निङ्वाॽफु साम्लोसुम् 88 - लिम्बुकुभाॽरे़ लागि पेलि फाक्मा साम्लो के़हुॽबाल्ले़ लागि कोरहरे़ कुस्साहाॽरे़ खुनिॽ साम्लो॥ माहालाथ लिन्नोथ कुइसिक् एज्रि एतानबा हेमानरे़ मस्किल कुसाम्लो 1 यहवे दाङ्बा निङ्वाॽफुमाङ्ङे, खे़ने़ॽए आङ्गाॽ आसे़न्लप्दाङ्बाने़रो, खे़ल्ले़चोगुल्ले़ आङ्गाॽ से़न्दिक् ले़न्दिक् खे़ने़ॽ पेलि फाक्ने़रो॥ 2 चोगुङ्बा आबेलिगे़न् तुवान् खे़प्से़ॽओ, हाःप्पार आङ्गाॽ फाॽराङ्ङे़ॽओ मे़त्ने़बा पाःन्नो निङ्वाॽ पिरे़ॽओ॥ 3 आङ्गाॽग यरिक् इनोगे़न् तुक्खेओ थ्याङ्ङाङ् वाॽआरो, हे़क्क्याङ् आङ्गाॽ खे़मायङ्सङ् निःत्ताङ् के़राङ्ङाङ् वाॽआरो॥ 4 सिमा के़इःप्पा मनाहाॽ कुइसिक् आङ्गाॽआङ् मे़इःत्ताङ्ङाङ् वाॽरो, हे़क्क्याङ् मे़न्धुम्मना नायोबा हे़क्के आङ्गाॽ पोःक्खाङ्ङाङ् वाॽआरो॥ 5 आङ्गाॽग कुसिवे़त्हाॽरे़ खुनिॽ लुम्मो लाप्मे़भुसाङ्ङाङ् वाॽआरो, मे़से़रुआङ् इपुङ्ङो मे़ने़स्सुबा कुसिवे़त् कुइसिक् पोःक्खाङ्ङाङ् वाॽआरो॥ आङ्गाॽग खक्पे़त् निङ्वाॽ के़भेःत्छाङ्ङाङ् खे़ने़ॽलाम्बा कुभाॽ मे़घोआल्लो॥ 6 आङ्गाॽग खे़मादिङ् यङ्सङ्ङो के़बाङ्साङ्लो, मुहिःक्सो खाहिःक्सो खामाक् लुम्बाःत्तो आङ्गाॽ लाप्के़भुसाङ्लो॥ 7 के़सिक् पोःक्माल्ले़ युक्ताङ्ङाङ् वाॽआरो, हे़क्क्याङ् के़याःक्ले़ॽमाल्ले़ आङ्गाॽ युःत्ताङ्ङाङ् वाॽआरो॥ सेला 8 आङ्गाॽग निःत्ताङ्बा आन्देङ् आन्जुम्हाॽलाम्बा के़से़न्दाङ्ङाङ् वाॽआरो, खे़ङ्हाॽरे़ मे़जिःत्तार के़जोगुआङ् वाॽरो॥ आङ्गाॽग खे़त्छिङ्मा मे़न्छुक्के इजोओ थ्याङ्ङाङ् याक्कारो॥ 9 इनोगे़न् तुक्खेःल्ले़ आङ्गाॽ आमिक्किन् खादाप्तुआङ् नुरिक् खानिमा मे़सुक्काल्लो, हे़क्क्याङ् यहवे दाङ्बाए, थिक्याःन्धक् आहुक्किन् खे़ने़ॽ ले़प्माङ् सन्छुङ्ल पेलि फाक्ने़रो॥ 10 खे़ने़ॽग के़सिबाहाॽरे़ लागि निङ्वाॽ के़माबा याःम्बक्हाॽ के़जोगुबि? हे़क्क्याङ् के़सिबाहाॽ मे़बोःक्काङ् खे़ने़ॽ के़नारा मे़भोसुबिॽ? सेला 11 इपुङ्ङो के़वाॽबाहाॽरे़ खे़ने़ॽ मिःम्जिसाबा के़जोःक्पान् पाःप्मा मे़सुक्तुबि? हे़क्क्याङ् मे़क्मा सिमादे़न्नो के़वाॽबाहाॽरे़ खे़ने़ॽ नसाःन्साबा के़जोक् के़लॽबा उवा मे़जोगुबि? 12 निङ्वाॽ के़माबा के़याःम्बक्हाॽ खामाक्दे़न्नो ओसेःन्दाङ् मे़बोङ्ने़ल्लो, खे़ने़ॽ साम्योबा के़याःम्बक्हाॽ निङ्वाॽ के़भेःम्बा लाजेॽओ निमे़धाःप्ने़ल्लो॥ 13 कर यहवे दाङ्बाए, आङ्गाॽग फाॽराङ्ङे़ॽ फाॽआङ् खे़ने़ॽ उःत्ने़रो, हे़क्क्याङ् तिबेलाबे तानाम् थप्मे पेलि फाक्ने़रो॥ 14 यहवे दाङ्बाए, थेआङ् के़नाॽआबाबे? आङ्गाॽ के़निआल्ले़ थेआङ् चिॽलिगे़न् के़नारान् के़जिक्खुबे? 15 थाङ्बे़न् के़राङ्ङाङ्धोए आङ्गाॽ इनोगे़न् तुक्खेओ थ्याङ्ङाङ् वाॽआरो, हे़क्क्याङ् सिमालिङ्धो के़राङ्ङाङ् वाॽआरो॥ खे़ब्याङ् खे़ने़ॽ पगित् कित्ने़आङ् आङ्गाॽ नासाङ्ङाङ् वाॽआरो॥ 16 खे़ने़ॽ के़याःक्ले़ॽमान् आङ्गाॽ आसम्दाङ् चुक्ते़आङ् वाॽरो, हे़क्क्याङ् किप्मा के़घुबा के़सिक् पोःक्माल्ले़ आङ्गाॽ मे़क्खाङ्ङाङ् वाॽआरो॥ 17 खे़न् के़सिक् पोःक्माल्ले़ ले़न्दिक् नाम्धाधा वदप्मा च्वाःत्तिल्ले़ कुइसिक् कबाङ्ङाङ् वाॽरो॥ हे़क्क्याङ् के़रे़क् पिसाङ्लाम्बा खे़ल्ले़ आङ्गाॽ पन्छाङ्ङाङ् वाॽआरो॥ 18 आङ्गाॽग निःत्ताङ्बा आन्देङ् आन्जुम्हाॽ नु आसिराॽगे़धाङ्बाहाॽलाम् के़से़न्दाङ्ङाङ् वाॽआरो॥ हे़क्क्याङ् वदप्मा आन्जुम्मिन्ग खामाक्मान्लक् पोःक्खे़आङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.