सुफो 9 - लिम्बुङासिगेक्पा थुत्थुरिःप्पा 1 हे़क्क्याङ् ङासिगेक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ ताङ्साक्पोलाम् इक्सादिङ् खाम्बेःक्मो मक्के़धाःबा खेःम्सिक्पाधिक् निसुङ्लो॥ खे़न् खेःम्सिक्पे़न् कुद्रोःम् मेःन्नेबा लुम्बाःत्तोबा तिमिक्किन् मे़बिरु॥ 2 खे़न् खेःम्सिक्पाल्ले़ कुद्रोःम् मेःन्नेबा लुम्बाःत्तिन् हन्दुल्ले़ खे़प्मोलाम् आत्तात्तान्ने यम्बा मिहाःत्लुङ्ङोलाम् के़लःम्बा कुइसिक् मिःक्खुःन् थाङे़, हे़क्क्याङ् ताङ्साक्पे़न् सिदे़प् ते़प्तुआङ् नाम्मिन् इःप्तुदेसुरो॥ 3 हे़क्क्याङ् मिःक्खुओलाम् निःङ्घुक्वाहाॽ मे़लःन्दे़आङ् खाम्बेःक्मो मे़जुक्ते़, हे़क्क्याङ् खे़ङ्हाॽ ताङ्साक्खे़बक्पाहाॽरे़ हे़क्के सिक्मा मुक् मे़बिरुसिरो॥ 4 खे़ङ्हाॽ यान् पोःक्लाहाॽ, सिङ्बुङ्हाॽ फे़त्लाःम्मा मेःन्, कर खुनिॽ तोवाबो निङ्वाॽफुमाङ् एःप्साप् मे़म्बप्मनाबा मे़न्छाम् याप्मिहाॽरक् तुक्खे चाःत्ते़म्सिम्मे़ॽ मे़मे़त्तुसिरो॥ 5 खे़ङ्हाॽ मे़न्छाम् याप्मिहाॽ मे़से़रे़म्सिम्मिन्ने़ॽ कर ला ङासि थारिक् तुक्खे चाःत्ते़म्सिम्मे़ॽ के़लॽबा इङ्जाङ् मे़बिरुसि॥ हे़क्क्याङ् खे़न् मनाहाॽरे़ खुनिॽ तुक्खेःङ्ग ताङ्साक्खे़बक्पाल्ले़ आसिक्किल्ले़ तुक्पा हे़क्तङ्बा वये़रो॥ 6 खे़न् ये़न्हाॽओ मे़न्छाम् याप्मिहाॽरे़ सिमे़न् मे़गोःत्तु, कर मे़ङ्घोसुन्लो॥ हे़क्क्याङ् खे़न्हाॽरे़ सिमा निङ्वाॽ मे़जोगुॽ कर सिमे़न् खे़न्हाॽलाम् खे़त्छिङ् पेःक्॥ 7 खे़न् निःङ्घुक्वाहाॽग थङ्ङो यारिप् चोःक्मनाबा अन् कुइसिक् निमे़धाबे़रो॥ खे़ङ्हाॽरे़ खुनिॽ थे़गेःक्को साम्म्याङ् तिचः हे़क्तङ्बान् मे़घुःक्खुआङ् पत्छे़, हे़क्क्याङ् खुनिॽ नाराःङ्ग मे़न्छाम् याप्मिरे़न् कुइसिक् चोगे़रो॥ 8 खे़ङ्हाॽरे़ खुनिॽ थे़गेःक्इःङ्ग मे़न्छुमाॽरे़न् हे़क्के केःम्बा चोगे़॥ हे़क्क्याङ् खे़ङ्हाॽरे़ खुनिॽ हाबोॽहाॽग खिरिङ्बाल्ले़ कुहाबोॽ हे़क्के लॽरे़रो॥ 9 खे़ङ्हाॽरे़ खुनिॽ सङ्बेॽमो फे़न्जेॽ से़ःप्चाङ् पत्छे़॥ हे़क्क्याङ् खे़ङ्हाॽरे़ खुनिॽ लाप्पिङ्ग थङ्ङो अन्लाहाॽ के़उःङ्बाआङ् के़लोःक्पा कुइसिक् खे़म्दे़त्ते़रो॥ 10 खे़ङ्हाॽरे़ खुनिॽ मेःङ्ग ताङ्साक्खे़बक्पाल्ले़ कुमे कुइसिक् चोगे़, हे़क्क्याङ् खुनिॽ मेःल्ले़ ला ङासि थारिक् मे़न्छाम् याप्मिहाॽ तुक्खे चाःप्मासि मुक्साम् मे़गत्तु॥ 11 खुनिॽ हाङ्ङिङ्ग कुद्रोःम् मेःन्नेबा लुम्बाःत्तिल्ले़ कुमाङ्लाइङ्बान् वये़रो॥ खे़ल्ले़ कुमिङ्ग हिब्रु पाःन्दाङ्ङो अब्बादोन नु ग्रिक पाःन्दाङ्ङो अपोल्लियोन्लो (कङ्हाॽरे़ कुबेःङ्ग “के़मे़ङ्बा” पोङ्लो)॥ 12 खे़न् थिक्सिगेक्पा इनोगे़न् तुक्खेःङ्ग पेरो॥ कर ओमे़त्ते़म्मे़ॽओ, वेॽसमा ने़त्छि इनोगे़न् तुक्खेहाॽ तामा के़बोङ्बा वाॽरो॥ तुक्सिगेक्पा थुत्थुरिःप्पा 13 हे़क्क्याङ् तुक्सिगेक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ निङ्वाॽफुमाङ्ङिल्ले़ कुदगिबा साम्म्याङ् ले़त्ति तोःम्मादे़न्निल्ले़ लिसि कुसुक्पो के़बप्पा हासम्सम्बाओनु इक्लाधिक् लःन्दे़बा खे़प्सुङ्॥ 14 खे़न् इक्लाःल्ले़ अक्खेलॽरिक् खे़न् थुत्तुरिःप्पा के़गप्पा तुक्सिगेक्पा माङ्लाइङ्बान् मे़त्तु, “पयम् यम्बा युफ्रेतिस वरःङ्ङो इघेःङ्मनासिबा लिसि माङ्लाइङ्बाहाॽ ले़रे़से़ॽ॥” 15 हे़क्केलॽरिक् बा कन् तङ्बे, ला, ये़न्, नु कुमुक्ले़ लागि यारिप् मे़बोःक्खे़आङ् के़वाॽबा खे़न् लिसि माङ्लाइङ्बाहाॽ कुसुक्वा थिक् मे़न्छाम् याप्मिहाॽ से़प्मासि फाॽआङ् मे़ले़रुसिरो॥ 16 हे़क्क्याङ् खे़ङ्हाॽरे़ खुनिॽ अन् के़युक्पा थक्सुबाहाॽ निबोङ् युङ्सिङ् (२०,००,०००) मे़वये़बा खुनिॽ खानिःत्तिन् खे़प्सुङ्लो॥ 17 इङ्गाॽ निसुङ्बा सुफोओ अन्हाॽ नु अन् के़युक्पाहाॽ अक्तङ्बा मे़जोगे़—खे़ङ्हाॽरे़ खुनिॽ सङ्बेॽ से़ःप्चाङ्ङिन् मि हे़क्के हे़ःत्ताङ्बा, कुभिङ्लुङ् हे़क्के फिङ्दाङ्बा नु कान्धाक् हे़क्के अम्दाङ्बा चोगे़रो॥ हे़क्क्याङ् अन्हाॽरे़ खुनिॽ थे़गेक्पाङ्ग खिरिङ्बाल्ले़न् कुइसिक् चोगे़, हे़क्क्याङ् खे़ङ्हाॽरे़ खुनिॽ मुराओलाम् मि, मिःक्खुॽ नु कान्धाक्किन् लःन्दे़रो॥ 18 इक्सादिङ् खाम्बेःक्मोबा कुलक् सुम्सिओ कुलक् थिक् मे़न्छाम् याप्मिहाॽ कन् अन्हाॽरे़ खुनिॽ मुराहाॽओलाम् के़लःम्बा मि, मिःक्खुॽ नु कान्धाक्ले़न् सुम्सि मिन्देॽओलाम् मे़स्ये़रो॥ 19 अन्हाॽरे़ खुनिॽ मुक्साम्मिङ्ग खुनिॽ मुराहाॽओ नु मेहाॽओ पत्छे़रो॥ खुनिॽ मेहाॽग असेःक्पा कुइसिक् कुधे़गेक् के़बप्पा चोगे़रो॥ खे़न् थे़गेःक्हाॽरे़ मे़न्छाम् याप्मिहाॽ खाःम्मासि मुक्साम् मे़गत्तुरो॥ 20 हे़क्क्याङ् कन् मिन्देॽलाम् मे़न्छिःम्ना वेॽ मनाहाॽ आबाङे मे़जोगुबा फे़न्याःम्बक्कोलाम् मे़न्हिन्दे़न्लो॥ आल्लसाङ् खे़ङ्हाॽरे़ फे़न्साम्हाॽ नु मे़म्बाःप्मना, मे़न्निःम्ना हे़क्क्याङ् लाङ्मे़ङ्घेःक्मना साम्म्याङ्, युप्पा, थथनाबा, लुङ् नु सिङ्ङिल्ले़न् नावाइत्लाहाॽ से़वा चोःक्मा मे़ल्ले़रुन्लो॥ 21 हे़क्क्याङ् खे़ङ्हाॽ मनासे़प्मा, कित्चाक् चोःक्मा, याम्बोःप्मा नु खुःम्मालाम् मे़न्हिन्दे़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.