निङ्वाॽफु साम्लोसुम् 98 - लिम्बुनिङ्वाॽफुमाङ्ङिल्ले़ कुनारा फोमा 1 यहवे दाङ्बे़ल्ले़ कुलागि कुसङ् से़वासाम्लोधिक् साम्मे़त्ते़म्मे़ॽओ, थेआङ्भे़ल्ले़ खुने़ॽ निङ्वाॽ के़माबा पाःन्हाॽ चोगुआङ् वाॽरो, निङ्वाॽफुमाङ्ङिल्ले़ आबाङे कुमुक्साम् नु सेसे कुधुम्मिल्ले़ थङ् नाःन्दुआङ् वाॽरो॥ 2 यहवे दाङ्बे़ल्ले़ से़न्लप् आबिबा पाःन्निन् आबाङे ओसेःन्दाङ् चोगुआङ् वाॽरो, खुने़ॽ साम्योबा चोःक्पा पाःन्निन् इक्सादिङ् खाम्बेःक्मोबा मे़न्छाम् सुवाङ्हाॽ ओसेःन्धाक्तुसिआङ् वाॽरो॥ 3 खुने़ॽ इस्राइलिहाॽ सदादिङ् लुङ्माॽ तुक्निङ् हे़क्क्याङ् इङ्मे़ले़क्निङ्ङिन् फाॽआङ् चोगुबा माङ्हुप्पिन् निङ्वाॽ इःत्तुरो, के़रे़क् मे़न्छाम् सुवाङ्हाॽरे़ खुने़ॽ आबिबा से़न्लप्पिन् मे़निसुरो॥ 4 इक्सादिङ् खाम्बेःक्मोबा मनासे, सःत्ते़म्मेॽर यहवे दाङ्बे़ल्ले़ कुलागि खिनिॽ साम्लोरे़म्मे़ॽओ, निङ्वाॽ के़दाबा से़वासाम्लोलाम्बा खुने़ॽ कुनारा फोसे़म्मे़ॽओ॥ 5 यहवे दाङ्बे़ल्ले़ कुनारा फोसे़म्मे़ॽओ, लुङ्माॽ हिःम्ल अन्मे खिङ्मनाबा मुक्लाःन् मुक्खे़म्मे़ॽओ॥ 6 थुत्तुरिःप्पा नु थुःम्बाःल्ले़ कुदाङ्ङिन् मुःत्ते़म्मे़ॽओ, यहवे दाङ्बा पयम् यम्बा हाङ्ङिल्ले़ कुलागि यम्बा इक्लाओ अःक्ते़म्मे़ॽर सःत्ते़म्मे़ॽओ॥ 7 वरःङ् नु खे़प्मो के़याक्पा के़रे़क् पाधुङ् ले़ःक्ङाहाॽ मे़अःक्लरो, खाम्बेःक्मा नु खे़प्मो के़युङ्बा के़रे़क्ले़ खुने़ॽ कुनारा मे़भोसुररो॥ 8 वहःङ् यङ्घङ्हाॽरे़ हिप्ला मे़हिप्तुररो, थे़गुहाॽ थिक्हुप् मे़बोङ्ङाङ् मे़सःत्ल साम्मे़लोररो॥ 9 यहवे दाङ्बे़ल्ले़ कुदगि खे़ङ्हाॽ साम्मे़लोररो, थेआङ्भे़ल्ले़ खुने़ॽ इक्सादिङ् खाम्बेःक्मो खासे़न् चोःक्से़ युर पत्लो॥ खुने़ॽग इक्सादिङ् खाम्बेःक्मोबा मनाहाॽ साम्योबा नु कुदोःप्मा खासे़न् चोगुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.