निङ्वाॽफु साम्लोसुम् 83 - लिम्बुनिङ्मिहाॽ हारि चाःप्मासि पेलि आसाफरे़ कुसाम्लो 1 निङ्वाॽफुमाङ्ङे, मे़म्बाःत्ते स्वाःत् मे़वये़न्ने़ॽओ, खे़ने़ॽ मे़म्बाःत्ते आम्भा मे़युङे़न्ने़ॽओ, खे़ने़ॽ थेआङ् मे़न्जोःक्के मे़म्बाःत्ते मे़वये़न्ने़ॽओ, निङ्वाॽफुमाङ्ङे! 2 ओमे़त्ते़ॽओ, खे़ने़ॽ के़निङ्मिहाॽ मे़हे़न्छिङ्ङाङ् नाजाङ्जाङ् मे़वाॽरो, हे़क्क्याङ् खे़ङ्हाॽरे़ खुनिॽ थे़गेक्पान् चाङ्जाङ् मे़भोक्खुआङ् मे़वाॽरो॥ 3 खे़ङ्हाॽरे़ फे़न्निङ्वाॽ मे़इःत्तुआङ् के़मनाहाॽ चे़न्नो थामासि पाःन्मे़दङ्घुरो, हे़क्क्याङ् खे़ङ्हाॽरे़ खे़ने़ॽ मिङ्सोइङ्धाःङ् के़बिरुसिबाहाॽ इजोओ थामासि इङ्मे़दङ्घुरो॥ 4 खे़ङ्हाॽरे़ मे़बाःत्तु, “फे़रे़म्मे़ॽओ, आनिॽ खे़ङ्हाॽरे़ खुनिॽ इस्राइल सुवाङ्ङिन् मे़क्खुम्लो, हे़क्केलॽरिक् इस्राइल मे़प्मनाबा मिङ्ङिन् सदादिङ्ले़ लागि निङ्वाॽ फेःन्लरो॥” 5 खे़ङ्हाॽ थिक्हुप् मे़बोङ्ङाङ् चे़म्भन् मे़जोक्लो, हे़क्क्याङ् खे़ने़ॽ के़दक्ले़ङ्वाओ खे़ङ्हाॽ मे़धुक्सिङ्ङाङ् मे़बोक्लो॥ 6 ए़दोम के़युङ्बा मनाहाॽ नु इस्माइलिहाॽ, मोआब के़युङ्बा मनाहाॽ नु हग्रिहाॽ, 7 गबालिहाॽ, आम्मोनिहाॽ, अमाले़किहाॽ, पलिस्तिहाॽ हे़क्क्याङ् तुरोसबा मनाहाॽ थिक्हुप् मे़बोःक्खे़आङ् मे़वाॽरो॥ 8 अस्सुर लाजेःन्नाङ् खे़ङ्हाॽनु तङ्सिङ्ङाङ् वाॽरो, लुतरे़ कुमुॽइदाङ्साहाॽ खे़ल्ले़ फाॽरुसिरो॥ सेला 9 मिध्यानिहाॽ ताप्फे़ःल्लिक् के़मे़त्तुसिबा कुइसिक् खे़ङ्हाॽआङ् मे़त्ते़से़ॽओ, हे़क्क्याङ् सिसरा नु याबिन्ने़न् किसोन यङ्घङ्ङो के़मे़त्तुसिबा हे़क्केए चोगे़से़ॽओ॥ 10 एन्दोर मे़प्मनाबा ते़न्नो खे़ङ्हाॽ के़मे़क्खुसिरो, हे़क्क्याङ् खे़ङ्हाॽरे़ खुनिॽ थक्हाॽ खाम्मो किरे़आङ् ने़स्से़रो॥ 11 ओरेब नु जएबे़न् के़मे़त्तुसिबा कुइसिक् खे़ङ्हाॽरे़ खुनिॽ लाम्लोबाहाॽआङ् हाबा हे़क्केए मे़त्ते़से़ॽओ॥ जे़बहःन् नु सल्मुने़न् कुइसिक् खे़ङ्हाॽरे़ खुनिॽ के़रे़क् युक्साबाहाॽ हारि चाःत्ते़से़ॽओ॥ 12 खे़ङ्हाॽरे़ अक्खे मे़बाःत्तुरो, “निङ्वाॽफुमाङ्ङिल्ले़ कुलाजेन् आनिॽइन् चोगुम्लो॥” 13 आनिङ्वाॽफुमाङ्ङे, खे़ङ्हाॽ लाप्फुमनाबा यान् कुइसिक् चोगे़से़ॽओ हे़क्क्याङ् साम्मिःत्तिल्ले़ फे़सु तेॽरुबा याॽसिप् हे़क्के से़से़देसे़से़ॽओ॥ 14 मिःल्ले़ ताम्भुङ् याक्ला थ्यःङ् पोङ्बा हे़क्के हे़क्क्याङ् थे़गु फाःत्त्राःल्ले़ मिदिक्पा कुइसिःक्के 15 खइक् खइक् के़इक्सिङ्बा सुरित् केजङ्ङिल्ले़ खे़ङ्हाॽ नाःत्ते़से़ॽ॥ हे़क्क्याङ् किप्मा के़घुबा के़साम्मित् केजङ्ङिल्ले़ खे़ङ्हाॽ पगि मे़गिर याःन्दे़से़ॽओ॥ 16 सिरिङ्ममाल्ले़ खे़ङ्हाॽरे़ खुनिॽ नारान् सिरेःप् सिरेःप् लॽर चोगे़ पिरे़से़ॽओ॥ हे़क्क्याङ् यहवे दाङ्बाए हे़क्केलॽरिक् मनाहाॽरे़ खे़ने़ॽ के़म्गोःत्लरो॥ 17 खे़ङ्हाॽ सदादिङ् सिरिङ्ममो मे़धाआङ् पगि मे़गिररो, खे़ङ्हाॽ खुनिॽ चाःत्थि पेःक्काङ् मे़सिररो॥ 18 खे़ङ्हाॽरे़ खे़ने़ॽ यहवे दाङ्बाने़ फाॽआङ् कुसिङ् के़म्निःत्लरो, इक्सादिङ् खाम्बेःक्मो खे़ने़ॽरक् के़रे़क्नुःल्ले़ पयम् यम्बा निङ्वाॽफुमाङ्ने़ के़लॽबान् निङ्वाॽ मे़घोसुररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.