निङ्वाॽफु साम्लोसुम् 93 - लिम्बुनिङ्वाॽफुमाङ्ङिन् पयम् यम्बा हाङ् 1 यहवे दाङ्बे़ल्ले़ हाङ्युक् चोगुरो, खुने़ॽग मिमिदिङ्ले़ काबुबा चोक्लो, हे़क्क्याङ् मुक्साम्साबा चोक्लो॥ इक्सादिङ् खाम्बेःक्माल्ले़ कुबुङ्ङिन् थधप् मे़लॽने़न्लो, खे़न् आभे़ल्ले़आङ् मे़मुन्ने़ल्लो॥ 2 खे़ने़ॽ के़हाङ्युक्नाःङ्ग तोलिङ्सोमुआङ्धोए युक्सिङ् पोःक्खे़आङ् वाॽरो, खे़ने़ॽग उनाहुरि उनाहुरिआङ्धोए के़वाॽरो॥ 3 यहवे दाङ्बाए, वरःङ्हाॽ उःक्तुथाङे़आङ् ने़रो, ते़मे़न्दिङ् वरःङ्हाॽओ वाभे़ल्ले़ङ्हाॽ पोगे़आङ् सःक्काङ् ने़रो॥ खे़प्मो के़बोःक्पा वाभे़ल्ले़ङ्हाॽ किप्मा पघुघुर छिम्लिङ् छिम्लिङ् लॽरो॥ 4 यहवे दाङ्बान् साङ्ग्राम्पेदाङ्ङो पयम् यम्बा चोःक्काङ् हाङ्युक् चोगुरो, ते़मे़न्दिङ् वरःङ्ङिन् सःक्पानुःल्ले़आङ् यम्बा, वरःङ्ङोबा किप्मा के़घुबा वाभे़ल्ले़ङ्नुःल्ले़आङ् मुक्साम्साबा पोङ्ङाङ् खुने़ॽ हाङ्युक् चोक्लो॥ 5 यहवे दाङ्बाए, खे़ने़ॽ के़धिम्हाॽ आभे़ल्ले़साङ् वाॽरो, हे़क्क्याङ् के़हिम्मिन् सदादिङ् सेसेबा चोक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.