निङ्वाॽफु साम्लोसुम् 92 - लिम्बुनिङ्वाॽफुमाङ्ङिल्ले़ कुनारा फोमा नाःम्सिङ्मा ये़न्निल्ले़ लागि साम्लो 1 यहवे दाङ्बान् मिङ्सो इङ्धाङ् पिमाग साॽरिक् नुबा चोक्लो, हे़क्क्याङ् साम्लोनु के़रे़क्नुःल्ले़ पयम् यम्बा निङ्वाॽफुमाङ्ङिल्ले़ कुनारा फोमा खे़म्दुरो॥ 2 तानाम् थप्मा लुङ्माॽ के़दुक्काबा पाःन्निन् आङ्गाॽ पाःत्तुङ्ल साम्लोआरो, हे़क्क्याङ् से़न्दिक् थक्मा खे़ने़ॽ नसाःन्साबा के़जोःक्पा पाःन्निन् इङ्भन् चोगुङ्लो॥ 3 के़नारा फोसुङ्ल तुःङ्गेन् हिप्तुङ्लो हे़क्क्याङ् अन्मेन् मुक्खुङ्लो॥ 4 थेआङ्भे़ल्ले़ यहवे दाङ्बाए, के़याःम्बक्किल्ले़ आसिक् के़सम्बा चोगाङ्लो, के़जोगुबा पाःन्निल्ले़ पसःत्के़सःप्पार साम्गे़लोबा चोगाङ्लो॥ 5 यहवे दाङ्बाए, के़याःम्बक्हाॽग साॽरिक् यम्बा चोक्लो, खे़ने़ॽ के़इःत्तुबा पाःन्हाॽग कुसिङ् निःप्मा के़साक्पा चोक्लो॥ 6 खासिङ् मे़न्निःप्मनाबाल्ले़ कन् पाःन्निन् कुसिङ् निःप्मा मे़सुक्तुन्लो, कन् पाःन्निन् अदङ् मनाःल्ले़ मे़ले़सुन् मे़निसुन्लो— 7 ताक्के़भे़ॽबाहाॽ यान् कुइसिक् मे़बोमे़धाङ्लो, हे़क्क्याङ् कुइगे़भे़म्बा मनाहाॽ मे़नुॽमे़दासाङ् खे़ङ्हाॽग के़रे़क् मे़मे़क्लो॥ 8 कर यहवे दाङ्बाए, खे़ने़ॽग सदादिङ् आभे़ल्ले़साङ् थाःङ् के़युङ्लो, 9 खे़ने़ॽ के़रे़क् के़निङ्मिहाॽ हारिमे़दा फाॽआङ् आनिगे निसुम्बे़रो, के़निङ्मिहाॽ खक्पे़त् मे़सिरो, फे़न्याःम्बक् के़जोःक्पाहाॽ के़रे़क् फुत्लुम् थ्यःङ् मे़से़ मे़बेःक्लो॥ 10 ताम्भुङ्ङो के़याक्पा कुम्बाबा साम्बित् कुइसिक् के़धुम्बा के़जोगाङ्ङाङ् वाॽआरो, हे़क्क्याङ् खे़ने़ॽ आबाङे के़मना पोङ्से़ आङ्गाॽ के़सेगाङ्ङाङ् वाॽरो॥ 11 आनिङ्मिहाॽ हारिमे़द्ये़बान् आङ्गाॽ निसुङ्ङाङ् वाॽरो, आङ्गाॽनु के़घेबा के़धक्पाहाॽ मे़नाःत्तु मे़देसुसि के़लॽबा खे़प्सुङ्ङाङ् वाॽरो॥ 12 साम्योबाहाॽ खे़बक्सिङ् हे़क्के चिनॽनॽ मे़लॽमे़धाङ्लो, हे़क्क्याङ् ले़बनाननोबा साम्माङ्सिङ् हे़क्के खे़ङ्हाॽ मे़बोमे़धाङ्लो॥ 13 खे़ङ्हाॽग यहवे दाङ्बे़ल्ले़ कुहिम्मो लेःप्मनाबा सिङ् कुइसिक् मे़जोक्लो, खे़ङ्हाॽ आनिॽ निङ्वाॽफुमाङ्ङिल्ले़ कुहिम्मो मे़बोमे़धाङ्लो॥ 14 खे़ङ्हाॽग खदाक्मि मे़दुम्साङ् काक् पाःन्नो मे़नुॽमे़दारो, हे़क्क्याङ् सदादिङ् चिनॽनॽ के़लॽबा मे़बोङ्ङाङ् कुजाॽ के़धोःक्पा मे़बोङ्लो॥ 15 खे़ङ्हाॽरे़ अक्खे मे़बाःत्तुरो, “निङ्वाॽफुमाङ्ङिन् के़नुॽबा चोक्लो, खुने़ॽग आङ्गाॽ आसे़न्लप्दाङ्बा याक्पेॽरो हे़क्क्याङ् खुने़ॽओ ताप्फे़ःम्बा पान् थेआङ् होप्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.