रोमि 10 - लिम्बु1 आमिःम् फुॽनुसाॽ नु ने़ॽनुसाॽसे, इङ्गाॽग इस्राइलिहाॽ ताङ्मे़से़ःप्ल फाॽआङ् सिक्लुङ्मोनुए निङ्वाॽफुमाङ्ङिन् तुवा चोगुङ्लो॥ 2 खे़ङ्हाॽरे़ निङ्वाॽफुमाङ्ङिल्ले़ कुनिङ्वाॽ तामा खुनिॽ सिक् सम् फाॽआङ् पाःत्तुङ्, कर आक्खेआङ् कुनिङ्वाॽ ता के़लॽबा पाःन्निन् खे़ङ्हाॽरे़ मे़न्निसुन्लो॥ 3 खे़ङ्हाॽरे़ निङ्वाॽफुमाङ्लाम् के़दाबा साम्योबान् कुसिङ् मे़न्निःत्तुम्बाल्ले़ चोगुल्ले़ खे़ङ्हाॽरे़ साम्योथिम्मिन् इःप्मा नाःप्माआङ् आबाङे साम्योबा पोङ्मा तम्सिङ् मे़जोगु, हे़क्केलॽरिक् खे़ङ्हाॽरे़ निङ्वाॽफुमाङ्ङिल्ले़ कुसाम्योबा पोङ्मा लाम्मिन् मे़नाॽरुरो॥ 4 ख्रिस्ते़ल्ले़ए साम्योथिम्मिल्ले़ पाःत्तुबा काक् पाःन्हाॽ के़त्तुरो, हे़क्केलॽरिक् खुने़ॽ नसान् के़जोःक्पा के़रे़क् साम्योबा मे़बोङ्लो॥ के़रे़क्ले़ लागि से़न्लप् 5 मोसाःल्ले़ साम्योथिम्मिन् इःप्मा नाःप्माआङ् साम्योबा पोङ्मा पाःन्निन् अक्खेलॽरिक् पोधक् चोगुआङ् वाॽ, “साम्योथिम्मिन् के़इःप्पा के़नाःप्पा मनान् बा खे़न्लाम्बाए हिङ्लो॥” 6 कर नसान् चोःक्माआङ् के़दाबा साम्योबाल्ले़ अक्खे पाःत्तुॽ, “‘हात् थो साङ्ग्राम्पेदाङ्ङो पेःक्पाबे?’ फाॽआङ् के़निङ्वाॽओ मे़इःत्ते़न्ने़ॽ” (खे़न् फाॽइन् से़न्लप्पिल्ले़न् सुनाइङ् आनिॽओ युःत्छे़ ख्रिस्ते़न् यो इक्सादिङ् खाम्बेःक्मो युःप्मा पोङ्), 7 इग्र “‘हात् यो खे़मायङ्सङ्ङो थाबाबे?’ फाॽआङ् के़निङ्वाॽओ मे़इःत्ते़न्ने़ॽ” (खे़न् फाॽइन् से़न्लप्पिल्ले़न् सुनाइङ्ङिन् आनिॽओ थाक्से़ ख्रिस्ते़न् सिमे़न्लाम् थो थाक्मा पोङ्)॥ 8 कर कल्ले़ थे पाःत्तुबे? “पाःन्जाक्किङ्ग के़बेसाङ्ङे वाॽ, के़मुराओ हे़क्क्याङ् के़सिक्लुङ्मो वाॽ,” खे़ङ्ग आनिगे इङ्भोसुम्बे़बा ख्रिस्ते़न् नसाःन्निल्ले़ कुयाःम्बेओबा पाःन्जाक्लो— 9 खे़ने़ॽ के़मुराःल्ले़ ये़सुन् ने दाङ्बारो फाॽआङ् ते़न्दिङ् के़जोगुआङ् के़सिक्लुङ्मोलाम् निङ्वाॽफुमाङ्ङिल्ले़ खुने़ॽ सिमे़न्लाम् कुहिङ्वे़त् चोगु लॽरिक् नसान् के़जोगुने़ फाॽग्र ताङ्गे़से़ःप्लो॥ 10 थेआङ्भे़ल्ले़ खे़ने़ॽ के़सिक्लुङ्मोलाम् नसान् के़जोगुबाल्ले़ आप्तिक् मेःन्नेबा के़बोङ्, हे़क्क्याङ् के़मुराःल्ले़ ते़न्दिङ् के़जोगुबाल्ले़ से़न्लप् के़घोसुॽरो॥ 11 साम्योसाप्लाःल्ले़ अक्खे पाःत्तुॽ, “खुने़ॽ सम्दाङ् नसान् के़जोःक्पाङ्ग आप्फाल्ले़आङ् सिरिङ्ममो मे़धाने़न्लो॥” 12 यहुदि नु थिम्मे़न्दङ् सुवाङ्लुम्मो थेआङ् ये़मे़न्दङ् पान् होप्लो—लत्छा दाङ्बान्ने के़रे़क्ले़ खुनिॽ दाङ्बारो, हे़क्क्याङ् खुने़ॽ कुमिङ् के़लोङ्बा के़रे़क् यरिक् मुॽइसाम् पिरुसिॽरो॥ 13 थेआङ्भे़ल्ले़ “दाङ्बाल्ले़ कुमिङ् के़लोङ्बा के़रे़क्ले़ से़न्लप् मे़घोसुॽ॥” 14 कर खे़ङ्हाॽरे़ नसाःन्ने मे़न्जोःक्के मे़वाॽइल्ले़ आक्खेआङ् खुने़ॽ कुमिङ्ङिन् मे़लोःक्खुबे? हे़क्क्याङ् खे़ङ्हाॽरे़ खुने़ॽ कुयाःम्बेओ खे़म्मै मे़ङ्घे़म्मे मे़वाॽइल्ले़ आक्खेआङ् नसान् चोःक्मा मे़सुक्तुॽबे? हे़क्क्याङ् इङ्भन् के़से़बा मनाए मेःन्ने आक्खेलॽरिक् मे़घे़प्सुबाबे? 15 हे़क्क्याङ् हाःत्ताङ् मे़म्बाङ्ङे आक्खेआङ् खे़ङ्हाॽरे़ इङ्भन् मे़जोगुॽबे? साम्योसाप्लाओ साप्ते़आङ् पत्, “सुनाइङ् इङ्भन् के़जोक्पे़न् ताःल्ले़ आक्खे़न् नुबा पोङ्बे!” 16 कर के़रे़क्ले़ सुनाइङ्ङिन् मे़न्दाःक्तुन्लो॥ माङ्निङ्वाॽपान् के़बाःप्पा यसैयाःल्ले़ अक्खेलॽरिक् पाःत्तुॽ, “आदाङ्बे, आनिगे इङ्भोसुम्बे़बा पाःन्निन् हाःत्ले़ नसान् चोगुआङ् वाॽबे?” 17 हे़क्केलॽरिक् नसाःन्निङ्ग खे़म्मनाबालाम्बा तारो, हे़क्क्याङ् खे़न् खे़म्मनाबाङ्ग ख्रिस्तरे़ कुयाःम्बेओबा पाःन्जाक्लाम् तारो॥ 18 कर इस्राइलिहाॽरे़ सुनाइङ्ङिन् से़क्खाए मे़ङ्घे़म्मे मे़वाॽबि? से़क्खाए खे़ङ्हाॽरे़ मे़घे़प्सुआङ् वाॽरो॥ थेआङ्भे़ल्ले़, कन् सुनाइङ् के़से़बाहाॽरे़ खुनिॽ इङ्घङ्ङिन् खाम्बेःक्मो काक् पिसाङ् से़रे़आङ् वाॽरो, हे़क्क्याङ् खे़ङ्हाॽरे़ मे़बाःत्तुबा पाःन्निन् इक्सादिङ् खाम्बेःक्मोबा के़रे़क् ते़न्नो से़रे़आङ् वाॽ लॽरिक् साम्योसाप्लाओ साप्ते़आङ् पत्लो॥ 19 इङ्गाॽ याम्मो सेःन्दोनिङ्, से़क्खाए इस्राइलिहाॽरे़ सुनाइङ्ङिन् कुसिङ् मे़न्निःत्तुम्बि? खे़ङ्हाॽरे़ कुसिङ् मे़निःत्तुएरो, थेआङ्भे़ल्ले़ मोसारे़ कुये़म्मोआङ् निङ्वाॽफुमाङ्ङिल्ले़ अक्खे पाःत्तुआङ् वये़, “थिम्मे़न्दङ् सुवाङ्हाॽ मुॽइसाम् पिरुङ्सिङ्ङाङ् खिनिॽ नाहे़न्ल चोगुङ्लो, खासिङ् मे़न्निःप्मनाबा सुवाङ्हाॽलाम् खिनिॽ सिक्पोःक्ल याःन्दुङ्लो॥” 20 हे़क्क्याङ् माङ्निङ्वाॽपान् के़बाःप्पा यसैयाःल्ले़ निङ्वाॽफुमाङ्ङिल्ले़ कुबाःन्हाॽ आःन्छिङ्ङाङ् अक्खेलॽरिक् पाःत्तुरो, “इङ्गाॽ याप्मि मे़ङ्गोःप्मनाबाहाॽरे़ मे़घोसाङ्लो, आत्तिन्हाॽरे़ इङ्गाॽ सेःन्मे़न्दोसाङ्ङिन् खे़ङ्हाॽओ इङ्गाॽ आबाङे थाःन्छिङ्ङाआङ् वाॽआरो॥” 21 कर खुने़ॽ इस्राइलिहाॽरे़ खुनिॽ याःम्बेओ अक्खे पाःत्तुॽ, “नाम्धाधा खे़न् आधिङ्गानिहाॽ नु आबान् मे़ङ्घे़म्मनाबाहाॽ ताःक्मासि फाॽआङ् आहुक्हाॽ सन्छुङ्ङाङ् वाॽआरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.