सुफो 6 - लिम्बुथिक्सिगेक्पा एःप्साप् 1 हे़क्क्याङ् इङ्गाॽ मे़ल्लुक्साःल्ले़ नुसि एःप्साप्पो थिक्सिगेक्पा एःप्साप्पिन् फाःक्खुबा निसुङ्, हे़क्क्याङ् लिसि कुहिङ्वे़त् पाथुङ्साहाॽओ थिक्सिगेक्पाल्ले़ ताङ्साक्पे़न् के़लोङ्बा इक्लाओ “फे़रे़ॽ” पाःत्तुबा खे़प्सुङ्॥ 2 हे़क्क्याङ् फदाङ्बा अन्धिक् निसुङ्॥ खे़न् अन् के़युक्पाल्ले़ कुहुक्को लत्छा लिधिक् कत्तु, हे़क्क्याङ् खे़न् तिचःधिक् मे़बिरुआङ् थङ् के़नाःम्बा कुइसिक् काक् नाःम्मासि फाॽआङ् खुने़ॽ थासिङ्लो॥ निसिगेक्पा एःप्साप् 3 हे़क्क्याङ् मे़ल्लुक्साःल्ले़ निसिगेक्पा एःप्साप्पिन् फाःक्खुल्ले़ निसिगेक्पा कुहिङ्वे़त् पाथुङ्साःल्ले़ “फे़रे़ॽ” पाःत्तुबा खे़प्सुङ्॥ 4 हे़क्क्याङ् हे़ःत्ताङ्बा वेॽसमा अन्धिक् लःन्दे़ फे़रे़ हे़क्क्याङ् मे़न्छाम् याप्मिहाॽ मे़से़त्छिङ्ल फाॽआङ् अन् के़युक्पे़न् इक्सादिङ् खाम्बेःक्मोलाम् सनारुङ्ङिन् खे़प्मादेमा मुक्साम् मे़बिरु॥ हे़क्क्याङ् यम्बा ताभेधिक्काङ् खे़न् मे़बिरु॥ सुम्सिगेक्पा एःप्साप् 5 हे़क्क्याङ् मे़ल्लुक्साःल्ले़ सुम्सिगेक्पा एःप्साप्पिन् फाःक्खुल्ले़ सुम्सिगेक्पा पाथुङ्साःल्ले़ “फे़रे़ॽ” पाःत्तुबा खे़प्सुङ्॥ हे़क्क्याङ् माक्ताङ्बा अन्धिक् निसुङ्, हे़क्क्याङ् खे़न् अन् के़युक्पाल्ले़ कुहुक्को ते़म्दुरिधिक् कत्तु॥ 6 हे़क्क्याङ् खे़प्मो लिसि कुहिङ्वे़त् पाथुङ्साहाॽओलाम् अक्खे के़लॽबा इक्लाधिक् खे़प्सुङ्, “थिक्ये़न्बा नाम्याक् किलो थिक् मासि हे़क्क्याङ् थिक्ये़न्बा नाम्याक् किलो सुम्सि हःक्सिः पोङ्लो॥ कर जैतुन निःङ्गेःन् नु चे़ल्ले़क्सेॽ थिन् फे़त्मे़लाःन्दे़ने़ॽओ॥” लिसिगेक्पा एःप्साप् 7 हे़क्क्याङ् मे़ल्लुक्साःल्ले़ लिसिगेक्पा एःप्साप्पिन् फाःक्खुल्ले़ लिसिगेक्पा कुहिङ्वे़त् पाथुङ्साःल्ले़ “फे़रे़ॽ” पाःत्तुबा खे़प्सुङ्॥ 8 हे़क्क्याङ् इङ्गाॽ अम्दाङ्बा अन्निन् खे़प्मो निसुङ्लो॥ खे़न् अन् के़युक्पाल्ले़ कुमिङ्ग “सिमे़न्” वये़॥ हे़क्क्याङ् खे़मायङ्सङ्ङोबा के़सिबाहाॽरे़ खुने़ॽ मे़दिम्दुरो॥ इक्सादिङ् खाम्बेःक्मोबा कुलक् लिसिओ कुलक् थिक् मे़न्छाम् याप्मिहाॽ थङ्, साक्, तुक्मा नु ताम्भुङ् थक्साहाॽलाम् से़प्मासि फाॽआङ् खे़ङ्हाॽ युक् मे़बिरुसिरो॥ ङासिगेक्पा एःप्साप् 9 हे़क्क्याङ् मे़ल्लुक्साःल्ले़ ङासिगेक्पा एःप्साप्पिन् फाःक्खुल्ले़ निङ्वाॽफु पाःन्जाक्किन् नु ये़सुरे़ कुयाःम्बेओ मे़बाःत्तुबा पाःन्नो नसाःन्साबा मे़जोगे़बाल्ले़ चोगुल्ले़ मे़से़रुसिबा मे़न्छाम् याप्मिहाॽरे़ खुनिॽ याम्साम्हाॽ इङ्गाॽ ले़त्ति तोःम्मादे़न्निल्ले़ कुसिगाङ् निसुङ्सिङ्लो॥ 10 खे़ङ्हाॽ अक्खेलॽरिक् यम्बा इक्लाओ मे़अःक्ते़, “सेसे नु से़क्खाबा मुक्साम्दाङ्बाए, खे़ने़ॽ याप्मि के़से़प्पा इक्सादिङ् खाम्बेःक्मोबा मे़न्छाम् याप्मिहाॽ आप्फाल्ले़ खासे़न् के़लोःन्दुसिआङ् खुम्दिङ् के़बिरुसिबाबे?” 11 खे़ङ्हाॽ काक् फदाङ्बा तेत् मे़बिरुसि॥ हे़क्क्याङ् खे़ङ्हाॽ हे़क्केए से़प्मा के़बोङ्बा वेॽ से़वारोबाहाॽ हे़क्क्याङ् फुॽनुसाॽ ने़ॽनुसाॽहाॽ मे़न्छे़त्छिङ्ङे थारिक् हाङ्घे़म्मे़ॽ फाॽआङ् मे़मे़त्तुसिरो॥ तुक्सिगेक्पा एःप्साप् 12 आल्ल मे़ल्लुक्साःल्ले़ तुक्सिगेक्पा एःप्साप्पिन् फाःक्खुबा निसुङ्॥ हे़क्क्याङ् पयम् यम्बा लुप्लि थाङे़, नाम्मिन्नाङ् माक्थक्ते़आङ् माक्ताङ्बा पोःक्खे़, लाबान्नाङ् माक्खिॽ कुइसिक् हे़ःत्ताङ्बा पोःक्खे़ पे, 13 हे़क्क्याङ् पःत्छेॽबुङ्मान् सुरित्माल्ले़ साॽरिक् वाःन्दुल्ले़ मे़न्दुम्मनाबा पःत्छेॽहाॽ मक्थाबा कुइसिक् यरिक् खेःम्सिक्पाहाॽ इक्सादिङ् खाम्बेःक्मो ताङ्साक्पोलाम् मक्मे़ध्ये़रो॥ 14 हे़क्क्याङ् ताङ्साक्पे़न्नाङ् साप्कित्तिन् कुइसिक् कित्छिङ्ङाङ् चत्छिङ् पेरो॥ काक् कोःक्मा फाङ्जङ्हाॽ नु वागप्खाम्हाॽ मे़घे़त्छिङ् मे़बेरो॥ 15 हे़क्क्याङ् इक्सादिङ् खाम्बेःक्मोबा हाङ्हाॽ, हाङ्युक्पाहाॽ, थक्लिहाङ्हाॽ, याङ्साकुन्धेसाबाहाॽ, के़धुम्बा मुक्के़गुबाहाॽ, हे़क्क्याङ् काक् योःक्पाहाॽ नु चोःक्युम्भोबाहाॽ के़रे़क् कोःक्माओबा फुक्कुहाॽ नु याक्केःक्हाॽओ मे़जिङ्सिङ्लो॥ 16 खे़ङ्हाॽरे़ कोःक्माहाॽ नु लुङ्हाॽ अक्खे मे़मे़त्तुरो, “आनिगे सम्दाङ् मक्थ्ये़ॽआङ् हाङ्युक्नाओ के़युङ्बान् हे़क्क्याङ् मे़ल्लुक्साःल्ले़ कुसिक्के़न्लाम्बा याप्मि आधेःक्ते़ॽ आजिक्खे़ॽओ! 17 थेआङ्भे़ल्ले़ कप्मो खुन्छिॽ किप्मा के़घुबा सिक् पोःक्माल्ले़न् यम्बा ये़न् त्ये़आङ् वाॽ॥ हाःत्ले़ खे़न् थःप्मा सुक्तुबे?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.