निङ्वाॽफु साम्लोसुम् 82 - लिम्बुनिङ्वाॽफुमाङ्ङिन् पयम् हाङ् आसाफरे़ कुसाम्लो 1 निङ्वाॽफुमाङ्ङिन् यम्बा ये़जुम्भोओ युङ्लो, माङ्साम्माङ्हाॽ खासे़न् लोःन्दुसिरो॥ 2 निङ्वाॽफुमाङ्ङिल्ले़ पाःत्तुरो, “खिनिॽ आभे़ल्ले़ थारिक् मना तुक्खे के़जाःप्पाहाॽ के़नाङुम्सिम्बाबे? हे़क्क्याङ् कुइगे़भे़म्बाहाॽ ले़प्माङ् के़बत्छिबाबे? सेला 3 याङ्गे़साॽबाहाॽ नु ये़त्छाबाहाॽ नाङाम्सिम्मे़ॽओ, हे़क्क्याङ् तुक्खे मे़जाःत्तुसिबाहाॽ नु कुधेआङ् के़होप्पाहाॽ खासे़न् लोःन्दे़म् पिरे़म्सिम्मे़ॽओ॥ 4 मे़न्धुम्मनाबा नु योःन्जोजोॽबाहाॽ से़ःप्ते़म्सिम्मे़ॽओ, ताक्के़भे़ॽबाहाॽरे़ खुनिॽ हुक्कोनु खे़ङ्हाॽ से़न्दे़म् लःत्ते़म्सिम्मे़ॽओ॥ 5 “खे़ङ्हाॽरे़ ने़हिनिङ्वाॽ मे़ङ्गत्तुन्, खे़ङ्हाॽ खासिङ्ङाङ् मे़न्निःत्ने़न्लो, खे़ङ्हाॽग थेनाधे खादाम्मो ना नु कत्ना मे़वाॽमे़गन्लो, इक्सादिङ् खाम्बेःक्माल्ले़ कुबुङ्ङिन्ने यङ्ङाङ् ने़रो॥ 6 आङ्गाॽ पाःत्तुङ्लो, ‘खिनिॽग माङ्निङ्लो हे़क्क्याङ् खिनिॽ के़रे़क् के़रे़क्नुःल्ले़ पयम् यम्बा निङ्वाॽफुमाङ्ङिल्ले़ कुस्सानिङ्लो॥’ 7 हे़क्केसाङ् खिनिॽग मे़न्छाम् याप्मि कुइसिक् के़स्ये़ॽइ के़घे़रिरो, हे़क्क्याङ् वेॽ हाङ्युक् के़जोःक्पाहाॽ हे़क्के खिनिॽआङ् के़आगिरो॥” 8 निङ्वाॽफुमाङ्ङे, पोगे़ॽओ, हे़क्क्याङ् इक्सादिङ् खाम्बेःक्मान् खासे़न् लोःन्दे़ॽओ, थेआङ्भे़ल्ले़ इक्सादिङ् खाम्बेःक्मोबा के़रे़क् मे़न्छाम् सुवाङ्हाॽग खे़ने़ॽ के़मनासिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.