निङ्वाॽफु साम्लोसुम् 94 - लिम्बुखासे़न्ले़ लागि पेलि 1 यहवे दाङ्बाए, मना खुम्दिङ् के़बिबा निङ्वाॽफुमाङ्ङे, खे़ने़ॽग कुले़क्वा के़नुःक्पा निङ्वाॽफुमाङ्ने़रो॥ खे़ने़ॽ के़घासे़न् लोःम्मा मिमिदिङ्गे़न् के़ओःत्तिन् ओसेःन्दाङ् चोगे़ॽओ॥ 2 के़रे़क् मे़न्छाम् याप्मिहाॽ खासे़न् के़जोःक्पा खासे़न्दाङ्बाए! पोगे़ॽओ, हे़क्क्याङ् आङ्दिङ् के़लॽबाहाॽरे़ तुम्मा के़बोङ्बा पाःन्हाॽ मे़दुमुर याःन्दे़से़ॽओ॥ 3 यहवे दाङ्बाए, आभे़ल्ले़ थारिक् ताक्के़भे़ॽबाहाॽ मे़सःप्पाबे? कुइगे़भे़म्बाहाॽ आक्ख्यारिक् इरिक् खुनिॽ सिक्सम्बाबे? 4 खे़ङ्हाॽग आङ्दिङ् लॽमा पान् मे़बाःत्लो, कुइगे़भे़म्बाहाॽ के़रे़क् पहे़न् मे़हे़न्छिङ्ङाङ् मे़वाॽरो॥ 5 यहवे दाङ्बाए, खे़ने़ॽ के़मनाहाॽ खे़ङ्हाॽरे़ मे़एःप्तुसि मे़युक्तुसिरो, हे़क्क्याङ् खे़ङ्हाॽरे़ के़सेगुसिबा मनाहाॽ साॽरिक् तुक्खे मे़जाःत्तुसिरो॥ 6 खे़ङ्हाॽरे़ मेमेदुमाहाॽ नु ये़त्छाबाहाॽ मे़से़रुसिरो, हे़क्क्याङ् आनिॽ लाजेॽओ याङ्धोःक्से़ के़दाबाहाॽआङ् हदॽ मे़देसुसिरो॥ 7 खे़ङ्हाॽरे़ अक्खे मे़बाःत्तुरो, “यहवे दाङ्बे़ल्ले़ आनिॽ आन्निने़न्, इस्राइलबा निङ्वाॽफुमाङ्ङिल्ले़ आजोगुम्बा पाःन्हाॽ निङ्वाॽ मे़घोसुन्॥” 8 मे़न्छाम् याप्मिलुम्मो खासिङ् मे़न्निःप्मनाबासे, ने़हिनिङ्वाॽ के़होःप्पासे, आभे़ल्ले़ सिक्कुम्साबा के़बोःक्खिबाबे? 9 ने़क्खोॽ के़जोःक्पान् नामे़घे़म्ने़म्बि? मिक् के़जोःक्पान् मिक् मे़निने़म्बि? 10 खुने़ॽग इक्सादिङ् खाम्बेःक्मोबा मे़न्छाम् सुवाङ्हाॽ फे़ःक्तुसिरो, थे खुने़ॽ खे़ङ्हाॽ खुम्दिङ् मे़बिरुन्छिन्बि? मे़न्छाम् याप्मिहाॽ सिक्कुम्दिङ् निङ्वाॽ के़बिबान् ने़हिनिङ्वाॽरे़ हाप्तुबि? 11 मे़न्छाम् याप्मिहाॽरे़ खुनिॽ निङ्वाॽ पाःन्हाॽ हने़बा चोक् फाॽआङ् यहवे दाङ्बे़ल्ले़ निसुरो, खे़ङ्हाॽ कुसुम् मे़न्दम्मनाबा मे़जोक् फाॽआङ् खुने़ॽ कुसिङ् निःत्तुरो॥ 12 यहवे दाङ्बाए, आत्तिन् मनान् निसाम् के़बिरु, खे़न् मनान् पसःत्सःत्लो, थेआङ्भे़ल्ले़ खे़न् साम्योथिम् के़हुॽरुरो॥ 13 ताक्के़भे़ॽबा मनाहाॽ लुम्बाःत्ताे मे़बेःक्लो, खे़न् ये़म्मो थारिक् इनोगे़न् तुक्खेओआङ् के़मनाहाॽ साॽरिक् नुॽमादामा के़बिरुसिरो॥ 14 यहवे दाङ्बे़ल्ले़ कुमनाहाॽ लाप्मे़भुसुन्छिन्लो, आबाङे कुलक् के़घोबा कुयाप्मिहाॽ खुने़ॽ मे़ले़रुन् मे़देसुन्छिन्लो॥ 15 साम्योबा खासे़न् याम्मोआङ् पोङ्लो, कुदोःप्मा निङ्वाॽ के़गप्पा के़रे़क्ले़ खे़न् मे़दिम्दु मे़नाःत्तुरो॥ 16 ताक्के़भे़ॽबाहाॽरे़ आङ्गाॽ मे़हिप्पाल्ले़ हात् आभाॽसे़ ये़म्सिङ्बाबे? कुइगे़भे़म्बाहाॽरे़ आङ्गाॽ मे़भत्ताल्ले़ आत्तिन् आनाङ्से़ पोःक्पाबे? 17 आङ्गाॽ के़भाॽबा यहवे दाङ्बान् होःप्ते़ल्ले़ग स्याङ्बारो, हे़क्क्याङ् आङ्गाॽ तगिसा खे़मादिङ् यङ्सङ्ङो के़राङ्बारो॥ 18 यहवे दाङ्बाए, आङ्गाॽ चोःम्मा इःत्ताङ् लॽरिक् पाःत्तुङ्लो, हे़क्केःल्ले़ आङ्गाॽ लुङ्माॽ के़दुक्ताङ्ल के़दक्ताङ्लो॥ 19 आङ्गाॽ आनिङ्वाॽओ साॽरिक् तुक्खे च्याङ्ङाङ् वयाङ्लो, हे़क्केःल्ले़ हाङ्हाङ् के़मे़त्ताङ्ङाङ् आङ्गाॽ सःत्ताङ्ल के़याःन्दाङ्लो॥ 20 कर कुइगे़भे़म्बा युक्साबाहाॽनु खे़ने़ॽ के़न्वाॽने़ल्लो, खे़ङ्हाॽरे़ग आबाङे खुनिॽ चोःक्थिम्लाम्बा के़साक्पा पाःन्हाॽ मे़दारुरो॥ 21 खे़ङ्हाॽग साम्योबाहाॽ से़प्मासि फाॽआङ् थिक्हुप् मे़बोङ्लो, हे़क्क्याङ् कुदोःप्मा मनाहाॽ सिमे़ल्ले़न् खुम्दिङ् मे़बिरुसिरो॥ 22 कर यहवे दाङ्बान् आसे़ःप्सिङ्मादे़न् पोःक्खे़आङ् वाॽरो, आनिङ्वाॽफुमाङ्ङिन् आसे़न्लप्दाङ्बा आइःम्सिङ्मा याक्पेॽ पोःक्खे़आङ् वाॽरो॥ 23 निङ्वाॽफुमाङ्ङिल्ले़ कुइगे़भे़म्बाहाॽ खुनिॽ लायोल्ले़ चोगुल्ले़ खुम्दिङ् पिरुसिरो, खुनिॽ फे़न्याःम्बक्किल्ले़ चोगुल्ले़ खे़ङ्हाॽ मे़क्खुसिरो, आनिॽ यहवे दाङ्बा निङ्वाॽफुमाङ्ङिल्ले़ खे़ङ्हाॽ हदॽ से़रुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.