निङ्वाॽफु साम्लोसुम् 90 - लिम्बुकुलक् लिसि ( निङ् सुम् ९०–१०६ ) निङ्वाॽफुमाङ्ङिल्ले़ कुमना मोसारे़ कुबेलि 1 यहवे दाङ्बाए, खे़ने़ॽग थाःक्थाःक् थारिक् आनिगे वाॽमादे़न् के़बोक्खे़आङ् के़वाॽरो॥ 2 खे़ने़ॽग थे़गुहाॽ चोःक्मानुःल्ले़ तगि के़वाॽबा नुप्मे़न्दिङ् निङ्वाॽफुमाङ्ने़रो॥ हे़क्क्याङ् इक्सादिङ् खाम्बेःक्माल्ले़ नावागे़न् चइःत् ने़मानुःल्ले़ तगि सदादिङ् के़वाॽबा निङ्वाॽफुमाङ्ने़रो॥ 3 खे़ने़ॽ मनाहाॽ खाम्हिःक्को के़नुःक्तु के़देसुसिरो, हे़क्क्याङ् खे़ने़ॽ अक्खे के़मे़त्तुसिरो, “मे़न्छाम्सासे, खाम्मोए नुःक्खे़म् पेगे़म्मे़ॽओ॥” 4 थेआङ्भे़ल्ले़ खे़ने़ॽ के़लागि तङ्बे हे़न्छिङ् थिक्किन् के़बेःक्पा थिक्ये़न् हे़क्केरक्लो, इग्र से़न्दिक्पा कुमुक्थिक् कुइसिःक्लक्लो॥ 5 खे़ने़ॽग मे़न्छाम् याप्मिहाॽरे़ खुनिॽ हिङ्मन्निन् से़प्माङ् हे़क्के के़नुप्सु के़बिरुसिरो॥ खे़ङ्हाॽग ताःन्छोगे़न् तानाम् के़लिङ्बा याःन्सुङ् कुइसिःक्सिरो॥ 6 खे़ङ्हाॽग तानाम् चाङ्जाङ् मे़लॽमे़धाङ्लो, हे़क्केसाङ् युःन्छिक् मे़हेआङ् इमे़ले़म्लो॥ 7 आनिगे़ग के़सिक् पोःक्मारे़ मे़गिगे़रो, हे़क्क्याङ् साॽरिक् के़याक् ले़ॽमारे़ आनिगे पगि किसिगे़रो॥ 8 आनिगे लायोन्ग के़दगाङ् के़ने़स्सुरो, आनिगे स्वाःत्ताङ् चोःक्मनाबा फे़न्याःम्बक्हाॽ निगे़दे़प्पादे़न्नो ओसेःन्दाङ् के़जोगुरो॥ 9 खे़ने़ॽ के़सिक् पोःक्मारे़ आनिगे थिक्याःन्धक्पा ये़म्हाॽ पेःक्लो, याःप्मारे़ याःप्मारे़ आनिगे तङ्बे लावा पेःक्लो॥ 10 आनिॽग तङ्बे नुबोङ् थारिक् आहिङ्लो, के़धुम्बा आबोङ्ने़भग्र तङ्बे ये़प्पोङ् आगे़त्लो॥ हे़क्केसाङ् खे़ल्ले़ग हिङ्मन्नो तुक्खे नु लाक्खेरक् तारुरो, हे़क्क्याङ् थाःक् सॽआङ् आनिॽग आमासिङ् आबेःक्लो॥ 11 खे़ने़ॽ के़सिक् पोःक्माल्ले़ मुक्साम्मिन् आत्तिल्ले़ निसुआङ् वाॽबे? खे़ने़ॽ के़याक्ले़ॽमाल्ले़ आक्तङ्बा किमान् तारु के़लॽबान् आत्तिल्ले़ निङ्वाॽ खोसुआङ् वाॽबे? 12 आनिगे आक्खे़न्धिक् हिङिगे़बे खे़न् पाःन्निन् कुसिङ् निःप्मा आहुॽरे़ॽओ, हे़क्केलॽरिक् आनिगे सिक्कुम्दिङ् निङ्वाॽ के़गप्पा चाःप्पा पोःक्खिगे़ररो॥ 13 यहवे दाङ्बाए, आनिगे ले़प्माङ् नुःक्खे़ॽओ, के़सिक्किन् नःम्नःम्बा मे़त्ते़ॽओ, आनिगे के़से़वारोबाहाॽ लुङ्माॽ आदुक्ते़ॽओ॥ 14 तानाम्धक्मा चक्मे़ल्लॽए लुङ्माॽ आदुक्ते़ॽआङ् आनिगे निङ्वाॽ तासे़ॽओ, हे़क्केलॽरिक् साम्लोमा सुक्तिगे़आङ् आनिगे हिङ्हिङ् सःत्तिगे़ररो॥ 15 आनिगे़ग यरिक् तङ्बे थारिक् खे़ने़ॽ याप्मि तुक्खे के़जाःत्ते़रो, आल्ल हाबा खे़म्म्याक्के यरिक् आनिगे सःत्तिगे़र आयाःन्दे़ॽओ॥ 16 खे़ने़ॽ के़से़वारोबाहाॽरे़ के़मुक्साम्गे़न् याःम्बक्हाॽ निमा मे़घोसुररो, आनिगे मुॽइदाङ्साहाॽरे़ के़मिमिदिङ्ङिन् ओमे़प्मा मे़घोसुररो॥ 17 यहवे दाङ्बा आनिगे निङ्वाॽफुमाङ्ङे, आनिगे लुङ्माॽ आदुक्ते़ॽओ, आनिगे याःम्बक्को कुसाङ् के़लबा आजोगे़ॽओ, ओरो, आनिगे चोगुम्बे़ पाःत्तुम्बे़बा याःम्बक्हाॽ कुलिङ्दो के़त्ते़ आबिरे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.