निङ्वाॽफु साम्लोसुम् 9 - लिम्बुनिङ्वाॽफुमाङ्ङिल्ले़ कुदोःप्मा कुघासे़न् साम्लो के़हुॽबाल्ले़ लागि “सा सिमा” इक्लाओ दाउदरे़ कुसाम्लो 1 यहवे दाङ्बाए, काक् आसिक्लुङ्मो लाम्बाए खे़ने़ॽ ने़म्भोगे़न् के़नारा फोसुङ्लो, के़जोगुबा के़रे़क् निङ्वाॽ के़माबा पाःन्हाॽ पाःत्तुङ्लो॥ 2 खे़ने़ॽ के़जोगुल्ले़ आङ्गाॽ सःत्ताआङ् ओमु लॽआरो, के़रे़क्नुःल्ले़ पयम् यम्बा निङ्वाॽफुमाङ्ङे, आङ्गाॽ साम्लोआर के़नारा फोसुङ्लो॥ 3 खे़ने़ॽ के़धाःम्सिङ्ङिल्ले़ आनिङ्मिहाॽ खिरि मे़हिसिङ्लो हे़क्क्याङ् याङ्ना मे़घे़त्छिङ् मे़बेःक्लो, हे़क्क्याङ् खे़ङ्हाॽ मे़जोःन्नाङ् मे़सिरो॥ 4 थेआङ्भे़ल्ले़ खे़ने़ॽ आङ्गाॽ के़नाङाङ्लो हे़क्क्याङ् कुदोःप्मा खासे़न् के़लोःन्दाङ् के़बिराङ्लो॥ के़हाङ्युक्नाओलाम्बा एःक्पएःक् मे़न्जोःक्के आङ्गाॽ आलागि खासे़न् केलोःन्दुआङ् वाॽरो॥ 5 मे़न्छाम् सुवाङ्हाॽ खे़ने़ॽ के़भे़ःक्तुसिरो हे़क्क्याङ् फे़न् याःम्बक् के़जोःक्पाहाॽ खे़ने़ॽ मे़म्भै के़जोगुसिआङ् के़वाॽरो, खे़ङ्हाॽरे़ खुनिॽ मिङ्ङिन् सदादिङ्ले़ लागि खे़ने़ॽ के़मासुआङ् के़वाॽरो॥ 6 सदादिङ्ले़ लागि आनिॽ निङ्मिहाॽ मे़मे़गे़रो, हे़क्क्याङ् खे़ङ्हाॽरे़ खुनिॽ ये़क्यक्हाॽ लुःन्दे़रो, खे़ङ्हाॽग मना निङ्वाॽसुम् लाम्बाए मे़मए मे़बेरो॥ 7 यहवे दाङ्बान् सदादिङ् हाङ्चोक्लो, खासे़न् चोःक्मारे़ लागि कुहाङ्युक्नान् खुने़ॽ यारिप् चोगुआङ् वाॽरो॥ 8 हे़क्क्याङ् इक्सादिङ् खाम्बेःक्मान् खुने़ॽ साम्योबा खासे़न् चोगुरो, खुने़ॽग एःक्पएःक् मे़न्जोःक्से मे़न्छाम् याप्मिहाॽ कुदोःप्मा खासे़न् चोगुसिरो॥ 9 तुक्खे मे़जाःत्तुसिबाहाॽ यहवे दाङ्बे़ल्ले़ नाङुसिरो, खे़ङ्हाॽ तुक्खेओ मे़धाःल्ले़ से़ःप्तुसिरो॥ 10 आत्तिन्हाॽरे़ खे़ने़ॽ कुसिङ् के़म्निःत् खे़ङ्हाॽरे़ ताःक्पो के़म्जोःक्लो, थेआङ्भे़ल्ले़ यहवे दाङ्बे, खे़ने़ॽ के़गोःप्पाहाॽ के़न्ले़रुन्छिल्लो॥ 11 साम्लोरे़म्मे़ॽआङ् सियोनओ हाङ् के़जोःक्पा यहवे दाङ्बे़ल्ले़ कुनारा फोसे़म्मे़ॽओ॥ यहवे दाङ्बे़ल्ले़ चोगुबा कुयाःम्बक्हाॽ के़रे़क् मनाहाॽ चे़क्ते़म्सिम्मे़ॽओ॥ 12 निङ्वाॽफुमाङ्ङिल्ले़ तुक्खे लाक्खे के़दुम्बाहाॽ निङ्वाॽ इःत्तुसिरो, खे़ङ्हाॽरे़ पेलि मे़भाक्तुल्ले़ मे़ङ्घे़म्ना मे़ले़ङ्सिङ्ङिन्लो, हे़क्क्याङ् कुमना तुक्खे के़जाःप्पाहाॽ खुम्दिङ् पिरुसिरो॥ 13 यहवे दाङ्बाए, लुङ्माॽ तुक्ताङ्ङे़ॽओ! आनिङ्मिहाॽरे़ साॽरिक् तुक्खे मे़जाःत्ताबान् ओमे़त्ते़ॽओ, आङ्गाॽ सिमे़ल्ले़ तेॽमा चोःक्का से़ःप्ताङ्ङे़ॽओ॥ 14 आङ्गाॽ ताङ्से़ःप्ताङ्ङे़ॽओ, हे़क्केःल्ले़ यरुसले़ःम्बा ताःक्हन् तगि मनाहाॽरे़ मे़निसुर के़नारा फोमा सुक्तुङ्लो, हे़क्क्याङ् खे़ने़ॽ के़से़ःप्ताङ् फाॽआङ् सःप्मा सुक्कारो॥ 15 इक्सादिङ् खाम्बेःक्मोबा यरिक् मे़न्छाम् सुवाङ्हाॽ आबाङे मे़दयुबा लुम्बाःत्तो आबाङे मे़धारो, खे़ङ्हाॽरे़ मे़जिक्खुआङ् मे़दाःक्तुबा इओ आबाङे मे़धारो॥ 16 यहवे दाङ्बाङ्ग खुने़ॽ चोगुबा खासे़न्लाम्बाए कुसिङ् निःत्ते़त्लो, ताक्के़भे़ॽबाहाॽरे़ खुनिॽ मे़जोगुबा याःम्बक्को आबाङे मे़ध्ये़आङ् मे़वाॽरो॥ सेला 17 निङ्वाॽफुमाङ् मे़न्इःप्मना ताक्के़भे़ॽबा के़रे़क् इक्सादिङ् खाम्बेःक्मोबा मे़न्छाम् सुवाङ्हाॽ खे़मादिङ् यङ्सङ्ङो मे़बेःक्लो॥ 18 कर याङ्गे़साॽबाहाॽ सदादिङ् निङ्वाॽ मे़म्भेःन्ने़न्लो, तुक्खे के़जाबाहाॽरे़ सदादिङ्ग खुनिॽ निङ्साङ् मे़बुक्ने़ल्ले़॥ 19 यहवे दाङ्बाए, पोगे़ॽओ, मे़न्छाम् याप्मिहाॽरे़ कुनामे़न्छाॽ मे़प्मा के़मे़ङ्घोने़ल्लरो, मे़न्छाम् सुवाङ्हाॽ खासे़न् चोगे़से़ॽओ॥ 20 यहवे दाङ्बाए, खे़ङ्हाॽ किमाल्ले़ युम्सुङ्मा चोगे़से़ॽओ, आबाङेग इक्सादिङ् खाम्बेःक्मोबा मे़न्छाम् याप्मिसिगे़रक्लो फाॽआङ् खे़ङ्हाॽरे़ निङ्वाॽ मे़घोसुनिरो॥ सेला |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.