Biblia Todo Logo
Bib sou entènèt

- Piblisite -


निङ्‌वाॽफु साम्‍लोसुम् 89 - लिम्‍बु


निङ्‌वाॽफुमाङ्‌ङिल्‍ले़ दाउदे़न्‍नु चोगुबा माङ्‌हुप्
एज्रि एतानरे़ मस्‍किल कुसाम्‍लो

1 यहवे दाङ्‌बाए, मनाहाॽ खे़ने़ॽ लुङ्‌माॽ के़दुक्‍तुसिबा पाःन्‍निन् साम्‍लोलाम्‍बा सदादिङ् पाःत्तुङ्‌लो, खे़ने़ॽ नसाःन्‍साबा के़जोःक्‍पा पाःन्‍निन् के़रे़क् मे़न्‍छाम् थाःक्‍हाॽ मे़त्तुङ्‌सिङ्‌लो॥

2 खे़ने़ॽग मनाहाॽ चक्‍मे़ल्‍लॽए लुङ्‌माॽ के़दुक्‍तुसिबान् आङ्‌गाॽ पाःत्तुङ्‌लो, हे़क्‍क्‍याङ् नसाःन्‍साबा के़जोःक्‍पा पाःन्‍निन् साङ्‌ग्राम्‍पेदाङ् कुइसिक् सदादिङ् वाॽ फाॽआङ् आङ्‌गाॽ इङ्‌भोसुङ्‌लो॥

3 खे़ने़ॽ के़बाःत्तु, “आङ्‌गाॽ सेगुङ्‌बा मनाःन्‍नु माङ्‌हुप् चोगुङ्‌ङाङ् वाॽआरो, कङ्‌ग आङ्‌गाॽ आसे़वारोबा दाउद हाङ्‌ङिन्‍नु माङ्‌हे़क् चोगुङ्‌ङाङ् वाॽआरो—

4 ‘लत्‍छा के़मुइदाङ्‌साधिक्‍ले़ सदादिङ् आभे़ल्‍ले़साङ् हाङ्‌युक् चोगुरो॥ हे़क्‍क्‍याङ् आङ्‌गाॽ के़सायोबोराहाॽ सदादिङ् हाङ् चोगुङ्‌सिङ्‌लो॥’” सेला

5 यहवे दाङ्‌बाए, खे़ने़ॽ के़जोगुबा निङ्‌वाॽ के़माबा याःम्‍बक्‍हाॽ साङ्‌ग्राम्‍पेदाङ्‌ङो के़वाॽबाहाॽरे़ साम्‍मे़मे़त्तुरो, हे़क्‍क्‍याङ् खे़ने़ॽ नसाःन्‍साबा के़जोःक्‍पा पाःन्‍निल्‍ले़ कुयाःम्‍बेओ माङ्‌लाइङ्‌बाहाॽ साम्‍मे़लोरो॥

6 थेआङ्‌भे़ल्‍ले़ यहवे दाङ्‌बाए, साङ्‌ग्राम्‍पेदाङ्‌ङो खे़ने़ॽ हे़क्‍तङ्‌बा आत्तिन्‍नाङ्‌ होप्‍लो, हे़क्‍क्‍याङ् साङ्‌ग्राम्‍पेदाङ्‌ङो खे़ने़ॽनु कुदङ्‌बा हाःत्ताङ् होप्‍लो॥

7 माङ्‌लाइङ्‌बाहाॽरे़ खुनिॽ चुम्‍लुङ्‌ङो निङ्‌वाॽफुमाङ्‌ङिन् मिङ्‌सो इङ्‌धाङ् मे़बिरुरो॥ खे़ङ्‌हाॽओ खुने़ॽए पयम् यम्‍बा चोःक्‍काङ् के़रे़क्‍ले़ मे़गिरुरो॥

8 मुक्‍साम्‍दाङ्‌बा यहवे दाङ्‌बा निङ्‌वाॽफुमाङ्‌ङे, खे़ने़ॽ हे़क्‍तङ्‌बा मुक्‍साम्‍दाङ्‌बाग हाःत्ताङ् होप्‍लो, यहवे दाङ्‌बाए, खे़ने़ॽग काक् पाःन्‍नो नसाःन्‍साबा के़जोःक्‍लो॥

9 के़हुःक्‍पाङ् के़ने़बा वरःङ्‌सम्‍धाङ् खे़ने़ॽ हाङ्‌युक् के़जोःक्‍लो, खे़प्‍मो के़बोःक्‍पा वाभे़ल्‍ले़ङ्‌हाॽ खे़ने़ॽ चिजि ये़म्‌ये़म् के़जोगुरो॥

10 खे़ने़ॽग वरःङ्‌ङो के़याक्‍पा किप्‍मा के़घुबा राहाब मे़प्‍मनाबा आजाजाबान् के़यःप्‍सु के़से़रुरो, हे़क्‍क्‍याङ् के़निङ्‌मिहाॽ यम्‍बा के़मुक्‍साम्‍मिल्‍ले़ के़रे़क् पिसाङ् पुबेलाप्‍सा के़से़सु के़देसुसिरो॥

11 साग्राम्‍पेदाङ्‌ङिन् खे़ने़ॽइन्‍लो, हे़क्‍क्‍याङ् इक्‍सादिङ् खाम्‍बेःक्‍मान्‍नाङ् खे़ने़ॽइन्‍लो हे़क्‍क्‍याङ् खाम्‍बेःक्‍मान् खे़ने़ॽ के़जोगुबारो॥ खे़ब्‍याङ् खे़प्‍मो के़वाॽबाहाॽ के़रे़क् खे़ने़ॽए के़जोगुसिबारो॥

12 थाङ्‌गे़त् नु लाङ्‌गे़त् पिसाङ्‌बा लाजेॽहाॽ खे़ने़ॽए के़जोगुबारो, हे़क्‍क्‍याङ् तबोर नु हेर्मोन कोःक्‍माहाॽआङ् खे़ने़ॽ के़मिङ्‌ङो मे़सःत्‍ल साम्‍मे़लोरो॥

13 खे़ने़ॽग साॽरिक् मुक्‍साम्‍साबा के़जोःक्‍लो, हे़क्‍क्‍याङ् खे़ने़ॽ के़हुक्‍हाॽ मुक्‍साम्‍साबा चोःक्‍काङ् थाःङ्‌धाःङ् पोगे़आङ् पत्‍लो॥

14 साम्‌योबा नु कुदोःप्‍मा खासे़न् लोःम्‍मा याःम्‍बक्‍को के़हाङ्‌युक्‍नान् युङ्‌लो, हे़क्‍क्‍याङ् के़रे़क् के़याःम्‍बक्‍को थधप् मे़ल्‍लॽमनाबा मिःम्‍जि नु नसाःन्‍साबा के़जोःक्‍पा पाःन्‍निन् निदे़त्‍लो॥

15 खे़ने़ॽ के़नारा फोमा के़हुॽसिङ्‌बा मे़न्‍छाम् याप्‍मिहाॽग मुॽइसाबासिरो, यहवे दाङ्‌बाए, खे़ङ्‌हाॽग खे़ने़ॽ के़ओःत्तिओ लाङ्‌मे़घेःक्‍लो॥

16 खे़ङ्‌हाॽ ले़न्‍दिक् नाम्‍धाधा खे़ने़ॽ के़मिङ्‌ङो मे़सःत्‍लो, हे़क्‍क्‍याङ् साम्‌योबा के़याःम्‍बक्‍को खे़ङ्‌हाॽ खुनिॽ निङ्‌वाॽ ताआङ् मे़वाॽरो॥

17 थेआङ्‌भे़ल्‍ले़ खे़ने़ॽए खे़ङ्‌हाॽरे़ खुनिॽ मिमिदिङ् नु मुक्‍साम्‍ने़रो, हे़क्‍क्‍याङ् हाबा खे़ने़ॽ के़लुङ्‌गुम्‍मिल्‍ले़ आनिगे के़धुम्‍बा नु निङ्‌मि के़नाःम्‍बा याप्‍मि के़जोःक्‍लो॥

18 यहवे दाङ्‌बाए, से़क्‍खाए आनिगे याप्‍मि के़नाङ्‌बा के़धेःक्‍पा खो खे़ने़ॽरो, हे़क्‍क्‍याङ् इस्राइलबा आनिगे सेसे निङ्‌वाॽफुमाङ्‌ङिल्‍ले़ आनिगे हाङ्‌धिक् याप्‍मि के़बिरे़आङ् वाॽरो॥


निङ्‌वाॽफुमाङ्‌ङिल्‍ले़ दाउदे़न्‍नु माङ्‌हुप् चोगु

19 यरिक् ये़म् तगि नसाःन्‍साबा के़से़वारोबाहाॽ सुफोधिक् के़बिरुसिआङ् अक्‍खे के़मे़त्तुसिरो, “आङ्‌गाॽ लत्‍छा कुमिङ् के़दिःप्‍पा थक्‍सुबाधिक् फाॽरुङ्‌ङाङ् वाॽरो, आङ्‌गाॽ मनालुम्‍मोनु सेगुङ्‌बा लत्‍छा मनाधिक् हाङ्‌युक्‍नान् पिरुङ्‌ङाङ् वाॽरो॥

20 आसे़वारोबा दाउदे़न् खोसुङ्‌ङाङ् वाॽरो, सुत्‍थो आनिःङ्‌गेःल्‍ले़ हुःत्तुङ्‌ङाङ् आङ्‌गाॽ हाङ् चोगुङ्‌ङाङ् वाॽरो॥

21 आङ्‌गाॽ आभे़ल्‍ले़साङ् खुने़ॽ मुक्‍साम् पिरुङ्‌ङाङ् फाॽरुङ्‌लो, आमुक्‍साम्‍मिल्‍ले़ खे़न् के़धुम्‍बा चोगुङ्‌लो॥

22 कुनिङ्‌मिहाॽरे़ खे़न् आप्‍फाल्‍ले़आङ् मे़न्‍नाःन्‍दुल्‍लो, कुॽइगे़भे़म्‍बाहाॽरे़ खे़न्‍निन् आप्‍फाल्‍ले़आङ् खुने़ॽ हारि मे़न्‍जाःत्तुल्‍लो॥

23 खे़ल्‍ले़ कुनिङ्‌मिहाॽ आङ्‌गाॽ हिप्‍तुङ्‌सिङ्‌लो, हे़क्‍क्‍याङ् खुने़ॽ के़जिःप्‍पाहाॽ के़रे़क् से़रुङ्‌सिङ्‌लो॥

24 आङ्‌गाॽ खे़न् लुङ्‌माॽ तुक्‍तुङ्‌लो, हे़क्‍क्‍याङ् खे़न्‍नु नसाःन्‍साबा पोङ्‌ङाआङ् वाॽआरो, आङ्‌गाॽ खे़न् सदादिङ् थङ् के़नाःम्‍बा चोगुङ्‌लो॥

25 खे़ल्‍ले़ कुहाङ्‌जुम्‍मिन् लुम्‍बा वरःङ् थारिक् फोसुङ्‌लो, हे़क्‍क्‍याङ् खे़न् युफ्रेतिस यङ्‌घङ् थे़म्‍बा के़त्‍लो॥

26 खे़ल्‍ले़ आङ्‌गाॽ अक्‍खे मे़त्तारो, ‘खे़ने़ॽ पानुदिङ् आम्‍बा नु आनिङ्‌वाॽफुमाङ्‌ने़रो, हे़क्‍क्‍याङ् याप्‍मि के़से़ःप्‍पा याक्‍पेॽ नु आङ्‌गाॽ आसे़न्‍लप्‍दाङ्‌बाने़रो॥’

27 आङ्‌गाॽ खे़न् आस्‍सा तुम्‍बा चोगुङ्‌लो, हे़क्‍क्‍याङ् इक्‍सादिङ् खाम्‍बेःक्‍कोबा के़रे़क् हाङ्‌हाॽनुःल्‍ले़ यम्‍बा चोगुङ्‌लो॥

28 खे़न् आभे़ल्‍ले़साङ् लुङ्‌माॽ तुक्‍तुङ्‌लो, हे़क्‍क्‍याङ् खे़न्‍नु चोगुङ्‌बा माङ्‌हुप्‍पिन् आङ्‌गाॽ सदादिङ् कुलिङ्‌दो के़त्तुङ्लो॥

29 खे़ल्‍ले़ कुस्‍सा कुएहाॽ आङ्‌गाॽ ताङ्‌साक्‍पान् पप्‍पा हे़क्‍के सदादिङ् मे़वाॽर चोगुङ्‌सिङ्‌लो, खे़ल्‍ले़ कुस्‍सा कुम्‍मे़न्‍छाॽहाॽओ थिक्‍किधिक्‍क आभे़ल्‍ले़साङ् हाङ् पोङ्‌लो॥

30 “कर खे़ल्‍ले़ कुस्‍सा कुम्‍मे़न्‍छाॽहाॽरे़ आसाम्‌यो थिम्‍हाॽ मे़न्‍इःत्तुन् मे़न्‍नाःत्तुन्‍ने़भग्र, हे़क्‍क्‍याङ् मे़त्तुङ्‌सिङ्‌बा कुइसिक् मे़न्‌वाॽने़न्‍भग्र,

31 खे़ङ्‌हाॽरे़ आनिसाम्‍मिन् निङ्‌वाॽ मे़म्‍बिरुन्‍भग्र, हे़क्‍क्‍याङ् आइङ्‌जाङ्‌हाॽ मे़न्‍इःत्तुन् मे़न्‍नाःत्तुन्‍ने़भग्र,

32 खे़ङ्‌हाॽरे़ खुन्‍छिॽ लायोल्‍ले़ चोगुल्‍ले़ आङ्‌गाॽ खे़ङ्‌हाॽ खुम्‍सुङ्‌सिङ्‌लो॥ खे़ङ्‌हाॽरे़ मे़जोगुबा ताप्‍फे़ःम्‍बा याःम्‍बक्‍किल्‍ले़ कुले़क्‌वा खे़ङ्‌हाॽ तुक्‍खे चाःत्तुङ्‌सिङ्‌लो॥

33 कर दाउदे़न् लुङ्‌माॽ तुक्‍मा मे़ले़त्तान्‍लो, हे़क्‍क्‍याङ् खे़न्‍नु चोगुङ्‌बा नसाःन्‍बा माङ्‌हुप्‍पिन् आङ्‌गाॽ के़त्तुङ्‌लो॥

34 चोगुङ्‌बा माङ्‌हुप्‍पिन् से़क्‍खा के़त्तुङ्‌ङेरो, हे़क्‍क्‍याङ् खे़न्‍नु चोगुङ्‌बा माङ्‌हुप्‍पिन् लत्‍छाआङ् याङ्‌ना मे़नुःक्‍काल्‍लो॥

35 आङ्‌गाॽ आबाङे सेसे आमिङ्‌ङो सदादिङ्‌ले़ लागि माङ्‌हुप् चोगुङ्‌ङाङ् वाॽरो, आप्‍फाल्‍ले़आङ् दाउदे़न्‍नु इङ्‌ले़क् मे़बाःत्ताल्‍लो॥

36 खे़ल्‍ले़ कुधाःक्‍हाॽ सदादिङ्‌ले़ लागि मे़वाॽरो, हे़क्‍क्‍याङ् नाम्‍मिन् ओःत्ताङ् पत्‍ल थारिक् खे़ल्‍ले़ कुहाङ्‌जुम्‍मिन् से़ःप्‍तुङ् ओमे़त्तुङ्‌लो॥

37 नसाःन्‍साबा साःक्‍खि कुइसिक् ताङ्‌साक्‍पो लाबे़न् आभे़ल्‍ले़साङ् पत्‍लो, हाबाहे़क्‍के लॽरिक् खे़न् हाङ्‌जुम्‍मिन् आभे़ल्‍ले़साङ् सदादिङ् वाॽरो॥” सेला


हाङ्‌ङिन् हारिदाबाल्‍ले़ हाःप्

38 कर खे़ने़ॽ आबाङे के़सेगुबा हाङ्‌ङिन्‍नु खे़ने़ॽ के़सिक् पोगे़आङ् वाॽरो, हे़क्‍क्‍याङ् खे़ने़ॽ खे़न् के़ले़रु के़देसुरो, हे़क्‍क्‍याङ् के़नाॽरुआङ् वाॽरो॥

39 खे़ने़ॽ आबाङे के़से़वारोबे़न्‍नु के़जोगुबा माङ्‌हुप्‍पिन् मे़ङ्‌गे़प्‍मनाबा के़जोगुआङ् वाॽरो, हे़क्‍क्‍याङ् खुने़ॽ कुदिचःन् ले़ःङ्‌वाओ लाप्‍के़भुसुआङ् वाॽरो॥

40 खुने़ॽ कुये़क्‌यक्‍कोबा लुङ्‌धाक्‍हाॽ खे़ने़ॽ के़लुःन्‍दु के़बिरुआङ् ने़रो, हे़क्‍क्‍याङ् खुने़ॽ कुहाङ्‌यक् हिम्‍हाॽ खाप्‍पुथ्‍यःङ् के़जोगु के़बिरुआङ् ने़रो॥

41 खे़ॽयोलाम् लाङ्‌गे़घेःक्‍पा के़रे़क्‍ले़ खुने़ॽ कुसामा कुबुमाहाॽ मे़घुःत्तुरो, खुने़ॽ कुहिम्‍बेसाङ्‌बा के़रे़क्‍ले़ खुने़ॽ ओमे़मे़त्तुआङ् मे़एःत्‍लो॥

42 खे़ने़ॽ कुनिङ्‌मिहाॽरे़ खुने़ॽ मे़नाःन्‍दुर के़जोगुआङ् वाॽरो, हे़क्‍क्‍याङ् खे़ङ्‌हाॽ मे़सःत्‍ल के़याःन्‍दुसिआङ् वाॽरो॥

43 खे़ने़ॽग खुने़ॽ कुदाभेहाॽ कुसुम्‍मे़न्‍दम्‍मना के़जोगु के़बिरुआङ् वाॽरो, हे़क्‍क्‍याङ् थङ्‌ङो हारिगे़दाबा के़जोगुआङ् वाॽरो॥

44 खे़ने़ॽ कुहाङ् तक्‍काःत्तिन् के़नाप्‍तुआङ् वाॽरो, हे़क्‍क्‍याङ् खुने़ॽ कुहाङ्‌युक्‍नान् खाम्‍बाङ्‌ङो लाप्‍के़भुसुआङ् ने़रो॥

45 खे़ने़ॽग खुने़ॽ थाङ्‌बे़न् वये़रए काप्‍पोबा कुइसिक् के़जोगुआङ् वाॽरो, खुने़ॽ कुजाःत्‍थि के़देसु के़बिरुआङ् वाॽरो॥ सेला


से़ःप्‍सिङ्‌मारे़ लागि पेलिगे़न् तुवा

46 यहवे दाङ्‌बाए, सदादिङ्‌ले़ लागि खे़ने़ॽ आबाङे के़जिङ्‌सिङ्‌बाबि? आभे़ल्‍ले़ थारिक् खे़ने़ॽ के़सिक्‍किन् मि कुइसिक् तिःप्‍पाबे?

47 आङ्‌गाॽ आहिङ्‌मन्‍निन् साॽरिक् ताङ् फाॽआङ् निङ्‌वाॽ इःत्ते़ॽओ, खे़ने़ॽग के़सिबा के़बेःक्‍पा आनिगे याप्‍मि के़जोगे़आङ् वाॽरो॥

48 आभे़ल्‍ले़आङ् मे़न्‍छिए हात् हिङ्‌ङाङ् वाॽबे? मनान् आभेलॽरिक् खे़मा यङ्‌सङ्‌ङोलाम् याम्‍मो हिङ्‌मा सुक्‍पे? सेला

49 यहवे दाङ्‌बाए, तगि लुङ्‌माॽ के़दुक्‍ताङ्‌बा हे़क्‍के आल्‍लो थेआङ् लुङ्‌माॽ के़न्‍दुक्‍कान्‍बाबे? खे़ने़ॽ दाउदे़न्‍नु के़जोगुबा नसाःन्‍बा माङ्‌हुप्‍पिन् आत्तान् पेबे?

50 यहवे दाङ्‌बाए, निङ्‌वाॽ इःत्ते़ॽओ, आङ्‌गाॽ के़से़वारोबान् कुनामे़न्‍छाॽ पोःक्‍खाङ्‌ङाङ् वाॽआरो, इक्‍सादिङ् खाम्‍बेःक्‍मोबा के़रे़क् मे़न्‍छाम् सुवाङ्‌हाॽरे़ खुन्‍छिॽ आप्‍तिक्‍हाॽ आक्‍खेलॽरिक् थरुङ्‌ङाङ् वाॽआ कन् पाःन्‍निन् निङ्‌वाॽ मे़भेःत्‍छे़न्‍ने़ॽओ॥

51 यहवे दाङ्‌बाए, खे़ने़ॽ के़निङ्‌मिहाॽरे़ खे़ने़ॽ के़सेगुबा हाङ्‌ङिल्‍ले़ कुजाःत्‍थि मे़देसुरो॥ खे़न् आत्तान् पेःक्‍साङ्, खे़ङ्‌हाॽरे़ खुने़ॽ कुनामे़न्‍छाॽ मे़मे़त्तुरो॥

52 यहवे दाङ्‌बे़ल्‍ले़ कुनारा सदादिङ् आभे़ल्‍ले़साङ् फोसे़म्‍मे़ॽओ॥ आमिन्! आमिन्!

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite