽ के़लॽबान् के़न्निसुम्मिन्बि? लायोल्ले़ कुयोःक्पा के़बोःक्खिॽने़ फाॽग्र खिनिॽ के़स्ये़ॽइ, कर निङ्वाॽफुमाङ्ङिल्ले़ कुइङ्जाङ्ङिन् के़घे़प्सुम्ने़ फाॽग्र खिनिॽ साम्योबा के़बोःक्खिॽरो॥ 17 कर खिनिॽ लायोल्ले़ कुयोःक्पा के़बोःक्खिआङ् के़वयिसाङ्, आल्ल खिनिॽ के़हुॽआसिबा निसाम्मिन् सिक्लुङ्मोनुए के़इःप्पा के़नाःप्पा के़बोःक्खिआङ् के़वयिबाओ निङ्वाॽफुमाङ्ङिन् नोगे़न्लो॥ 18 खिनिॽग लायोलाम् चोःक्युम्भो के़घोसुम्माङ् साम्योबा याःम्बक् चोःक्मा फाॽआङ् कुयोःक्पा के़बोःक्खिआङ् के़वयिॽरो॥ 19 खिनिॽ कुसिङ् निःप्मा के़सुक्तुम्ल फाॽआङ् हिम्दाङ्बान् नु योःक्किल्ले़ कुबिःन् ओगप् चोगुङ्ल पत्तारो॥ खिनिॽ आबाङे याम्लक्किन् तगि याप्मि के़जिःम्बा नु फे़न्याःम्बक्किल्ले़ कुयोःक्पा पोङ्से़ के़दोःन्दुम्माङ् के़वयिबा कुइसिक्, आल्ल सेसेगे़न् सुत्थो पोङ्मारे़ लागि साम्योबाल्ले़ कुयोःक्पा पोङ्से़ खिनिॽ याम्लक्किन् तोःन्दे़म्मे़ॽओ॥ 20 खिनिॽ लायोल्ले़ कुयोःक्पा के़वयिल्ले़ साम्योबाल्ले़ कुयुक्को के़होःप्तिरो॥ 21 खे़न् ये़म्मो के़जोगुम्बा पाःन्हाॽलाम् आल्लो सिरिङ् के़मयिल्ले़ थे इन्धाःक् के़घोसुम्बे? कुनुप्मोग खे़न् पाःन्हाॽरे़ मे़न्नुप्मनाबा सिमे़न्नो के़गे़त्तिॽरो॥ 22 कर आल्लोग खिनिॽ लायोलाम् चोःक्युम्भो के़घोसुम्माङ् के़वयिॽ, हे़क्क्याङ् निङ्वाॽफुमाङ्ङिल्ले़ कुयोःक्पा के़बोःक्खिआङ् के़वयिॽरो॥ खे़ल्ले़ग सेसेगे़न् सुत्थो के़जोगिॽ, हे़क्क्याङ् कुनुप्मो खे़ल्ले़ मे़न्नुप्मनाबा हिङ्मन्नो के़गे़त्तिॽरो॥ 23 थेआङ्भे़ल्ले़ लायोरे़ आबिबा नाम्याक्किङ्ग सिमे़न्लो, कर निङ्वाॽफुमाङ्ङिल्ले़ आम्भा आबिबा पर्धाःम्मिङ्ग आनिॽ दाङ्बा ख्रिस्त ये़सुओलाम् मे़न्नुप्मनाबा हिङ्मन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.