सुफो 7 - लिम्बुनिङ्वाॽफुमाङ्ङिल्ले़ कुएःप्साप् के़गप्पा मनाहाॽ 1 कन् एगाङ् इङ्गाॽ इक्सादिङ् खाम्बेःक्माल्ले़ लिसि कुसुक्पो के़ये़प्पा लिसि माङ्लाइङ्बाहाॽरे़ खाम्बेःक्मो, वरःङ्ङो, सिङ्बुङ्हाॽओ सुरित् केजङ् मे़हुने़न्ल फाॽआङ् लिसि पिसाङ्लाम् सुरित् केजङ्ङिन् मे़धेःक्तुबा निसुङ्॥ 2 हे़क्क्याङ् आजुनि निङ्वाॽफुमाङ्ङिल्ले़ कुएःप्साप् के़बङ्बा वेॽसमा माङ्लाइङ्बाधिक् नाम्गे़न् पिसाङ्लाम् थाङे़बा निसुङ्॥ खे़ल्ले़ खे़न् खाम्बेःक्मान् नु वरःङ्ङिन् फे़त्लाःम्मा युक् के़घोबा लिसि माङ्लाइङ्बाहाॽ यम्बा इक्लाओ मे़त्तुसि, 3 “आनिॽ निङ्वाॽफुमाङ्ङिल्ले़ कुसे़वारोबाहाॽरे़ खुनिॽ तोवाबाओ आनिगे एःप्साप् मे़न्युक्के थारिक् खिनिॽ खाम्बेःक्मान्, वरःङ्ङिन्, सिङ्बुङ्हाॽ थेआङ् फे़त्मे़लाःन्दे़म्मिन्ने़ॽओ॥” 4 हे़क्क्याङ् खुनिॽ तोवाबाओ एःप्साप् मे़युक्तुसिबाहाॽ मे़निरुसिबा खे़प्सुङ्॥ काक् इस्राइलबा सुवाङ्हाॽरोलाम् लाङे़न्छिङ्धिक्काङ् हे़न्छिङ् लि-लि (१,४४,०००) मे़वये़रो— 5 यहुदा सुवाङ्लाम् हे़न्छिङ् थिक्-ने़त् (१२,०००), रुबेन सुवाङ्लाम् हे़न्छिङ् थिक्-ने़त् (१२,०००), गाद सुवाङ्लाम् हे़न्छिङ् थिक्-ने़त् (१२,०००), 6 आसेर सुवाङ्लाम् हे़न्छिङ् थिक्-ने़त् (१२,०००), नाप्तालि सुवाङ्लाम् हे़न्छिङ् थिक्-ने़त् (१२,०००), मनस्से सुवाङ्लाम् हे़न्छिङ् थिक्-ने़त् (१२,०००), 7 सिमियोन सुवाङ्लाम् हे़न्छिङ् थिक्-ने़त् (१२,०००), ले़बि सुवाङ्लाम् हे़न्छिङ् थिक्-ने़त् (१२,०००), इस्साकार सुवाङ्लाम् हे़न्छिङ् थिक्-ने़त् (१२,०००), 8 जबुलुन सुवाङ्लाम् हे़न्छिङ् थिक्-ने़त् (१२,०००), युसुफ सुवाङ्लाम् हे़न्छिङ् थिक्-ने़त् (१२,०००), हे़क्क्याङ् बे़न्जामिन सुवाङ्लाम् हे़न्छिङ् थिक्-ने़त् (१२,०००)॥ फदाङ्बा तेत् के़जाङ्बा मनालुप् 9 कन् एगाङ् खे़प्मो आत्तात्तान्ने निःप्मा सुक्मे़न्दे़प्मना मनाहाॽ, के़रे़क् लाजेॽहाॽ, के़रे़क् मे़न्छाम् सुवाङ्हाॽ, हे़क्क्याङ् के़रे़क् पाःन्दाङ्हाॽलाम्, हाङ्युक्नान् नु मे़ल्लुक्साःल्ले़ कुदगि कब्रिङ् मे़ये़बे़बा निसुङ्सिङ्॥ खे़ङ्हाॽरे़ फदाङ्बा तेत् मे़जाक्खुआङ् खुनिॽ हुक्को खे़बक्सिङ्ङिल्ले़ कुबोराक्हाॽ मे़बक्खुआङ् मे़ये़बे़॥ 10 खे़ङ्हाॽ यम्बा इक्लाओ अक्खेलॽरिक् मे़अःक्ते़, “हाङ्युक्नाओ के़युङ्बा आनिॽ निङ्वाॽफुमाङ्ङिन् नु मे़ल्लुक्साःल्ले़ खुन्छिॽ मनाहाॽ ताङ्से़ःप्मा मुक्साम् कत्छुॽरो॥” 11 हे़क्क्याङ् हाङ्युक्नान्, तुम् लाम्लोबाहाॽनु लिसि कुहिङ्वे़त् पाथुङ्साहाॽरे़ खुनिॽ कब्रिङ् के़रे़क् माङ्लाइङ्बाहाॽ मे़ये़बे़आङ् हाङ्युक्नाःल्ले़ कुदगि साम्बोन् मे़भन्छिङ्ल निङ्वाॽफुमाङ्ङिन् अक्खेलॽरिक् से़वा मे़जोगुरो, 12 “आमे़न्! नारा फोमान्, मिमिदिङ्ङिन्, सिक्कुम्दिङ् निङ्वाॽइन्, नोगे़न्निन्, इङ्धाङ्ङिन्, मुक्साम्मिन् नु थुम्मिन् सदादिङ् नु सदादिङ् आनिॽ निङ्वाॽफुमाङ्ङिल्ले़न्नेरो॥ आमे़न्!” 13 हे़क्क्याङ् तुम्लाम्लोबाधिक्ले़ इङ्गाॽ अक्खेलॽरिक् सेःन्दोसाङ् “कन् फःदाङ्बा तेत् के़जाङ्बाहाॽ हाःत्छिबे? हे़क्क्याङ् आत्तोलाम् मे़द्ये़बाबे?” 14 इङ्गाॽ खुने़ॽ नोगप् पिरुङ्, “आदाङ्बे, इङ्गाॽग मे़निसुङ्सिङ्ङिन्लो, खे़ने़ॽए के़निसुॽरो॥” हे़क्क्याङ् खुने़ॽ अक्खे मे़त्ताङ्, “कन्हाॽग पयम् यम्बा निङ्घुम्लाम् के़दाबासिरो॥ कङ्हाॽरे़ मे़ल्लुक्साःल्ले़ कुमाक्खिॽओ खुनिॽ तेत्चाङ्हाॽ वामे़हप्तुआङ् फदाङ्बा मे़जोगुआङ् मे़वाॽरो॥ 15 खे़ल्ले़चोगुल्ले़ए कङ्हाॽग हाङ्युक्नाओ के़युङ्बा निङ्वाॽफुमाङ्ङिल्ले़ कुदगि मे़ये़प्पाङ् से़न्दिक् ले़न्दिक् कुहिम्मो से़वा मे़जोगुॽरो॥ हे़क्क्याङ् हाङ्युक्नाओ के़युङ्बान् खुनिॽनु वाॽआङ् कम्ब्राङ् मे़त्तुसिॽरो॥ 16 कङ्हाॽ याम्मो आप्फाल्ले़आङ् से़त्लाःक्मा नु आःङ्गुगे़न् वामिःक्माल्ले़ मे़दरुसिन्लो॥ हे़क्क्याङ् नाम्साङ्ङिल्ले़आङ् से़ःप्माआङ् मे़से़ःप्तुसिन्, ये़म्माआङ् मे़ये़म्दुसिन्लो॥ 17 थेआङ्भे़ल्ले़ हाङ्युक्ना लुम्मो के़वाॽबा मे़ल्लुक्साःल्ले़ कङ्हाॽ कमुसिॽ, खुने़ॽ ने़त्तिगे़न् हिङ्मन् के़बिबा वाबुन्नो लाम्लोसुसिरो॥ हे़क्क्याङ् निङ्वाॽफुमाङ्ङिल्ले़ खुनिॽ मिक्वान् तुगु पिरुसिॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.