निङ्वाॽफु साम्लोसुम् 97 - लिम्बुनिङ्वाॽफुमाङ्ङिल्ले़ कुमिङ्सो 1 यहवे दाङ्बे़ल्ले़ हाङ्युक् चोगुरो, इक्सादिङ् खाम्बेःक्मान् सःत्लरो, वरःङ्ङोबा वागप्खाम्हाॽ ये़ये़ मे़लॽररो॥ 2 खुने़ॽग खाॽमिःत्तिन् नु खामाक्माल्ले़ कब्रिङ् कबुआङ् पत्लो, साम्योबा नु कुदोःप्मा खासे़न् लोःन्दुर खुने़ॽ हाङ्युक् चोगुरो॥ 3 खुने़ॽ कुदगाङ् कुदगाङ् मिधुङ् मिराःक् पेःक्लो, खे़ल्ले़ कुघिरि के़वाॽबा कुनिङ्मिहाॽ खाप्पुथ्यःङ् चोगुसिरो॥ 4 खुने़ॽ साःम्भे ले़क्ल याःन्दुआङ् इक्सादिङ् खाम्बेःक्मान् थोॽरुरो, खे़न् इक्सादिङ् खाम्बेःक्माल्ले़ निसुआङ् थे़गक्कक्ना यङ्लो॥ 5 यहवे दाङ्बे़ल्ले़ कुदगि, के़रे़क् इक्सादिङ् खाम्बेक् दाङ्बे़ल्ले़ कुदगि, थे़गु माङ्वाहाॽ कोःक्मा फाङ्जङ्हाॽ थुम्बुॽ कुइसिक् मे़योःन् मे़बेःक्लो॥ 6 तरःङ्दिङ् ताङ्साक्पाल्ले़ निङ्वाॽफुमाङ्ङिन् साम्योबा चोक् फाॽआङ् इङ्भोसुरो, के़रे़क् सुवाङ्हाॽरे़ कुमिमिदिङ्ङिन् मे़निसुरो॥ 7 नावाइत्लाहाॽओ माङ्गे़घबाहाॽ के़रे़क् सिरिङ्ममो मे़धारो, यहवे दाङ्बान् के़रे़क् माङ्साम्माङ्हाॽरे़ से़वा मे़मे़त्तुरो॥ 8 यहवे दाङ्बाए, खे़ने़ॽ कुदोःप्मा खासे़न् के़जोगुबाल्ले़ चोगुल्ले़ सियोन ये़क्यक्को के़युङ्बाहाॽ पसःत् मे़सःत्लो, हे़क्क्याङ् यहुदा लाजेॽबा ये़क्यक्हाॽओ के़युङ्बाहाॽआङ् खुनिॽ निङ्वाॽ तारो॥ 9 थेआङ्भे़ल्ले़ के़रे़क्नुःल्ले़ पयम् यम्बा यहवे दाङ्बाए, के़रे़क् इक्सादिङ् खाम्बेःक्मान् खे़ने़ॽग हाङ्युक् के़जोगुरो, खे़ने़ॽग के़रे़क् माङ्साम्माङ्हाॽनुःल्ले़ साॽरिक् पयम् यम्बा के़जोःक्लो॥ 10 ताप्फे़ःम्बा पान् के़जिःप्पाहाॽ यहवे दाङ्बे़ल्ले़ लुङ्माॽ तुक्तुसिरो, खुने़ॽ कुसेसे मनाहाॽ से़ःप्तुसिरो, खे़ङ्हाॽ ताक्के़भे़ॽबाहाॽरे़ खुनिॽ हुक्कोलाम् थेःक्तुसिरो॥ 11 साम्योबा मनाहाॽओ ओःत्तिःन् ओःत्लो हे़क्क्याङ् कुदोःप्मा निङ्वाॽ के़गप्पा मनाहाॽओ सिक्सम्मान् तारो॥ 12 साम्योबासे, यहवे दाङ्बे़ल्ले़ चोगुबा याःम्बक्किल्ले़ चोगुल्ले़ सःत्ते़म्मे़ॽओ, सेसे निङ्वाॽफुमाङ्ङिन् नुगे़न् पिरे़म्मे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.