सुफो 12 - लिम्बुमे़न्छुमाॽ नु यम्बा हन्दगेःक्गे़न् वासेरिःन् 1 हे़क्क्याङ् तरःङ्दिङ् ताङ्साक्पो इङ्गाॽ निङ्वाॽ के़माबा मिक्सेन् निसुङ्लो॥ खे़प्मो चाङ् चाङ्मनाबा कुइसिक् नाम्मिन् के़जाङ्मा मे़न्छुमाॽधिक् वये़रो॥ खे़ल्ले़ कुलाङ्भोसाङ् लाबान् पत्छे़ हे़क्क्याङ् कुधे़गेक् सम्दाङ् थिक्-ने़त् खेःम्सिक्हाॽरे़न् तिचः खुःक्खुआङ् पत्छे़॥ 2 खे़न् मे़न्छुक्मा वये़ हे़क्क्याङ् कुसावाःम्मा ये़म्मिन् त्ये़बाल्ले़ सावाःन्दुङ्ङिल्ले़ तरुआङ् यारे़र वये़॥ 3 हे़क्क्याङ् तरःङ्दिङ् ताङ्साक्पो याम्मो इङ्गाॽ वेॽसमा निङ्वाॽ के़माबा मिक्सेःन्धिक्काङ् निसुङ्लो—खे़प्मो हे़ःत्के़लॽबा नुसि कुधे़गेक् के़बप्पा पयम् यम्बा किप्मा के़घुबा हन्दगेःक्गे़न् वासेरिःन् वये़रो॥ खे़ल्ले़ नुसि कुधे़गेःक्हाॽओ नुसि तिचःहाॽ खुःक्खुआङ् पत्छे़॥ खे़ल्ले़ थिबोङ् कुदाङ्हाॽ युङे़रो॥ 4 खे़ल्ले़ कुमेःल्ले़ ताङ्साक्पोबा कुलक् सुम्सिओ कुसुक्वा थिक् खेःम्सिक्हाॽ इक्सादिङ् खाम्बेःक्मो यो सुःन्दु थासुसिरो॥ हे़क्क्याङ् अङे़ःक्वान् सावाःन्दुल्ले़ लरुङ्देःसुङ् फाॽआङ् मे़न्छुमाॽइल्ले़ कुदगि खे़न् पेआङ् ये़म्सिङ्लो॥ 5 खे़न् मे़न्छुमाॽइल्ले़ इक्सादिङ् खाम्बेःक्मो फे़न्जेॽ तक्काःत्तिल्ले़ काक् मे़न्छाम् सुवाङ् सम्दाङ् हाङ् के़जोःक्पा अङे़ःक्वासान् सावाःन्दु॥ खे़न् अङे़ःक्वान् सावाःन्छिङ्नामे़ःन्ने निङ्वाॽफुमाङ्ङो हे़क्क्याङ् कुहाङ्युक्नाओ थाःङ् मे़घे़त्तु मे़देॽरुरो॥ 6 हे़क्क्याङ् खे़न् मे़न्छुमाॽइन् हे़न्छिङ् थिक् किप् ने़त्छिआङ् तुक्पोङ् (१,२६०) ये़न् थारिक् चा मे़प्मा फाॽआङ् एःक्सादे़न्नो निङ्वाॽफुमाङ्ङिल्ले़ यारिप् चोगुबा ते़न्नो खे़त्छिङ् पेरो॥ 7 हे़क्क्याङ् साङ्ग्राम्पेदाङ्ङो पयम् यम्बा ते़न्धङ् पोःक्खे़रो॥ मिखाएलहे़क्क्याङ् खे़ल्ले़ कुमाङ्लाइङ्बाहाॽरे़ खे़न् हन्दगेःक्गे़न् वासेरिःन् हे़क्क्याङ् खे़ल्ले़ कुमाङ्लाइङ्बाहाॽनु थङ् मे़जोगुरो॥ 8 कर खे़न् हन्दगेःक्गे़न् वासेरिःन् नु खे़ल्ले़ कुमाङ्लाइङ्बाहाॽ थङ्ङो हारिमे़द्ये़आङ् खे़ङ्हाॽरे़ साङ्ग्राम्पेदाङ्ङो खुनिॽ युङ्मा ते़न्निन् मे़मासु॥ 9 कन् पयम् यम्बा हन्दगेःक्गे़न् वासेरिःङ्ग उन्छोःन्बा असेःक्पे़न्लो, खे़ङ्ग इक्सादिङ् खाम्बेःक्मोबाहाॽ इङ्ले़क् के़मे़प्पा माफे़न्साम् इग्र सैतान मे़मे़त्तुरो॥ खे़ङ्ग कुमाङ्लाइङ्बाहाॽनु यो इक्सादिङ् खाम्बेःक्मो लाप्फुसे़रो॥ 10 हे़क्क्याङ् साङ्ग्राम्पेदाङ्ङो अक्तङ्बा यम्बा इक्लाधिक् खे़प्सुङ्, “आल्ल निङ्वाॽफुमाङ्ङिल्ले़ कुसे़न्लप्, कुमुक्साम्, कुहाङ्जुम् नु खुने़ॽ सेःन्दुबा ख्रिस्ते़ल्ले़ कुयुक्किन् त्ये़आङ् वाॽरो॥ थेआङ्भे़ल्ले़ निङ्वाॽफुमाङ्ङिल्ले़ कुदगि से़न्दिक् ले़न्दिक् आनिॽ नसानिबा फुॽनुसाॽ ने़ॽनुसाॽहाॽ आप्तिक् के़गुःप्पार के़ने़बान् यो इक्सादिङ् खाम्बेःक्मो लाप्मे़भुसु मे़धासुरो॥ 11 आनिॽ नसानिबा फुॽनुसाॽ ने़ॽनुसाॽहाॽरे़ग मे़ल्लुक्साःल्ले़ कुमाक्खिॽ नु खे़ङ्हाॽरे़ इङ्मे़भोसुबा से़क्खाःल्ले़ खे़न् माफे़न्साम्मिन् मे़नाःन्दुआङ् मे़वाॽरो॥ हे़क्क्याङ् खे़ङ्हाॽग सिमाआङ् मे़ङ्गिसे़न्लो॥ 12 खे़ल्ले़चोगुल्ले़ साङ्ग्राम्पेदाङ् नु खे़प्मो के़वाॽबासे, सःत्ते़म्मे़ॽओ! कर इक्सादिङ् खाम्बेःक्मो नु वरःङ्ङो के़वाॽबासे, खिनिॽग के़जिःत्ति के़स्ये़ॽइरो, थेआङ्भे़ल्ले़ माफे़न्साम्मिङ्ग खिनिॽओ थ्ये़आङ् वाॽरो॥ खे़ल्ले़ साॽरिक् कुसिक्के़न् पोगे़, थेआङ्भे़ल्ले़ खे़ल्ले़ कुये़म्मिन् सुःल्लिक्लक् वाॽ फाॽआङ् निङ्वाॽ खोसुआङ् वाॽ॥” 13 हे़क्क्याङ् हन्दगेःक्गे़न् वासेरिःल्ले़ खुने़ॽ इक्सादिङ् खाम्बेःक्मो लाप्मे़भुसाङ् के़लॽबा निङ्वाॽ खोसुआङ् खे़न् अङे़ःक्वासा के़गप्मा मे़न्छुमाॽइन् तुक्खे चाःत्छे़ नाःप्मा हेःक्तु॥ 14 कर खे़न् मे़न्छुमाॽइन् हन्दगेःक्गे़न् वासेरिःल्ले़ मे़याङ्घुन्ल फाॽआङ् एःक्सादे़न्नो यारिप् चोःक्मनाबा चिङ्सिङ्मादे़न्नो खे़त्छिङ्मा पेःक्मा सुक्ल फाॽआङ् पयम् यम्बा ने़त्छि मुया लाप्हाॽ मे़बिरुरो॥ खे़प्मो तङ्बे सुम्सिआङ् कुभ्रे़ःङ् थारिक् खुने़ॽ चा मे़मे़त्तुॽरो॥ 15 खे़न् हन्दगेःक्गे़न् वासेरिःल्ले़ खे़न् मे़न्छुमाॽइन् च्वाःत्तिल्ले़ वादेःम्मा तेमाआङ् से़प्मा फाॽआङ् यङ्घङ् क्याःप्पा च्वाःत्तिन् कुमुराओलाम् असु लःत्तुरो॥ 16 कर इक्सादिङ् खाम्बेःक्माल्ले़ खे़न् हन्दगेःक्गे़न् वासेरिःल्ले़ कुमुराओलाम् असु लःत्तुबा यङ्घङ्ङिन् काक् लरुदेःसुआङ् खे़न् मे़न्छुमाॽइन् कुभाॽ पिरुरो॥ 17 हे़क्क्याङ् खे़न् हन्दगेःक्गे़न् वासेरिःल्ले़ मे़न्छुमाॽइन्नु साॽरिक् कुसिक् पोगे़आङ् निङ्वाॽफुमाङ्ङिल्ले़ कुइङ्जाङ् के़नाःप्पा के़इःप्पा नु ये़सुरे़ कुनिसाम् नसान् के़जोःक्पा खे़न् मे़न्छुमाॽइल्ले़ वेॽ कुमुॽइदाङ्साहाॽनु थङ् चोगुरो॥ 18 हे़क्क्याङ् खे़न् हन्दगेःक्गे़न् वासेरिःन् वरःङ्ङिल्ले़ कुयाओ ये़म्सिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.