निङ्वाॽफु साम्लोसुम् 99 - लिम्बुनिङ्वाॽफुमाङ्ङिन् पयम् हाङ् 1 यहवे दाङ्बे़ल्ले़ हाङ्युक् चोगुरो, इक्सादिङ् खाम्बेःक्मोबा मे़न्छाम् याप्मिहाॽ थे़गक्कक्ना मे़यङ्लरो॥ खुने़ॽग करुब माङ्लाइङ्बाहाॽरे़ खुनिॽ लुम्मोबा हाङ्युक्नाओ युङ्लो इक्सादिङ् खाम्बेःक्मान् यङ्लरो॥ 2 यहवे दाङ्बान् सियोनओ पयम् यम्बा चोक्लो, खुने़ॽग काक् मे़न्छाम् सुवाङ्हाॽओ के़रे़क्नुःल्ले़ यम्बा चोक्लो॥ 3 के़रे़क्ले़ पयम् यम्बा नु मिङ्सो इङ्धाङ् पिमा के़लाॽबा कुमिङ्ङिन् मिमिदिङ् मे़बिरुरो, थेआङ्भे़ल्ले़ खुने़ॽ सेसेबा चोक्लो॥ 4 मुक्साम्दाङ्बा हाङ्ङे, नुबा पाःन्हाॽ चोःक्मा खे़ने़ॽ के़सिराॽ थाङ्लो, इस्राइलबा मनाहाॽरे़ लागि कुदोःप्मा खासे़न् के़जोगुआङ् वाॽरो, हे़क्क्याङ् साम्योबा पाःन्हाॽ नु नुबा खासे़न् के़जोगुआङ् वाॽरो॥ 5 यहवे दाङ्बा आनिॽ निङ्वाॽफुमाङ्ङिल्ले़ कुनारा फोसे़म्मे़ॽओ, हे़क्क्याङ् कुहाङ्युक्नाओ से़वा चोगे़म्मे़ॽओ, खुने़ॽ सेसेबा चोक्लो॥ 6 मोसान् नु हारुने़न् ने़प्माङ् खुने़ॽओ से़वा के़जोःक्पा निङ्वाॽफुसाम्बा वये़सिरो, हे़क्क्याङ् खुने़ॽओ पेलिगे़न् तुवा के़जोःक्पाग सामुए़ल्ले़न्नाङ् वये़रो॥ खे़ङ्हाॽरे़ यहवे दाङ्बान् पेलि मे़भाक्तुआङ् खुने़ॽ नुगप् पिरुसिरो॥ 7 खुने़ॽ खाॽमित् सित्लाङ्लाम्बा खे़ङ्हाॽनु पारे़रो, खुने़ॽ पिरुसिबा थिम् नु इङ्जाङ्हाॽ खे़ङ्हाॽरे़ मे़इःत्तु मे़नाःत्तुरो॥ 8 आनिगे निङ्वाॽफुमाङ् यहवे दाङ्बाए, इस्राइलबा के़मनाहाॽ नोगप् के़बिरुसिरो॥ खे़ङ्हाॽरे़ खुनिॽ लायोल्ले़ चोगुल्ले़ खुम्दिङ् के़बिरुसिरो, हे़क्केसाङ् ले़प्मि के़बिबा निङ्वाॽफुमाङ्ने़ फाॽआङ् खे़ङ्हाॽ ओसेःन्गे़धाक्तुसिरो॥ 9 यहवे दाङ्बा आनिॽ निङ्वाॽफुमाङ्ङिल्ले़ कुनारा फोसे़म्मे़ॽओ, हे़क्क्याङ् कुसेसे कोःक्माओ से़वा मे़त्ते़म्मे़ॽओ, यहवे दाङ्बा आनिॽ निङ्वाॽफुमाङ्ङिन् सेसे चोक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.