निङ्वाॽफु साम्लोसुम् 86 - लिम्बुकुभाॽ खोमा पेलि दाउदरे़ कुबेलि 1 यहवे दाङ्बाए, चोगुङ्बा पेलिगे़न् तुवान् खे़प्से़ॽओ हे़क्क्याङ् आङ्गाॽ नुगप् पिराङ्ङे़ॽओ, थेआङ्भे़ल्ले़ के़साक्पो थ्याङ्ङाङ् याक्कारो हे़क्क्याङ् आङ्गाॽ थेआङ् मे़गत्ताल्लो॥ 2 आङ्गाॽ सिमालाम् थेःक्ताङ्ङे़ॽओ, थेआङ्भे़ल्ले़ आङ्गाॽग के़से़वा के़जोःक्पाआरो॥ खे़ने़ॽग आङ्गाॽ आनिङ्वाॽफुमाङ्ने़रो, आङ्गाॽ खे़ने़ॽ के़से़वारोबाआरो, हे़क्क्याङ् खे़ने़ॽए के़से़ःप्पा फाॽआङ् आङ्गाॽ नसान् चोगुङ्लो॥ 3 यहवे दाङ्बाए, लुङ्माॽ तुक्ताङ्ङे़ॽओ, थेआङ्भे़ल्ले़ ले़न्दिक् नाम्धाधा पेलि फाक्ने़रो॥ 4 के़से़वारोबान् कुनिङ्वाॽ तार चोगे़ॽओ, थेआङ्भे़ल्ले़ यहवे दाङ्बाए, आबेलिगे़न् तुवान् खे़ने़ॽओ थाःङ् थाङ्सुङ्लो॥ 5 यहवे दाङ्बाए, खे़ने़ॽ के़नुॽबा नु याप्मि ले़प्मि के़बिबा के़जोःक्लो, हे़क्क्याङ् खे़ने़ॽओ पेलिगे़न् तुवा के़जोःक्पाहाॽ साॽरिक् लुङ्माॽ के़दुक्तुसिरो॥ 6 यहवे दाङ्बाए, आबेलिन् खे़प्से़ॽओ, हे़क्क्याङ् लुङ्माॽ तुक्ताङ्ङे़ॽ फाॽआङ् चोगुङ्बा तुवाओ निङ्वाॽ पिरे़ॽओ॥ 7 इनोगे़न् तुक्खेओ थाआल्ले़ खे़ने़ॽ उःत्ने़रो, थेआङ्भे़ल्ले़ खे़ने़ॽ नुगप् के़बिआरो॥ 8 यहवे दाङ्बाए, खे़ने़ॽ हे़क्तङ्बाग आत्तिन्नाङ् माङ् होप्लो, खे़ने़ॽ के़जोगुबा याःम्बक् हे़क्तङ्बा आत्तिल्ले़आङ् चोःक्मा मे़न्छुक्के वाॽरो॥ 9 यहवे दाङ्बाए, खे़ने़ॽ के़जोगुसिबा इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ के़दगि मे़दाआङ् से़वा के़म्मे़त्लो, हे़क्क्याङ् खे़ङ्हाॽरे़ के़मिङ् के़नारा मे़भोसुरो॥ 10 थेआङ्भे़ल्ले़ खे़ने़ॽग पयम् यम्बा मुक्साम्साबा के़जोःक्लो, हे़क्क्याङ् निङ्वाॽ के़माबा याःम्बक्हाॽ के़जोगुरो॥ खे़ने़ॽए निङ्वाॽफुमाङ्ने़रो॥ 11 यहवे दाङ्बाए, आङ्गाॽ के़लाम्मो लाङ्घेःक्मा निसाम् हुॽराङे़ॽओ, हे़क्केलॽरिक् से़क्खान् इःत्तुङ् नाःत्तुङ्लो॥ आङ्गाॽ खे़ने़ॽओ से़वा चोःक्मा निङ्वाॽ पिराङ्ङे़ॽओ, हे़क्क्याङ् के़मिङ्सो के़धाःङ्सो चोगुङ्लो॥ 12 यहवे दाङ्बा आनिङ्वाॽफुमाङ्ङे, काक् आनिङ्वाॽरे़ के़नारा फोसुङ्लो, हे़क्क्याङ् सदादिङ् के़मिङ्सो के़धाःङ्सो चोगुङ्लो॥ 13 थेआङ्भे़ल्ले़ आङ्गाॽ चक्मे़ल्लॽए लुङ्माॽ के़दुक्ताङ्ङाङ् वाॽरो, आयाम्साम्मिन् खे़मा यङ्सङ्लाम्बा के़से़ःप्तुआङ् वाॽरो॥ 14 निङ्वाॽफुमाङ्ङे, आङ्दिङ् के़लॽबा मनाहाॽरे़ आङ्गाॽ हिप्मा फाॽआङ् मे़भत्तार मे़वारो, हे़क्क्याङ् खे़ने़ॽ के़बान् मे़ङ्घे़म्नाबा कुनिङ्वाॽ के़जिःप्पा मनाहाॽरे़ आङ्गाॽ से़प्मा फाॽआङ् मे़नाःत्तारो॥ 15 कर यहवे दाङ्बाए, खे़ने़ॽग लुङ्माॽ आदुक्तुक्पा नु लुङ्गुम्साबा निङ्वाॽफुमाङ्ने़रो, हने़ कुसिक् मे़म्बोःक्मनाबा, थधप् मे़ल्लॽमनाबा मिःम् के़मे़प्पा नु नसाःन्साबा के़जोःक्लो॥ 16 आङ्गाॽ ले़प्माङ् हिसिङ्ङे़ॽओ, हे़क्क्याङ् लुङ्माॽ तुक्ताङ्ङे़ॽओ, के़से़वारोमाल्ले़ कुस्सा आङ्गाॽ के़से़वारोबान् मुक्साम् पिराङ्ङे़ॽआङ् से़ःप्ताङ्ङे़ॽओ॥ 17 यहवे दाङ्बाए, खे़ने़ॽग के़नुॽबा के़जोःक्लो, खे़न् आङ्गाॽ ओसेःन्धाक्ताङ्ङे़ॽओ, हे़क्केलॽरिक् आङ्गाॽ के़भाॽआबा नु हाङ्हाङ् के़मे़त्ताबा पाःन्निन् आङ्गाॽ याप्मि के़जिःप्पाहाॽरे़ मे़निसुआङ् खे़ङ्हाॽ सिरिङ्ममो मे़धारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.