निङ्वाॽफु साम्लोसुम् 96 - लिम्बुनिङ्वाॽफुमाङ्ङिन् पयम् हाङ् ( १ साप्मु १६:२३-३३ ) 1 यहवे दाङ्बा निङ्वाॽफुमाङ्ङो कुसङ् से़वासाम्लोधिक् साम्मे़त्ते़म्मे़ॽओ, कन् इक्सादिङ् खाम्बेःक्मोबा के़रे़क्ले़ यहवे दाङ्बे़ल्ले़ कुनारा फोसे़म्मे़ॽओ॥ 2 यहवे दाङ्बे़ल्ले़ कुसे़वा साम्लोन् साम्मे़त्ते़म्मे़ॽओ हे़क्क्याङ् खुने़ॽ कुनारा फोसे़म्मे़ॽओ, खुने़ॽ से़न्लप् आबिरे़बा पाःन्निन् थिक्याःन्धक् इङ्भन् चोगे़म्मे़ॽओ॥ 3 खुने़ॽ कुमिङ्सो कुधाःङ्सोःन् इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ मे़त्ताम्सिम्मे़ॽओ, खुने़ॽ चोगुबा निङ्वाॽ के़माबा याःम्बक्हाॽ के़रे़क् मनाहाॽ चे़क्ताम्सिम्मे़ॽओ॥ 4 थेआङ्भे़ल्ले़ यहवे दाङ्बान् पयम् यम्बा चोक्लो, खुने़ॽ कुनारा फोमा साॽरिक् लाॽरुरो, के़रे़क् माङ्हाॽनुःल्ले़ खुने़ॽए चाॽरिक् किप्मा पोङ्लो॥ 5 थेआङ्भे़ल्ले़ मे़न्छाम् सुवाङ्हाॽरे़ खुनिॽ के़रे़क् माङ्हाॽग नावाइत्लासिरक्लो, कर यहवे दाङ्बे़ल्ले़ग साङ्ग्राम्पेदाङ्ङिन् नावागे़न् चइःत् चोगुबारो॥ 6 हाङ्वा माङ्वा नु मिमिदिङ्ङिन् खुने़ॽ कुदगि वाॽरो, मुक्साम् नु कुघे़म्सिङ्माल्ले़ कुहिम्मिन् थिम्सुआङ् वाॽरो॥ 7 इक्सादिङ् खाम्बेःक्मोबा के़रे़क् मे़न्छाम् सुवाङ्से, यहवे दाङ्बे़ल्ले़ कुनारा फोसे़म्मे़ॽओ, यहवे दाङ्बान् मिमिदिङ् पिरे़म्मे़ॽआङ् कुमुक्साम्मिन् इङ्भोसे़म्मे़ॽओ॥ 8 यहवे दाङ्बान् लाॽरुबा मिमिदिङ् पिरे़म्मे़ॽओ, हुक्सोयाङ्नु कुहिम्मो पेगे़म्मे़ॽओ॥ 9 खुने़ॽ सेसेगे़न् कुमिमिदिङ्ङो यहवे दाङ्बान् से़वा मे़त्ते़म्मे़ॽओ॥ इक्सादिङ् खाम्बेःक्मोबा मनासे, के़रे़क् कुदगि थे़गक्कक्ना यक्खे़म्मे़ॽओ॥ 10 इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ मे़त्ते़से़ॽओ, “यहवे दाङ्बे़ल्ले़ हाङ्युक् चोगुरो, इक्सादिङ् खाम्बेःक्मान् कुयुक्नाओ थधप् मे़ल्लॽए युङ्ङाङ् मे़मुन्ने़ल्लो॥ खुने़ॽ मनाहाॽ कुदोःप्मा खासे़न् लोःन्दुसिरो॥” 11 साङ्ग्राम्पेदाङ्ङिन् कुनिङ्वा ताररो, हे़क्क्याङ् इक्सादिङ् खाम्बेःक्मान् पसःत् सःत्लरो, वरःङ्ङिन् सःक्ल हे़क्क्याङ् खे़ॽयो के़याक्पा के़रे़क् पाधुङ्साहाॽरे़ खुने़ॽ कुनारा मे़भोसुर मे़अःक्लरो॥ 12 प्याङ्सिगे़न् इक्ताप्पिन् नु खे़प्मोबा के़रे़क् कुजाहाॽ सःत्ते़म्मे़ॽओ॥ थाबुसिङ्ला पोःक्लाहाॽ सःत्ते़म्मेॽर साम्लोरे़म्मे़ॽओ, 13 यहवे दाङ्बान् इक्सादिङ् खाम्बेःक्मो खासे़न् लोःन्छे़ युरो॥ इक्साबा लाजेॽहाॽओ साम्योबा नु कुदोःप्मा खासे़न् लोःन्दुर हाङ्युक् चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.